محمد عبد الماجد دق الدلجة بكري المدينة لو عفوه من (التسلل) كورنر ما بطلع بيه قصة الزول العذبوه (الفئران) في البيت…قصة. كروه العيشة. يطلع ..يرجع يلقى الفئران قلبوا الدولاب فوق تحت. القنوات في التلفزيون بلقاهم ساطوها. يكون مرتب القنوات في التلفزيون زي الحلاوة ..قنوات الدراما في قائمة ..والقنوات الرياضية في قائمة ..والقنوات الاخبارية في قائمة. يطلع ويجي يلقى ليك القنوات دي ملخبطة لخبطة شديدة ..القنوات الدينية مع القنوات الفرنسية. والدراما مع القنوات الاخبارية. يسأل في البيت يقول ليهم اللخبط القنوات دي منو؟. البيت كلو ينكر. في موضة (نكران) عامة في البيوت في مثل هذه الحالات. و (المرا) تقول ليه : ما عارفة ..لكن الريموت قبيل شفت لي (فأر) طالع فيه. الراجل يغضب ..ويقول ليها : هي حصلت كمان!!. فئران ما عندها احترام لي زول. الجبنة ..البصل ..البسكويت ..الرغيف..كلو (الفئران) مشاركاتنو فيه. يجيب ليه كتاب ..يلقي ليك (الفورة) اكلت ليها (فصل) كامل من الكتاب. فورة عذبنو عذاب شديد …يخلي (الموبايل) في الدولاب ..يجي يلقى (الفورة) فتحن الموبايل وعملن (Open) كمان على اللاستديو. يلقى ليك (الفورة) ناثرت ليك (الصور) من استديو ومجدعاتنها صورة ..صورة. وفاتحت الرسائل. مرات صاحبكم بيجي يلقى واحد من الفئران داخل ليك في (الواتساب) وبرد في رسائلو بالانابة عنه. ما يعرف يطلعو كيف؟. فئران شفوت. الزول شاف عذاب (الفئران) دي ..قال يجيب ليه (كديسة) عشان يرتاح في عضمو دا. كلو ولا الواتساب. مشى يجيب ليه (كديسة)..قالوا ليه الكديسة دي عاوزة ليها (رطل لبن) في الصباح. قال ليهم ما مشكلة. قالوا ليه الكديسة دي عاوزة ليها كيلو لحمة في المساء. قال ليهم ما مشكلة. قالوا ليه الكديسة دي لازم في الاسبوع تعطيها اجازة عشان تروح فيها شوية. قال ليهم ما مشكلة. قالوا ليه الكديسة دي بتشرب موية صحة بس ..موية المواسير دي ما مضمونة. صاحبكم قال ليهم ان بقى كدا ..اخير لي (الفورة) بي واتسآبها. هسع ناس المريخ افضل ليهم عنكبة ومحمد موسي من بكري المدينة. جابوا ليهم مهاجم الكورة تكون ماشه على القون …بقوم يطلعها. تقول شغال في الارشيف. زي كأنو ناس المريخ سجلوا بكري المدينة ..عشان يكشفوه. عشان يقدموه على حقيقته. عشان يقولوا لينا أهو دا مهاجمكم يا ناس الهلال الكنتو فرحانين بيه. النسخة الاصلية لبكري المدينة ظهرت (الكشافات – الكشافات – وبالعكس). اتضحت. انكشف بكري المدينة. بكري المدينة في الهلال كان مرتاح ..ما في زول شاعر بي (الروشنة) العايش فيها دي. ما في زول جايب خبرو. يضيع على كيفو..ما في زول بيسألو. اعلام الهلال كان بغطي ليه. واعلام المريخ كان ما جايب خبرو. يجيب خبرو كيف؟..وهم عندهم (عنكبة). ما في زول كان بقول لبكري المدينة تلت التلاتة كم؟. يضيّع على راحتو …الاهداف كتيرة في الهلال ما في مشكلة. ما في ازمة. كان بكري المدينة مع ناس نزار حامد وبشه زي (النجم)…يلعب اي مباراة مع الهلال لو ما جاب ليه هدف ..بطلع نجم المباراة. الهلال كان ساتر بكري المدينة. بكري المدينة انتقل للمريخ ..وشفناه ليك على حقيتو. الزول دا نحن كنا مستحملنو كيف؟. المصبرنا عليه شنو؟. الكان جابرنا شنو على (المغصة) دي ؟. بكري اتكشف. انا ما غايظني ..بكري المدينة يلعب في المريخ الان..الغايظني الزول دا كان في الهلال بيلعب معانا كيف؟. كنا بنستحمله كيف؟. غايتو نحن كنا صابرين على (تقيل). كنا مستحملين بكري المدينة. يا ريت لو كان الامين البرير شطب بكري المدينة دا من اول موسم ليه في الهلال. هسع كان بكري المدينة بيلعب في مريخ الفاشر ..ما في زول كان ح يكون شاعر بيه. ولا في زول جايب خبرو. ولا عارفنو بيعمل في شنو؟. منتصر زيكو نجم المريخ السابق ..ومهاجم المريخ الشهير ..امس براهو قال بكري المدينة كان ضيف شرف المباراة. زول في كوستي..امام مريخها يكون (ضيف شرف) المباراة بكون فيه رجا تاني. بتنتظروا منو حاجة. اذا كان امام مريخ كوستي (ضيف شرف)…منتظرين منو شنو تاني؟. الكلام دا ما قلناه نحن..الكلام دا قالوا منتصر زيكو…واظن ما في زول عندو رأي في كلام زيكو. ولا في زول بقدر يقول شيء. الغريبة ان بكري المدينة مع انه (ضيف شرف) المباراة ..إلّا انه مع ذلك منح (كرت اصفر). ضيف شرف بيأخد ليه (كرت اصفر). اول مرة اشوف لي ضيف عينو قوية كدا. دا زي (الضيف) المزعج. الضيف الاول ما يدخل البيت يستلم ليك (الريموت). ويسأل من (الشاحن). ويقعد يحسب ليك البيت فيه كم (كوبس) بتاع كهربة. ويقعد يتونس ليك مع (الشافع) عشان يشوف الخبارات كلها. هسع بكري المدينة ..عمل نفس النظرية. جابوه (ضيف شرف) للمباراة ..ادوه (كرت اصفر). انت يا بكري المدينة وقت (ضيف) في المباراة البخليك تهابش شنو؟..عشان يدوك (كرت اصفر). بعدين ناس مريخ كوستي ديل (اولادكم)..يعني ما بغلطوا عليكم. البخليك تأخد ليك (كرت) قدامهم شنو؟. بكري المدينة بي وضعيتو دي ..مفروض تكتبوا للفيفا خطاب. غير خطاب الهلال. ان شاءالله (ايقاف) الفيفا لبكري المدينة يتأخر شوية. خلونا ..نستمتع بالحالة دي شوية. نحن ما ضايقين على الايقاف. اكتبوا للفيفا..قولوا ليه شكوى الهلال ما ترد عليها الآن. اتأخري شوية. اتعطلي. وقولوا للفيفا كمان ..نحن موافقين على اعفاء بكري المدينة من قانون التسلل. موافقين ما يحسبوا عليه اي حالة تسلل. يحسبوا عليه (تسلل) ليه ..وهو اي كورة بلبعها برة القون. خسارة (تسلل) ساكت. الموضوع ما بستاهل. بكري المدينة ادوه حريتو كمان. لو شال الكورة بي ايدو ..ما تحسبو عليه (مخالفة). نحن موافقين. وممكن كمان نجيب توقيعات من كل الاندية التى تلعب في الدوري الممتاز. وممكن كمان نجيب لينا مخالصة من (عزام). عزام ذاتو موافق على الكلام دا. بكري المدينة ما تحسبو عليه (تسلل). التسلل بيحسبوه على مهاجم بيستاهل. مهاجم بيعرف يجيب قون. لكن بكري المدينة يحسبو عليه (تسلل) على ايه؟. بكري المدينة لو عملوا ليه (اعفاء) من التسلل ..كورنر ما بجيبو. خلوا القون. ……….. و الخرطوم الوطني اتعادلت امام الاهلي مدني. ومريخ الفاشر عرف ان يخرج بنقطة من الاهلي في الخرطوم. اليوم الهلال والامل ..تعالوا شوفوا وليد. شوفوا نزار حامد. شوفوا فيصل موسى. نيسلون ..يقدم اجمل كورة. الكورة ما منقولة على الهواء. الكورة على الشباك. شوفوا الثقة والهيبة الواقفة في مرمى الهلال. اتفرجوا ..عشان تعرفوا الفرق. ………. و… السيدة (ل) ..ناس مريخ كوستي بي طريقتهم دي بنزلوا من الاسبوع الثالث للدوري الممتاز. عارف ما عندك علاقة بالموضوع دا. و… وقرّض على كدا.
