محمد الطيب بالعربى الكسيح الكاردينال فاكر الهلال كمينة طوب حراري !! كتب الكاردينال (زول بريدك) فشطب مهند ولو كتب (ضنين الوعد) كان شطب نزار حامد !! * كلما حاولنا أن نرفع الكاردينال درجة تجده وباصرار غريب يسقط من النظر درجتين تلاتة .. * يسقط من النظر بهذه القرارات التعسفية التى (ينطق) بها بينما (يصدرها) آخرون .. * الكاردينال يكلف عماد الطيب (الموظف عندنا) بأن ينطق قرارات لم يصدرها الكاردينال وإنما اصدرتها جهات أخرى .. * يعني الكاردينال بيصدروا ليهو قرار والكاردينال بيقوم يصدر لعماد الطيب (الموظف عندنا) قرار بأن يصدر القرار الذى أصدر له .. * شينة والله ان يتقاصر الرجل حتى يكاد يتلاشي أمام الناس وهو الذي بيده (القلم) .. * شينة والله ان تمارس الكذب والخداع على شعب أحب الهلال وعلى لاعبين قاتلوا من أجل الهلال .. * مصيبتنا ان (السيف عند الجبان والمال عند البخيل والكرسي قاعد فيهو زول ما بيستاهلو) .. * تلهو بنا الدنيا وتلعب فيأتي من هو أقل من الهلال ويبعثر كل ما هو جميل في عالم جميل .. * هذا الكاردينال يبدو أصغر بكثير من (كرسي) الهلال الرئاسي .. * هو رئيس يليق به (البنبر) وليس (الكرسي) .. * الكاردينال الذى هو يعشق الاعلام والفلاشات يظن ان الهلال مثل (كمينة الطوب الحراري) .. * يظن ذلك لأنه برلوم في الهلال ومستجد في الإدارة .. * لا يفتر الكاردينال من (الدفع) للصحفيين مقابل ان تظل صوره معلقة في واجهة الجرايد . * الزول ده بتكيف لما يشوف صورتو معلقة فوق زي (سواق البنطون) .. * بتكيف من الحاجة دي.. * مسكين متعطش للاعلام وللشهرة .. * سعى الكاردينال للشهرة ودق باب الشعر فكتب (زول بريدك زيي ما في) وبعض المتابعين شككوا في ان يكون كاتبها هو .. * ده كلو ما موضوعنا .. * لو الكاردينال بيكتب الشعر ولا بيكتبوا ليهو ما مشكلة .. * لو موهبة الكاردينال ظهرت بعد ان بلغ عمره ال(40) برضو ما مشكلة .. * المهم عندنا هو .. * أين كان الكاردينال حينما إرتدى مهند الطاهر شعار الهلال ؟؟ * أين كان الكاردينال عندما توشح المعز محجوب بالازرق ؟؟ * وين كنت لما عمر بخيت جاء الهلال يافع وشافع ؟؟ * ظن الكاردينال ان الصورة التذكارية التى إلتقطها مع بكري المدينة ستكون كافية لتجديد العقد .. * ظن ذلك لأنه رجل (فرحان) يعشق الفلاشات ويجري من وراء الكاميرات .. * ظن ذلك لأنه إرتضى أن تقوده أقلام صحفية البعض منها حاقد على الهلال .. * بعض الزملاء الصحفيين وللأسف كله أعلنوا الحرب على اللاعبين لأنهم لا يردوا على مكالماتهم ولا يتجاوبون معهم .. * هذه فضيحة والله .. * فضيحة ان نشطب لاعب لأنه لا يرد على مكالمات صحفي .. * هذا هوان في زمن الهوان ومجلس الغباء المركب .. * نقول للكاردينال : (العلمك ظلمك) .. * لو في زول يا الكاردينال قال ليك الهلال ده حقك يكون غشاك .. * انت موظف عندنا وما بنسمح ليك تدمر الهلال .. * ما بنسمح ليك لأننا أصلاً ما واثقين انك هلالابي .. * ما في زول هلالابي بيدمر الهلال وبيفرتقوا بقرارات السبب الرئيس فيها هو الخوف من جمال .. * أنا أحلف بالله ان جمال الوالي لو لم يسجل بكري المدينة لما أصدر مجلس الهوان قراره بعدم التجديد للثلاثي . * الكاردينال خاف جمال الوالي شيل مهند ويبقو عليهو (بكري ومهند) عشان كده اصدروا ليهو قرار بضرورة اصدار بيان يقول فيه الهلال لا يرغب في الثلاثي .. * وده لعب عيال .. * إحنا ما دايرين اى مفاجآت منك .. * بكري وفشلت في انك تعيد تسجيلو .. * فشلت لأنو بالك كلو في الصور والجرايد . * فشلت لأنك قاعد في دبي أ تقول انت رئيس نادي العين الاماراتي .. * أنا بقول للكاردينال: لعيبة الهلال بيختلفوا عن (الشغالات الحبشيات) عندك وعند كل أهل السودان .. * يعني ما علي كيفك تشطب الداير تشطبوا وتحرق الداير تحرقوا . * وبنقولها ليك يا مهند الطاهر يرجع الكشف ويا كمان انت استاد الهلال حرمان عليك .. * هو عليك الله لو ما ساي ارادة وقسمة انت تبقى رئيس هلال .!! * فهمك شنو في الهلال ؟؟ * الهلال ده بتعرف ليهو شنو ؟؟ * الهلال ما كمينة طوب يا أشرف .. * الهلال ده عندو رجال حارسنو .. * وانت لو الشغلانية دي غلبتك أجري زي ما جرى صلاح ادريس من قبلك .. * وأوع تقول لي اللاعبين ديل أعمارهم كبيرة .. * كبير الله .. * ما في فريق في الدنيا ما عندو كبير . * انت موهبتك بتاعت الشعر جاتك وانت كبير .. * كتبت ليك قصيدة واحدة زي (بيضة الديك) وكرهتنا بيها السودان . * أنا ما عارف الكاردينال ده لو كان كتب (ربيع الدنيا) كان عمل فينا شنو ؟؟ * والله ده لو كتب (ضنين الوعد) كان شطب نزار حامد ونيلسون .. * قال لاعبين كبار في السن .. * انت في مجلس الادارة قاعد تجري جري لكبار الهلال .. * بتجري لكبار الهلال ناس طه علي البشير وغيرهم .. * طيب هسه ناس محمد عبد الرحمن وأطهر الطاهر يجروا لمنو ؟؟ * المعز ده لو قعد في الكنبة ساكت هيبة . * مهند لو شارك خمس دقائق بيكون الهلال عندو نكهة .. * لكن الكاردينال معذور لأنو دي ما قراراتو .. * معذور الراجل ومسكين .. * بكرة يكبر ويعرف .. * مصيرك بكرة تتعلم يا شاعر الغفلة .. * غداً سنعود بالتفصيل الملل ومن خلال صفحتين سيجد القارئ ترويجهما في عدد اليوم .. * و..و.. * سمحة البتروي .. والرجال مواقف !!
