دق الدلجة محمد عبد الماجد مستر (فوهنج) طلع من إندنا عندنا في الحلة ناس قعدوا يزغردوا بالصيني. الزغرودة بالصيني زي (سلطة الاسود)..بيحسبوها ليك سلطة وبيحسوبها ليك في نفس الوقت (طبيخ). وهي لا سلطة. ولا طبيخ. سمعنا الزغاريد الصينية خلينا الحاجة الفي ايدنا وجرينا على البيت – عشان نعرف الحاصل شنو؟. لقينا (المروحة) شغالة في تلاتة. قلنا اكيد الجماعة ديل عندهم فهم براهم. نحن من نلقى (المروحة) شغالة في تلاتة ..بنعرف طوالي في (فهم). قاصدنها. قعدنا نسأل. قالوا (الخوتيمة بنت اليسع) جاها عريس (صيني). قلنا الزول دي الاسبوع الفات كانت بتلعب في الشارع بي فستانها الاحمر – كمان الشافعة دي متين بقت للعرس؟. نحن ما رضينا ..قلنا (الخوتمية بنت اليسع) ما عندها ولاد عم عشان تعرس ليها (صيني). ولاد البلد كملوا. ابو الخوتمية زول رسمي ..عم (اليسع) اول ما الصيني قال ليه عاوز يد بنتك بالصيني..قال للصيني انت شغال وين؟ (بالصيني برضو). الصيني قال ليه بالصيني شغال في (الجوهرة الزرقاء). الكلام انتهى. والفهم كمل. واحد من الرجال الكبار في الحلة ومن اصحاب الخبرة الطويلة في الحياة وقت سمع كلمة (الجوهرة الزرقاء) قال لليسع نحن الزول دا نعقد ليه طوالي – ما بنلقى لينا عريس افضل منو لي بنتنا الخوتيمة. عقدوا ليه طوالي…نحن ما عندنا خطوبة..وبنت تمرق وتطلع من غير عقد. الكلام دا ما بنفع معانا. اليوم التاني ..لقينا ليك (الصيني) شايل (رقم العداد) بتاع نسابتو وواقف في مركز توزيع الكهرباء. واقف في الصف. قلنا لي بعض ..انتوا خلاص لحقتو تنزلوه شغل طوالي. شفتوا النسابة من يرسلوا ليك العريس للكهرباء …اعرف طوالي سيطروا على الوضع. واقنعوا من العريس. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سواء رؤياكم الغالية). مريخابي (حاقد) النوع البقدم (الشطة) على (العدس) – قال لي الصيني الوقّع عقد (الجوهرة الزرقاء) نيابة عن الشركة الصينية انا شايفو قبل كدا. قلت ليه شايفو وين؟. قال لي زي الشايفو في مشروع الجزيرة. قلت ليه الجابو مشروع الجزيرة شنو؟…ناس مشروع الجزيرة ديل عندهم برضو (جوهرة زرقاء)؟. قال لي جوهرة شنو؟..الصيني دا جاء مشروع الجزيرة عشان يزرع ليه (بطاطس). المعني (الجوهرة الزرقاء) دي ح تبقى (البطاطس الزرقاء). غايتو المريخاب ديل وقت يحاولوا يتارشقوا بتبقى رشاقتهم شينة زي (عمرو دياب) لمن يحاول يغني (القليب الراسمو حنة يبدو من قلبك احن). و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سواء رؤياكم الغالية). مريخابي تاني قال لي انت عارف الصيني مدير الشركة الصينية قبل ما يوقع العقد مع رئيس نادي الهلال كان بغني في شنو؟. قلت ليه اكيد كان بغني في (المال ما بهمو ان كتر وان راح) بالصيني. زول دافع ليه (40) مليار يقولوا ليه شنو يعني؟. المريخابي قال لي ابدا ..الزول دا سمع اضاني دي كان بغني في (عجبوني الليلة جوا ترسوا البحر رجعوا). قلت ليه نحن جايبنو عشان يعمل لينا استاد وإلّا عشان يعمل لينا (كوبري). اعملوا حسابكم من (الجقور) يا الكاردينال. اوعكم. على كدا الصيني الجابو الكاردينال دا اكلتو المفضلة (ام شعيفة). ويكون معاها (بصلة) كمان. يعني عادي الصيني مدير الشركة الصينية لمن يقعد ليه (5) شهور في البلد دي نلقاه حايم في سوق ام درمان بفتش ليه في محل تحويل رصيد. طبعا الصينيين ديل جنهم تحويل رصيد. الزول دا هسع يكون قابض ليه على الاقل (10) مليار جنيه ..وتلقوا تلفونو شغال بي (تحويل الرصيد). صعبين شديد .. اصلو ما بيشتروا ليهم (كرت). الواحد فيهم بقول ليك انا جيبت السودان اعمل قروش ..ما جيت السودان عشان امشي عفراء. خايف الصيني بعد (5) شهور ..نلقاه في سوق الناقة بيضرب في كبدة الابل. لو قعد كتير ..افكارو ذاتها بتتبدل. يعني ممكن يقنع ليك الكاردينال ويقول ليه ..اسمع لو عملت دكاكين بالجهة الشمالية للاستاد بطلعوا ليكم حق الكهرباء. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سواء رؤياكم الغالية). مريخابي تاني ..بطنو طامة شديد من (الرد كسل)..عندو صاحبو شغال في بنك. المريخابي قال للزول الشغال في البنك ..انت تعال هنا الاربعين مليار فيها كم مليار. بتاع البنك قال ليه بكون فيها (36) مليار عادي. الاربعة بكونوا ضربوها. الرقم يكون فيه تسعة ارقام – عادي يضربوا ليك منها ستة ارقام. الشيء الما قادر افهمها قالوا ليك (فوهنج) مدير الشركة الصينية المنفذة للجوهرة الزرقاء قال لاشراف الكاردينال قروشك دي لو دفعت عليها خمسة مليار تاني بنعمل ليك استاد الهلال (عش الطائر). عاوزين يمقلبوا الكاردينال. الكاردينال (شفت) قال ليهم بس اعملوا لي (الجوهرة الزرقاء)..عش الطائر اعملها انا لي منو؟. والله نعمل (عش الطائر) في البلد دي – ناس بلة جابر ما يريحونا. بلة جابر طبعا جردوه من (الكابتنية). شالوها منو. واحمد الباشا قاعدو في الكنبة بقى اكتر من قاعدو في بيتهم. انتوا ليه كباتن المريخ ديل بتعملوا فيهم كدا. قالوا رمضان عجب قالوا ليه نديك (الكابتنية). رمضان عجب بعد ما شاف (الجوهرة الزرقاء) قال ليهم (الكابتنية) اعمل بيها شنو؟..انا عاوز (7) مليار جنيه. امير كمال كتلو قلبو بالكابتنية. زولكم صدق. اليوم كلو في (الواتس آب). و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سواء رؤياكم الغالية). مريخابي جديد في الخرطوم. ما فاهم اي حاجة. واقف ليك في شارع الستين زي الزول الواقف ليه في ترعة. المريخابي دا قالوا ليه الجماعة ضربوا الحوثيين. المريخابي قال ليهم والله الهلالاب بعد (الجوهرة الزرقاء) دي ممكن يعملوا اي حاجة. الله يستر علينا. ديل بدون (جوهرة) ما ريحونا. طبعا ناس المريخ عندهم نصيبهم في (الجوهرة الزرقاء). اصلو نحن ما بننساهم. هم شركاء معانا في (الجوهرة الزرقاء). شفتوا يا مريخاب (الجوهرة الزرقاء) دي بعد ما تكتمل ان شاءالله عندكم فيها (ضلها). تجوا تقعدوا في (ضلها) اليوم كلو. موش انتوا (ضلنا). خلاص ضل (الجوهرة الزرقاء) ما بينا. بس يا سلك بعد 12 شهر ما القاك حايم بي هناك. اوعك القاك حايم جوار (الجوهرة الزرقاء) وبتعمل فيها بتسأل عن مواصلات ام بدة الجميعاب. اوعك يا سلك. نحن حركاتكم دي عارفنها. و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سواء رؤياكم الغالية). قالوا ليك المريخاب ضبحوا ليهم (29) خروف ما عملوا اي حاجة. غير يضيعوا في ضربات الجزاء ما شفنا ليهم شيء. الهلالاب ضبحوا ليهم خروف واحد …دشّنوا ليك العمل في (الجوهرة الزرقاء). لعب ما في. ولا بنجامل في الحاجات دي. ولا بنغشكم. واحد طقاهو (قندران). فرتكو ليك زي الكلمات المتقاطعة. اول ما فتح ..قالوا ليه اسمع يا ابوالشباب نوديك وين؟..رويال كير وإلّا الزيتونة. صاحبكم قام على حيلو بعد الفرتكة ديك وقال ليهم : اوعكم تودوني الزيتونة ..ودوني (الجوهرة الزرقاء) لو عاوزين تريحوني. انا ما في حاجة بتنفعني قدر (الجوهرة الزرقاء). و (ونحن عايشين والحمدلله (النفس) بينزل ويطلع إلى الآن..ولا تنقصنا شيء سواء رؤياكم الغالية). ……….. و قمة اخرى بين الاهلي شندي والخرطوم الوطني اليوم بمدينة شندي. يعني المريخ الليلة ح يتراجع تاني في روليت الدوري الممتاز. الجماعة ديل ..لا جوهرة ولا مركز اول كمان. نحن السنة دي ح نلقط اي حاجة. ما بنخلي لينا (جوهرة) في البلد. مباراة المريخ امام كابوسكورب اكثر من صعبة. يقولوا ليكم الكلام مية مرة. ركزوا في الاياب. السنة كلها مركزين في بكري المدينة. ….. السيدة (ل) الواحد لو غاب من الخرطوم دي شهر وجاء راجع تاني ح يلقى (موقف استاد الخرطوم) في مصفاة الجيلي. اصلو ما تدقسوا. وقرّض على كدا.
