محمد عبد الماجد دق الدلجة الرصاصات (الملاوية) والرصاصات (السودانية) الاتنين (فشنك)!! طلع ما في اي فرق بين (الحمام) الملاوي…و (الحمام) السوداني. فرقكم شنو؟. غير لسانكم الطويل دا. لو ما لسانكم طويل …كانت (شوربتكم) هسع مدورة من سبعة صباحا. بابكر سلك كاتب ليه (42) عمود في الحمام الملاوي ..وهو ما شايف عوجة (حمامو). طلعتو (حمام) – زاجل كمان. حمامكم عينة. عندو (مقصورة) طائرة. ولاعب اسمو (بكري المدينة). بكري المدينة في مباراة القمة تقول عاوز يقرأ (عداد) الكهربة. زي الزول البيسأل من (السوق الشعبي). ضهب شديد. زي الزول البجي الحفلة وبكون ما معزوم. وقت يجيبوا ليه صحن الكوكتيل ..يقعد يتلفت كأنو سارق ليه شيء. يضرب ليك في الصحن اول حاجة (الزيتونة). شفتوا نحن بالخبرة – بنعرف الزول من يبدأ بالزيتونة بنعرفو ما معزوم. جاء ضهب ساكت. اتذكرت. في فرق بسيط شديد. فرق ما بلاحظو اي زول…بين الحمام السوداني والحمام الملاوي. الحمام السوداني (كبير) شوية في السن. حمام عاوز نار شديدة. السن اتقدمت بالحمام السوداني. ايمن سعيد من (الكبر) – ما بتفرزو من (الحكم). سنون ما فيه. سنونو كملت في الاتحاد السكندري ..وجاء ينظر ليكم هنا بدون سنون. زولكم دا بقى بتاع لبن ساكت. سنون ما عندو. يا ربي الحمام الملاوي عندو رئيس مجلس ادارة بعمل نفس الحركات البعمل فيها رئيسكم دا. عندهم رئيس كل (خميس) بقدم استقالته وبيسحبها يوم (الاحد)؟. تقول شغال في الميناء البري. زي الزول البيسافر من العاصمة يوم الخميس العصر وبرجع يوم الاحد الصباح بدري. يا ربي الحمام الملاوي عندهم برضو (بابكر سلك). سلكنا دا حقنا برانا. حق حمامنا دا. غايتو الحمام السوداني بقى بمساعدة (مجدي شمس الدين واسامة عطا المنان) يدخل (المجموعات). السنة دي دخلوا المجموعات غلط. عاوزين يدخلوا المجموعات الافريقية..قاموا دخلوا الدوري الجزائري. كمان الدوري الجزائري فيه جنس خبط. ضرب شديد. زي (حمامة) ناس عيسي ..عاوزة تطلع من (الغرفة) قامت دخلتها. عيسي عاوز يدخلها ..قام طلعها. دا حال جماعتنا ديل – لا عارفين نفسهم برة – ولا عارفين نفسهم جوة. متل الزول البمشي لطبيب الاسنان وبقول ليه يا دكتور ..الشقة دي كلها بتوجعني ..ما عارف الالم في الضرس دا وإلّا الضرس دا؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الجزائرين ديل لو مجدي شمس الدين عندو ليكم طريقة خلوه يطلعكم من المجموعة دي. مجموعتكم دي زي حادث الحركة البقولوا ليك اتوفوا فيه سبعة ..كلهم من بيت واحد. اهل كلهم. او زي الحفلة البقولوا ليك العروس بنت عم العريس ..والفنان خال العريس. قالوا ليك في واحد دخل ليه بيت عزابة …ما عارفو. قال عاوز يسرق ليه حاجة. ان شاءالله شاحن موبايل. الحالة بقت صعبة …الواحد حق الفطور ما عندو. صاحبكم دخل بيت العزابة ..لقى ليك البيت فيه (21) عزابي. كلهم قاعدين ..ومصنقرين يلعبوا في كوتشينتهم. زي شيلسي. ولا جايبين خبر للدنيا. ولا عارفين الانتخابات. يضحكوا في ضحكهم. وحلتهم في النار. والشاي مدور في البيت. الجماعة شافوا ليك الحرامي قاموا ليك فيه. الشال ليه سكين – والشال ليه ساطور – والشال ليه فرار – والشال ليه طورية. اقل واحد شال ليه عكاز. الحرامي عمل (فكيك)..والجماعة جروا ليك وراهو. من شارع لي شارع. الحرامي يكورك الحقوني يا عالم ..يا ناس الحلة ..انا الحرامي. تعالوا اقبضوني. والجماعة وراهو. جري شديد. خلوا الكوتشينة ..وقالوا ما في احسن من نقضى وقتنا بالحرامي دا. نفرق بيه شوية. نكتل بيه الروتين. اصلا هم ما عندهم شغلة …دي بفتشوا ليها تفتيش. عاوزين ليهم (حرامي) يتفشوا فيه. نوع دي ما كانوا بيحلموا بيها. راجيين يفشوا غبينتهم دي من قبل سنوات. الحرامي جاري ..والعزابة جاريين وراهو. سك شديد. الحرامي عاوز يتخارج …اول كبسولة نقطة امن شامل لقاها قدامو ..انقطع ليك فيها. قال اخير لي الشرطة من العزابة ديل. احسن اسلم نفسي…واطلع من المطب دا. ديل لو قبضوه بقطعوه قطيع. بصل المركز ربع كيلو – ربع كيلو. ناس المريخ هسع بقت عليهم نفس الشيء. دخلوا ليهم في (مجموعات) زي نقطة الامن الشامل دا. كبسولة. ما فاهيمن فيها اي حاجة. بعدين تعالوا هنا. حلاقتكم دي ما حلاقة مجموعات. المجموعات دي اسألونا منها نحن. دخلنها 6 مرات. صلحوا مظهركم شوية. ما تفضحونا في المجموعات. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (الجزائرين) ديل ما تمشوا ليهم بدون (كمامات). الظروف ما معروفة. يمكن تكتم. صاحبنا عندو (كلب صيد) ..يفكوا في الخلا ..عشان يجيب ليه (الصيدة)…الكلب يقطع ليه مسافة (3) كيلومترات ويجيه راجع بعد ساعة ونص شايل ليه (فردة نعال). فردة نعال عاوزة ليها (كلب صيد). عينو في (الارنب)…يجي راجع ليه ب (كيس دعاية). كيس الدعاية عاوز ليه (كلب صيد). صاحب الكلب غِلب معاه. ما عرف يعمل معاهو شنو؟. غلبتو عديل كدا. ما عرف يتصرف كيف؟. عندو صاحبو ..قال احسن يشكي ليه. قال ليه تعرف انا عندي (كلب صيد) ما مستفيد منو اي حاجة ..كلب (ماسورة)..بس قاعد لي كدا ياكل ويشرب …(جرادة) ما بصيدها. كلب بتاع ضللة ..قاعد حارس لي (الواتساب). كل ما جرس الرسالة يضرب ..يرفع اضنينو. بس دي الفالح لي فيها. صاحبو قال ليه ..كلبك دا بيشرب لبن؟. قال ليه بيشرب ..كل يوم بقطع ليه تسع ارطال لبن. غير الزبادي. صاحبو قال ليه بياكل لحمة؟. قال ليه …بياكل لحمة في اليوم بضرب ليه (12) كيلو ضان. غير الكبد والكلاوي. صاحبو قال ليه بياكل فراخ؟. قال ليه على الاقل في اليوم بيضرب ليه (6) فرخات. غير (الحمام). بتجيب ليه بيض مسلوق؟. بجيب ليه البيض المسلوق. بيشرب عصائر طبيعية؟. بيشرب. عشان يختصر ليه الموضوع قال ليه انا الكلب دا ..برنامج ترفيهي بعملو ليه. اصلو ما خليت ليه حاجة. اصلا ما قصرت فيه. صاحبو عاين للكلب راقد في المكيف وقال ليه ..اسمع انا نص الحاجات البتعملها للكلب دا لو لقيتها (اسد) اجيبو ليك – تقول لي (كيس دعاية). كلبك دا والله كلب مفتري ساكت. انت ما فاضل ليك إلّا تجيب ليه (الترحيل). وتسجلو في مدرسة خاصة. بعدين انت وقت بتعمل ليه الحاجات دي كلها ..البخليه يجري ليه ورا (ارنب) شنو؟. يا زول اقول ليك حاجة ..انت لو زول صيد ..احسن ليك اتخارج من الكلب دا وجيب ليك بندقية صيد عادية كدا. بندقية صيد (طلب فول) ما بتكلفك ليه. كلبك دا (النبلة) احسن منو؟. زولكم اتخارج من الكلب ..وجاب ليه (بندقية صيد). شال بندقيتو وطلع الخلا. اول ارنب قابلتو اطلق عليها (13) رصاصة. الرصاص ما عمل اي شيء للارنب. الارنب قعدت تضحك عليه ..قالت ليه لو دا (رصاصك) احسن ليك (الكلب). الرصاصات طلعت (فشنك). زي الرصاصات الملاوية. الرصاصات الملاوية شنو؟..نحن ماشيين بعيد ليه؟…الرصاصات السودانية دي هسع فرقها شنو من الرصاصات الملاوية. عندنا (رصاصات)..عينا في الطيارات تجي وتفوت فينا ..ويقولوا لينا دي (اجسام غريبة) ساكت. مالنا نحن؟..ما بنعرف الاجسام الغريبة. يقولوا ليك استعدينا للخريف. اول مطرة ما عندهم لينا اكتر من (جعلها الله امطار خير وبركة). انتوا امطار الخير والبركة عملتوا ليها شنو؟. الله قالوا اعملوا ..واجتهدوا. عاوزين السماء البتجيب ليكم المطر تجففها ليكم ..وتشطفها ليكم من الشوارع. والله فالحين. طيب انتوا جايبنكم لي شنو؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس السنة دي لو دي استعدادكم للخريف ..احسن ليكم (الجزائريين). شوفوا ليكم داخلية في الجزائر واقعدوا فيها. بدل تسافروا وتجوا في الشهر مرتين. يوم داك ناس عزالدين جاهم (حرامي) رصصوه ب (51) طلقة. الحرامي بعد الواحد وخمسين طلقة دي ..دخل غرفة النوم شال (الدهب) وتلفون جلاكسي بتاع (المرا)..وريبكا بتاع الراجل. ليه تلفون (المرا) دائما بكون (جلاكسي)؟. والراجل تلفونو دائما بكون (ريبكا). ليه التفرقة العنصرية البتحصل في التلفونات دي. شفتو الراجل من تلقوا تلفونو (تلاتين عشرة) ..والمرا تلفونها (جلاكسي)..اعرفو الكلمة في يد الزوجة. والراجل مهمتو بس يجيب المرتب اول الشهر يسلمو للزوجة بكل تفان واخلاص. وما يتكلم كتير. شابكننا الرصاصات فشنك. انتوا طلعتوا برضو فشنك. ما شفنا ليكم اي حاجة. غير طولة اللسان. اي فريق لعبنا امامه قالوا (حمام). ونحن (الحمام) واجهنا الاحد الماضي. نحن بنقول الهلال ..ليس عندو اشكاليات. وفيه نواقص. ولسع الحال ما عاجبنا. انتوا مالكم؟. ما قلتوا ضربتوا الترجي. ما لكم في استاد الهلال قاعدين تتلفتوا متل الزول المنتظر (الزلابية)؟. يا سلك لو دا فريقكم ..احسن تنزلوا الكونفدرالية. المجموعات بي حمامكم دا – لا بتقدروا عليها ولا حاجة. زولكم دا هسع ينضغط ..بقوم يقدم استقالتو. يمين بعد (وليد الشعلة) دا – مفروض ساعة ما يقعد. البقعدو شنو؟. احسن ليه يتخارج قبل الدورة التانية. نحن الدورة التانية …شيلسي ما بثبتنا. ……………. و بكري المدينة رجع للقراية تاني؟. مالها كورتو فكت كدا. الزول دا كان لاعب …لكن كان زي الموقوف. …… السيدة (ل) لمن تكوني عاوزة تقولوا شيء ..ما تقولوا حاجة ..بتجيبي لينا (المطر) ساكت. ونحن شوارعنا دي كعبة. وقلوبنا ذاتها بقت اكعب منها. وقرّض على كدا.
