محمد عبد الماجد دق الدلجة الظاهر عليكم قصرتوا في (الخرفان) اها تاني ح تقوموا تعملوا لينا حركاتكم دي. تاني ح تقوموا تقدموا (استقالاتكم). ونقوم نحن تاني نحنس. معليش. وما كدا. والكورة اصلها كدا. والمجنونة. واي دمعة حزن لا لا. اصبروا موضوع اللحمة دا ماشي ليكم عليه. ح ترجعونا تاني عشرة سنوات لى وراء وقت جمال الوالي كان جديد. وكنتوا اعلام المريخ (الحساسية) كاتلهو. المريخ يخسر يقولوا ليك : (اي دمعة حزن لا لا). المريخ يطير يقولوا ليك : (ما تهتموا للايام ظروف بتعدي). امس خسرتوا امام الاهلي شندي…عارفكم ح تقولوا الشرطة. وح تقولوا التلفزة. وباسكال. اصبروا موضوع اللحمة دا ماشي ليكم عليه. اول انتوا وقت طلعوا ليكم (الشرطة) انسترتوا امام مريخ الفاشر. مجلس المريخ ما عندو حل غير (الاستقالات). انتوا قدموها ..جماعتنا ديل ما بقصروا معاكم. ح يقعدوا يحنسوا. انت احسن زول يا جمال الوالي. وانت ما في متلك قط في البلاد. والمريخ بدونك ما بيبقي يا جمال. اعلام المريخ يقعد يجرس ليك. والاقطاب يتجرسوا. والجمهور بقول ليك حرام عليك يا الوالي – نحن من غيرك ما بنبقى. نحن ما بنعيش. ولا بنقدر. ولا بنجازف مع الهلالاب ديل. الفيلم ح يدور. نفس المشاهد. نحن حفظناه حفظ. جمال الوالي ح يقول انا هذه المرة مصّر على الاستقالة. ما بقعد – ما بقعد – ما بقعد – ما بقعد. لا تراجع. خلاص دا قرار نهائي ..(طبعا جمال الوالي كل ما يقدم استقالتو بيقول كدا). بقول قرار نهائي. بقول المرة دي ..حسمت الموضوع. يقوم (ضفر) يجيب ليه (قون)..جمال الوالي ينسى اي شيء. يقوم يرجع. قاعدين على الهبشة. قون يخليهم يستقيلوا. وقون يخليهم يسحبوا الاستقالة. ونحن بنتفرج. لو قلنا ليكم – نحن ما بنتفرج والله بنكون بنغشكم. وبنكضب عليكم. ناس الفريق طارق وعبدالصمد ..اصلهم ما عندهم كلمة. جمال الوالي يستقيل ..بيستقيلوا. جمال الوالي برجع بيرجعوا. ما عندهم كلمة. قاعدين ساي. تمومة مجلس. جمال الوالي مرة كان عاوز يمقلب ليك ناس عصام الحاج ..قال نحن مفروض نقدم استقالاتنا كلنا. اصبروا موضوع (اللحمة) دا ماشي ليكم عليه. خلوني اول حاجة اكمل موضوع (الاستقالات). ناس عصام الحاج شفوت – قالوا ليه انت لو عاوز تستقيل يا جمال الوالي استقيل براك. نحن ما بنغشكم – ولا بنجاملك ..ولا بنستقيل معاك. جمال الوالي (زعل) مشى قعد في بيتهم (6) شهور. (6) شهور ما كلم زول. (6) شهور ما قال حاجة. ناس المريخ الزول البيجيب ليهم (كهربة) للنادي ما لقوه. الموضوع صعب عليهم. ناس عصام الحاج قالوا نحن ما بنقدر على (الصرف) دا ..والمريخ ذاتو ما عندو موارد خاصة. نصرف من وين على المريخ؟. نحن المريخ دا كان حق ابونا. اصبروا موضوع (اللحمة) دا ماشي ليكم عليه. ناس عصام الحاج اتخارجوا – جمال الوالي جاب ليه (18) لورد في مجلس المريخ الجديد. لوردات من الحكومة. اقل لورد عندو (14) مصنع. تقول عاوزين يرجعوا (القدس). (18) لورد يا مفترين. الموردة لو لقت ليها (لورد) واحد ..كانت بقت (وصيف) للهلال. انتوا (18) لورد ووصافة. جمال الوالي ما خلي ليك (لورد) في البلد – كلهم جمعوهم ليك مع جمال الوالي وجابوهم في مجلس معين. شبكونا ليك (نضمي). قالوا ح يعملوا مول…(طبلية ما شفناها). وقالوا ح يعملوا نادي عائلي…(كرسي ما جابوه). وقالوا ح يعملوا حوض سباحة…(ترعة ما حفروها). وعبدالباسط حمزة قال ح نحول المريخ الى شركة عامة. شركة عامة يا لورد!!. اصلو ما بنصدق. اصبروا موضوع (الضبائح) دي ماشي ليكم عليها. عارفكم انا – منتظرين انتوا اللحمة. عليك امان الله – المريخ ما شاف من (اللوردات) ربع كيلو طحنية. ولا بلحة. اتكلموا وملأوا الجرايد كلام وغادروا. غاردوا لكن جمال الوالي ظل في مكانه. كان (منتخبا) استقال – جاء (معينا). اللوردات المعاهو غادروا وجاء جمال الوالي للمرة العشرين (منتخبا). جمال الوالي جاء راجع بالباب الخلفي (منتخبا) مع ناس عبدالصمد والفريق طارق. يعني مرة نفض ليك ناي عصام الحاج وازهري. ومرة نفض ليك اللوردات. اللوردات طلعوا (دعاية). طلع ما عندهم اي حاجة. هسع جمال الوالي عاوز يبيع ناس عبدالصمد والفريق طارق …(الفيهم اتعرفت). ح يستقيل المجلس ويأتي جمال الوالي (معينا) مع لوردات جدد. ضفر في مباراة عزام كشف السر. ضفر قال لو جمال الوالي استقال – نحن البيصرف علينا منو؟. ضفر جاب ليه قون ..جمال الوالي سحب ليك لاستقالة. ناس عبدالصمد والفريق طارق – اصلهم قاعدين ساكت. اقصى حاجة ممكن يعملوها الواحد فيهم يبقى رئيس بعثة المريخ المغادرة للخرطوم. ما عندهم اكتر من كدا. لكن انتوا تعالوا نناقش اسباب الخسارة في شندي. تعالوا نشوف (مسمار) شندي دا سببو شنو؟. يا ربي (التفلزة)؟. ما اظن – تلفزة (النيلين) اخير عدمها. تلفزة النيلين زي اف ام 104. ناس الاهلي شندي عندهم ضربتين جزاء الحكم ما احتسبها – يعني التلفزة ما اثرت في حاجة. يا ربي السبب (الشرطة). يمكن ناس المريخ عاوزين يطلعوا ليهم الشرطة. ما اظن. يعني الشرطة وقت طلعت من الملعب في مباراة مريخ الفاشر – قدر المريخ يعمل حاجة. طيب المشكلة في شنو؟. يكونوا افتقدوا (باسكال). باسكال في مباراة عزام يشيل ويجلط – تقول (سماكي) جابوه من بحرو وقالوا ليه ألعب امام المريخ. بكري المدينة امس لو لقى قدامو (باسكال) كان جاب ليه قون. يكونوا ناس المريخ ديل قصروا في (الضبائح). الظاهر كدا. مباراة شندي المريخاب ما ضبحوا ليها. وانتوا بدون (خرفان) لا بتغلبوا ولا حاجة. عاوزين ليكم للمباراة اقل حاجة (9) خرفان. لو ما ضبحتوا – ما بتغلبوا. ما تغشوا نفسكم. عشان كدا المشكلة ما في غارزيتو…(جاب ليه تشكيلة ليها 21 سنة ما لعبت). الباشا دا جبتوه من وين؟. الباشا من القدم ..وقت طلعوه ..طلع عكس. طلع عكس المقصورة. لكن برضو دا ما سبب للخسارة. السبب (الخرفان). المعز محجوب ما عندو اي ذنب ..صاحبكم لسع معلق في (السلة). الحركة دي عملها المعز محجوب قدام الاهلي القاهري ..نجح فيه. هسع المعز محجوب قدام الاهلي شندي ما قدر يعملها. شفتوا الفرق بين الهلال والمريخ. وعلي جعفر..يصلّح في الكور. انت يا علي جعفر ..(جلطتك) العملتها في تنزانيا – إلّا تجي وتعملها في شندي. ناس شندي حركات زي دي ما بتفع معاهم. بالله علي جعفر ..لعب ليك الكورة (مقشرة) – هيثم مصطفى ما بعملها. وغارزيتو ضارب ليك المحنة في الخط. غارزيتو – المعز محجوب – بكري المدينة – تراوري – وعاوزين تغلبوا. طبعا ممكن غارزيتو يطلع بكرة في الجرايد ويقول سبب الخسارة من الاهلي شندي (مدير الكورة). مدير الكورة طبعا محسن سيد. غايتو نوصيكم من الآن..مباراة المريخ القادمة امام الامل عطبرة – اقل حاجة اضبحوا ليها (حمل). لو ما ضبحتوا ما بتغلبوا. ………….. و الحمدلله الهلال تجاوز بنجاح تام مطب الميرغني كسلا. تجاوزنا جبال التاكا. وشربنا القاش. سجل مريخ الفاشر في المريخ هدفا من الدقيقة 20 من الشوط الاول – مع ذلك المريخ فشل في التعديل. في شندي ..المريخ فشل في تعديل هدف الاهلي شندي الذي جاء منذ الدقيقة العاشرة من الشوط الاول. الهلال تقدم عليه الميرغني في الدقيقة 30 ..عادل الهلال بعد دقيقتين. ثم جاء سيدي بيه وكيبي وسجلوا في الشوط الثاني. المحترفون في الهلال ردوا على الجميع. سجل سيدي بيه مرتين وسجل كيبي. تاني ما في زول يتكلم عن سيدي بيه. ما فيه كلام. كاريكا قدم مباراة كبيرة وكان من اسباب اتتصار الهلال. …………. السيدة (ل)..سافرت شندي مخصوص عشان ما اقلب الطبق. وقرّض على كدا.
