…..و…. محمد عبد الماجد الامل و (فراق الحبائب) اخوان في الرضاعة …و ايام الجوابات – زمن الورقة ، والقلم ، وجوز الفلسكاب – ساعة تمشي وتقول لبتاع المكتبة عاوز لي (جوز فلسكاب) – الحلة كلها تقعد تعاين ليك. يطيروا في عيونهم – ويقسموا في (همهماتهم). زي كأنك قلت عاوز ليك حاجة غريبة. طيّر العيون هسع الناس خلوه. يمكن بخافوا (العدسات) تطير – العيون بقت كلها (مركبة). الواحد مع (العدسات) البركبوها دي – ما بعرف حقيقة الشوق ان كان شوق حقيقي ام كان شوق صناعي. لكن دا كلو ما مهم – خلونا هسع في كتابة الجوابات. ما عارف ليه طلب جوز فلسكاب بسبب كل ذلك (الهلع) – هل طلب (جوز فلسكاب) وقتها بهدد الامن القومي – وإلّا بتعارض مع المصلحة العامة في شيء. ديل ممكن يعارضوا ليك – ما بعيدة عليهم. الناس كلها تترقبك بي (ريبة) وقت تقول عاوز (جوز فلسكاب). لمن تتوهم…تشعر بأنك عملت ليك حاجة غلط – بدون ما تشعر بتلقى نفسك قاعد تتطقطق في اصابعينك. طبعا طقطقة الاصابعين هي ذاتها دلالة على الاحساس بالخطر او بالخجل اوي شيء من هذا القبيل. تشيل (جوز الفلسكاب) وانت خايف (بتتلبد) – تمشي وتتلفت في الشارع – تقول شايل ليك ممنوعات. الزمن داك بي مخاوفو دي كان بي خيرو. كان الواحد وقت يكون عاوز يكتب ليه جواب – بطلع (التربيزة) في الحوش وبملأ (الجك) موية. زي كأنو انك تملأ الجك موية – حاجة لا بد منها واساسية في كتابة الجواب. علما انو (جك) الموية ما عندو اي علاقة بكتابة الجواب – (بس دي كانت فلهمة مننا ساكت). لزوم كتابة الجواب عاوزة ليها (مجهود) ….ومحتاجة ليها لي (عبقرية) وقعاد في الحوش. دنيا. و… (دقيقة خلوني افكر شوية). جوابات زمان كان كلها بكتبوها في شوق حار – اذا مر بالجبال هداها واذا عبر البحر جففها. والخضرة….واغاني عثمان حسين. ثم بعد التحية. تدخل في الموضوع – لو عاوز المصاريف او عاوز تسافر برة البلد…او كمان (البنت) جاها عريس. اصلا كانت الجوابات لا تكتب إلّا لثلاث المصاريف والسفر والعرس. ثم الختام تقبل سلام الوالد والوالدة والحاجة امنة وخالتك بنت وهب. قبل التاريخ المرسل فيه الخطاب بتكون في (ملحوظة صغيرة) في نهاية الجواب فيها (شمارات) الحلة كلها ..الخطبوها …والجابت ليها ولد ..والسافر طلع من البلد. والطفش – والفقد عقلو – والعمل ليه كارو (الوقت داك ما كان في ركشة). جوابات زمان كلها كانت كدا – نسخة طبعوها في الستينات – قعدوا يكرروا فيها للتسعينات….زي صحيفة (الاهرام) المصرية. عشان كدا الزول البكتب الجواب في الحلة بكون زول واحد – عندو دكان في الحلة ..ونضارة زي باب الخشب …(انا ما عارف بشوف بيها كيف؟). دنيا. و… (اكمل). في خضم هذه الاشياء والجوابات البتمشي وتجي كانت هناك ثقافة (خوف) عامة كدا من (الرياضيات). انا ما عارف السر في الخوف من الرياضيات شنو؟. الاستعمار دا خلف لينا حاجات غريبة – خلفوا لينا الخوف من الرياضيات حتى اصبح ذلك معتقد راسخ وثابت. يمكن عشان ناس البلد دي كلهم بتاعين (انشاء) ساكت. بتاعين كلام – وسيكافا. لذلك الارقام والحسابات بتلخبط معانا. بين الاخوان لمن تظهر (الحسابات) ويقعدوا يتحاسبوا بقوموا يختلفوا – وتحصل بيناتهم مشاكل. حتى بين الاحباب ..وقت (الحساب) يدخل بيناتهم …الخلاف بدخل. انتوا ما شفتوا في اغنية الحقيبة الشهيرة وقت بقوا للحساب غني الفنان (حسابي معاك بقى كل كسور). عشان كدا بقولوا عن (الرياضيات) فراقة الحبائب. بتفرق طوالي. ما في عشرة بدوم مع (الرياضيات). اتذكر زمان كنا بندخل (الرياضيات) بنرجف زي (ضفر) في مباريات هلال مريخ. يرجف المباراة كلها تقول سايق ليه (قندران). الرجيفبة التى كانت في الرياضيات هي ذاتها (الرجفة) التى بتكلم عنها استاذنا عبدالمولي الصديق. شفتو (رجفة) عبدالموالي هي زاتها رجفة من امتحان الرياضات. الواحد من يعلقوا ليه جدول الامتحانات اول شيء بشوف امتحان الرياضيات متين؟. بشوف مباراة الامل عطبرة في عطبرة متين؟. انا قلت الامل عطبرة – مالك عاوزين تلخبطوني. امل شنو يا زول؟…اتكلم سمح. والله اللخبطة حصلت. الليلة يا الهلالاب عندكم امتحان رياضيات عديل كدا. تلخبطوا فيه لا قدر الله ..نتيجتكم كلها بتخربط معاكم. اوعكم من الخربطة. ركزوا كويس. وحلوا الاسئلة – سؤال. عاوزين لمن المراقب يقول مضى نصف الزمن نكون ان شاءالله غالبين 2 / صفر. طبعا في مراقبين جابوهم للدنيا دي بس عشان يقولوا ليك (مضى نصف الزمن). دي الفلاحين لي فيها. الواحد وقت يقول ليك (مضى نصف) الزمن يملأ صدرو هوا ..ويمشي لي قدام ويقول العبارة البطير لينا باقي عقلنا من رأسنا. نقعد نتلفت زي (الترزية). الليلة نحن عاوزين باذن الله وتوفيقه ننهى الشوط الاول غالبين 2 / صفر. بقى ذاتو ما عندنا اعصاب للاهداف البتجي في الشوط التاني. وما عندنا اعصاب لمن الهلال يكتفي في المباراة بي هدف وحيد. جضموا لينا (الرياضيات). وتعالوا لي شندي. اهم شيء عندنا النظام. انتوا …. انتوا شنو؟. عاوز تقول شنو؟. يا زول ما عاوز اقول اي حاجة. تقوموا تفهمونا غلط . احسن نطلع. و… انتهى.