دق الدلجة محمد عبد الماجد سانغا مع (الشطة) جهّزوا ليه (بصلة خضراء) الليلة الواحد لو وقف في (خشم الباب). المريخاب ح يفهموه غلط. ح يقولوا الزول دا قاصد مباراة الترجي والمريخ. عامل قميصك (الاخضر) دا. تقول صحن ملوخية. وانت ولا يكون عندك قصد. بي كل حسن نية. ولا في رأسك مباراة (الترجي). المواضيع دي كلها حصلت صدفة ساكت. كمان علاقة الوقوف في الباب بالترجي شنو؟..لو ما حركات من ناس المريخ. نحن مالنا ومال (الترجي)؟ – الله يمرقنا نحن في (رقبتنا). انتوا قايلين (سانغا) ساهل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس بي صراحة مباراة (الترجي) صعبة شوية. الحقيقة كمان نقولها. الليلة لا تتغدوا ولا تفطروا. ضفر قالوا ليك في تمرين المباراة ..قال ليهم ودوني لدكتور عيون …ما شايف قدامي. زول ما شايف قدامو تفتكروا يشوف الترجي. ضفر الليلة ح يكون زي الزول الواقف برة البيت. غالباه القعدة. الزول الشفقان داك – وقت تلفونك يضرب ..يجري عليه قبالك. لو صهينت من التلفون ..يقول ليك : (رد). يا زول مالك ..يمكن ما عاوز ارد. ضفر الليلة ح يكون في الحالة دي. حالة الزول البكون راقد في المستشفى …ومنتظر الدكتور يكتب ليه خروج. يضرب عمود – عمود. ينزل طاسة – طاسة. ضفر زي حالة الزول البكون عاوز يضرب تلفون..يقوم فجأة يلقى تلفونو ما فيه رصيد. ضفر هو حالة عدم الرصيد دا. ومرات. ومرات. ومرات. الواحد فينا يكون نايم. يقوم يصحى. يستيقظ يعني. يقوم من النوم…يلقى الواطة سخنة ..يقول يعلق زي ما الناس بتعلق. كمان التعليق عن الطقس عاوزين تمنعونا ليه؟. عاوزين تحرمونا منو. التعليق دا كمان بقى (غاز). بقى (كوبري). نعلق زي ما عاوزين. رأينا في (الجو) دا ما نقوله؟؟!!. حرية التعبير عن (الجو). ما عاوزين اكتر من كدا. نتكلم عن (الطقس) زي ما عاوزين. نعلق نقول الليلة الواطة (كاتمة). كااااتمة. الليلة سخانة شديدة. التعليق القاعدين نقوله في اي مناسبة. الناس كلها بتقول كدا. بتعلق. عادي – ما فيها اي حاجة. طبيعي يعني في السخانة دي نعلق عن (الجو). تتخيلوا المريخاب بفهموها غلط. طوالي بقوموا يحوّرها. ح يقولوا قاصدنها. ويقوموا يفهموها حسب عقليتهم. ويقولوا الزول دا قاصد مباراة الترجي. وانت يكون ولا عندك قصد. ولا في بالك. بتعلق بي كل حسن نية. هو نحن في رقبتنا مجهجهين ..نقوم نتكلم عن مباراة الترجي. الله يحلنا من سانغا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (علي جعفر) لاعب المريخ ..قال ليهم (رادس) دي انا في (الكنبة) ما بقدر اقعد فيها. الكنبة ذاتها عليه صعبة. الواحد فينا الليلة لو جاء داخل البيت. جاء راجع الساعة تلاتة. دي فيها حاجة. وقال الواحد الليلة في (السخانة) دي يرجع بدري شوية. عادي يعني. ما فيها اي قصد. زول راجع البيت بدري شوية ..(ولا في رأسو كورة الترجي والمريخ الساعة ستة). راجع عادي. ناسي الموضوع كلو. ترجع البيت. تفتح التلاجة. ما تلقى فيها اي حاجة. التلاجة فاضية – دي فيها حاجة. فيها قصد. تدخل المطبخ ..تقعد تتبن في (الحلل) زي الجُهال. تفتح ليك (حلة) تلقى فيها ملاح (قرع) بايت. الموضوع دا فيه (ترجي). فيه اي شبهة للترجي. تجيب ليك (شطة) في صحن خارجي. وتشوف ليك بصلة – (دي فيها حاجة). الكلام دا فيه اي (ترجي). وتمشي تجيب ليك (كسرة) من الشارع. تمرق ليها اي اخر محطة. ليه دايما الكسرة بتكون في اخر محطة؟. الفلسفة في دي شنو؟. تعجن الكسرة مع القرع ..وتقطع البصلة مع الشطة. تشتغل بي اخلاص. وتُمصر ليك (ليمونة) – دي فيها حاجة. وتقعد تضرب في (القرع). ما تخلي ليك حاجة. جماعتنا المريخاب ديل تصوروا بقوموا يفتكروا انك بالقرع والبصلة المقطعة دي – والكسرة البتجيبها من الشارع قاصد حاجة تانية. بقوموا يتخيلوك قاصد الترجي. وانت تكون ما جبت سيرة للترجي. ولا في بالك. نحن مالنا ومال الترجي؟. نحن مشغولين في رقبتنا. الله يشوفنا من (سانغا). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (الريح علي) الليلة لو شارك في المباراة – (الكونفدرالية) ذاتها ما بتلموا فيها. بنزلوكم (سيكافا) طوالي. ومرات. ومرات. ومرات. تطلع التلفزيون. وتعمل ليك كباية شاي. عادي يعني. وتقول للزول المركز معاك من الصباح – الليلة عندي فيلم اجنبي عاوز اتابعو. فيلم اجنبي عادي. ما عندو اي علاقة بالترجي. لا من بعيد. ولا من قريب. لكن (المطاميس) ديل ح يفتكروا انك قاعد تحضر في الفيلم الاجنبي دا مخصوص. مخصوص بس عشان تحرق قلوب المريخاب. والعجب لو قعدت تعلق عن الفيلم. لو علقت – وقلت اي حاجة. بي قصد. او بدون قصد. ح يقولوا انت بس قاصد (الترجي). وان الفيلم الاجنبي دا اصلو ما بتحضر فيها عبث. اكيد عندك قصد. عندك فهم. تكون قاصد سبعة الواحدات. رغم ان سبعة الوحدات ما عندها اي علاقة بالموضوع. لكن الجماعة ديل يعملوا ليهم شنو؟. بفهموها كدا. ويقعدوا يزيدوا في الكلام. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (جمال الوالي) لو قال ليكم ح ننظم (سيكافا) اوعكم تفرحوا. اوعكم تصدقوا. انتوا كل مرة يغشوكم بي نفس (الطريقة). ونحن نشرح ليكم. ونقعد ليكم في الواطة عشان نفهمكم الموضوع. جمال الوالي ما يقول ح اعمل ليكم طابق تاني. او مقصورة طايرة. ومرات. ومرات. تقوم من صباح الرحمان. تقعد تلف في (الطبق). تطلع في رأس البيت. وتنزل تاني تشرب ليك موية. وترجع تاني. دي فيها حاجة. ناس المريخ ديل ح يفتكروك قاصد حاجة تانية. وح يقولوا اصلو طلوع رأس البيت دا ما ساكت. اكيد عندك هدف تاني. اكيد قاصد ليك حاجة بعيدة. تكون قاصد (الترجي). لو ما قاصد الترجي في زول في السخانة دي بيطلع رأس البيت. في زول بقعد يلف في الطبق ساكت كدا. الموضوع ما بطلع من (الترجي). وانت ولا عندك قصد. لكن جماعتنا ديل تقنعهم كيف؟. ولا بقتنعوا. ولا تحاول. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (امير كمال) الليلة بنقص (21) كيلو جرام. امير كمال الليلة ح يبقى ليك زي شيبون. …….. و الاهلي المصري نزل الكونفدرالية. للموسم التاني على التوالي يفشل الاهلي المصري في التأهل لمرحلة المجموعات. وللمرة الثانية على التوالي ان شاءالله وباذن الواحد الاحد يتأهل الهلال لمرحلة المجموعات. دي غير المرات السابقة. الكبير كبير. الرجاء الغربي برضو في الكونفدرالية. الكونفدرالية بقى فيها جنس حمام. حمام (كبير) اوي. واليوم يكتمل مجموعة حمام الكونفدرالية. طبعا الترجي لو نزل …الابطال المجموعات ح تكون لينا سالكة. خروج الاهلي المصري ربما يضع الهلال على رأس مجموعة اذا تأهل الهلال اليوم باذن الله. عشان كدا ألعبوا كورتكم. واحضروها. الجماهير يجب ان تكون حاضرة. التأهل اليوم في يد الهلال. اوعكم من حمام الكونفدرالية. نحن كمان جننا وجن الحمام (كبير السن). الاهلي المصري كورتو فكت. والترجي ذاتو كورتو انتهت. الناس ديل بقوا يلعبوا بي تاريخهم. الكورة ما بتعرف التاريخ. مباريات كثير في دور ال (16) انتهت بضربات الترجيحية. ومباراة المريخ والترجي قد تحسم ايضا بالضربات الترجيحية. الترجي ما الترجي. مستواه متهور. واذا خرج الاهلي المصري بطل الكونفدرالية ..البمنع الترجي شنو؟. الاساءة للسودان او المريخ مرفوضة. اياكم من الاساءات العنصرية. الترجي لو حاول يلعب بالنار سوف يخسر كثير. وان لم يحسمه المريخ ..سوف يأتي الهلال ويحسم هذه الفوضى. السودان فوق الجميع. لا بنعرف تونس. ولا بنعرف مصر. بنقدم السودان على كل الدول. ……….. السيدة (ل) الرسالة في (المطر) بتصل ساقطة. وقرّض على كدا.
