بالعربى الكسيح محمد الطيب شلت هم لولادة الغربة يا مولانا !! * قبل أي (حدث) لما تقرأ الجرايد وتجئ بعد (الحدث) تقرأ نفس الجرايد الدنيا دي بتمسخ ليك .. * بتحس بكمية كبيرة من الهبل .. * يعنى مثلاً : الصحف الصدرت يوم مباراة القمة (الخميس) لما تجئ تقرأها بعد المباراة بتموت من الضحك ..
* تقرأ في الجريدة : برهان تية يقول : القمة مسؤوليتي الشخصية .. * محسن سيد : عازمون على الجمع بين الدوري والكأس .. * راجي عبد العاطي : الهلال لن يفلت من الهزيمة .. * الكلام ده لما تجي تتذكروا بعد المباراة بتخجل إنابة عن الذين اطلقوا هذه التصريحات .. * أنا عندي سؤال يا جماعة .. * ممكن أسأل ؟؟ * ناس جريدة الزعيم قبل اسبوعين قالوا بكري المدينة طالب بالرقم كم ؟؟ * ده سؤالي .. * وأي زول طبعاً حر في (سؤالاتو) .. * أنا متذكر قبل أيام شفت جريدة الزعيم كتبت بالخط العريض : (بكري المدينة يطالب بالرقم تسعة في المريخ) .. * قالوا كده .. * والله جد .. * عليك الله شوف الناس ديل خيالهم واسع كيف ؟؟ * ديل بالخيال سجلوا بكري المدينة والصفقة تمت وكل المشكلة بقت في (رقم فانلة بكري) .. * ده خيال عجيب .. * المشكلة في تقديري لم تكن في هذا الخبر .. * ولكن المشكلة والحاجة البتخليك تموت من الضحك إنو نفس الجريدة تاني يوم من نشر الخبر عملت شغل مع عبده جابر أكد فيه عدم تنازله من الرقم تسعة .. * يا راجل .. * لا عليك الله احسن تتنازل .. * غايتو التمهيداب ديل انا ما عارف جابوهم من وين .. * فعلاً والله مرات نبكي من كفرنا ومرات كفرنا يبكي .. * قال ليك عبده جابر يرفض التنازل عن الرقم تسعة .. * والله دي ذكرتني النكتة القديمة .. * في النكتة (البت البايرة) مشت للشيخ ودفعت (دم قلبها) عشان يجيها عريس .. * الشيخ شطح وقال ليها : مبروك يا بتي .. * قالت ليهو مبروك في شنو ؟؟ قال ليها : العرسان ظهروا لي في الخيرة .. * قالت ليهو ان شاء الله خير يا شيخ ؟؟ قال ليها خير عندك تلاتة عرسان، واحد جاي من قطر والتاني من جدة والتالت من دبي .. * البت سمعت الكلام ده وقعدت تبكي .. * بكت لما عيونها بقن زي (كبسولات النزلة) .. * الشيخ قال ليها : بتبكي مالك يا بت وأنا شايف جاينك تلاتة عرسان مغتربين ؟؟ * قالت ليهو : شلت هم لولادة الغربة يا مولانا .. * غربة ب(الفاء) .. * هسة ناس المريخ (شالوا هم لرقم بكري) .. * قال بكري يطلب الرقم تسعة وعبده جابر يرفض التنازل .. * والله الحاجة دي مزعلاني جد جد .. * لكن نرجع ونقول الوهم بيعمل أكتر من كده .. * الجماعة ديل لو كان فرتقناهم يوم الخميس كان عرفوا حاجة .. * لكن نفرتقهم كيف والفاتح النقر لاعب بتشكيلة عناصرها لا يمكن ان تتقابل حتى في بيوت العزاء .. * مالك وفداسي ديل يا النقر في (كوبري الفتيحاب) عن طريق الصدفة ما ممكن يتقابلو .. * تشكيلتك دي لوقابلت بيها أي فريق غير الوصيف الخفيف كان الهلال إتغلب .. * إحتفظ النقر بمهند الطاهر وبشة ونزار حامد وسيدي بيه .. * والنقر فشل تماماً في التعامل مع شوط المدربين ومع شوط الما مدربين .. * المريخ راقد سلطة والهلال بسبب النقر رقد سلطة برضو .. * مباراة الخميس دي على بالنعمة تلقى نزار وبشة من البداية المريخ يخسر بخماسية .. * المباراة أكدت ان مالك مدافع لا يمكن الاعتماد عليه في اللقاءات المهمة .. * مالك بيخجل من المراوغة وبيلعب كرة عشوائية جدا . * كما أثبت اللقاء ان عمر بخيت يمكن أن يفكر في الاعتزال. * عمر كان خصماً على الهلال في ذلك اللقاء وإستحق التغيير ولكن النقر ما بيخلي التنظير .. * إنتو يا النقر خمسة مدربين ما قادرين تغلبوا ليكم فريق عشوائي زي المريخ ده ؟؟ * ده عيب والله .. * لو لعب النقر بصانع لعب لخسر المريخ شر خسارة . * المهم .. شلنا كاسنا . * والباقى هو ملف التسجيلات . * حتى الان يمضي الكاردينال بخطوات رائعة فيما يتعلق بملف التسجيلات . * فقط نرجو ان يجدد مهند الطاهر عقده وكذا المعز .. * ومهم جدا نحسم موضوع نزار منذ الآن .. * نزار عقده ساري حتى منتصف الموسم القادم ولكن إعادة قيده في فترة التسجيلات التى ستنطلق في الفاتح من الاسبوع القادم مهم جداً .. * مهم جداً نجدد لنزار .. * نزار ده يا الكاردينال الهلال سافر ليهو بالليل .. * يعني تعبنا فيهو تعب ما عادي .. * عشان كده لازم نجدد ليهو منذ الآن .. * عموماً .. الاتحاد العام عندما كرم لعيبة المريخ بالميداليات الفضية عقب اللقاء فات عليه ان يكرم الفاضل أب شنب ووديدي مع لعيبة المريخ .. * الفاضل أب شنب ده كان تدوهو ميدالية على الاقل . * العملوا ليكم أب شنب لم يعمله رمضان عجب .. * قلت لي ناس جريدة الزعيم قالوا شنو ؟؟ * بكري يطالب بالرقم تسعة ؟؟ * تسعة يا وصيفاب ؟؟ * ما بتخجوا ؟؟ * ناس كبااار كده وكمان بتكضبوا ؟؟ * غايتو جنس غايتو ؟؟ * و..و.. * وتجرى جري الوحوش غير (الوصافة) ما بتحوش يا (عزو) !!