محمد عبد الماجد دق الدلجة اندرزينهو (الليبرو) بفكو ليكم (7) باكات زايد (لقاط كور) اعلام المريخ اول حاجة شكك في (اندرزينهو)..قالوا الزول دا ما بجي. إلّا اذا (السودان) انضم لاتحاد الدول الاوروبية. اندرزينهو بي (فرقتو الموسيقية) دي معقولة يجي يلعب في السودان. اصلو ما بجي. ملأوا الجرايد كلام بالشكل دا. وقعدوا مع (ضفر وامير كمال)..قالوا ليهم ما تشيلوا هم. معقولة البعمل فيه (نيمار) في الدوري الاسباني يجي (اندرزينهو) ويعملوا في الدوري السوداني. انتوا جنيتوا. انتوا ما عندكم رأس. ضفر اقتنع. ضفر مسكين. اي حاجة بتقنعو ليكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس يا ضفر البسمع بيك بعد ايام تشكي من (الرباط الصليبي) ما كضب. اليوم التاني (اندرزينهو) وصل ليك البلد. وصل عديل كدا. الجماعة قالوا احسن ما يطقوا الكواريك. احسن يثبتوا. الجرسة بدري عليها. الناس في فترة اعدادية. قعدوا ليك مع ضفر وامير كمال والريح علي وعلي جعفر ..قالوا ليهم الزول دا (السيستم) بقفل ليهو. برفضو السيستم. السيستم بقول ليهم ما في برازيلي بالمواصفات دي ممكن يلعب في الدوري السوداني. السيستم ح يقول ليهم انتوا جنيتوا؟. انتوا ما عندكم رأس؟. جايبين لي (حاوي)..وتقولوا لي لاعب كورة. جايبين لي ميسي. انتوا ما عندكم رأس؟. السيستم ح يرفضو. وح يقول ليهم كمان ..(ضفر) لا بقدر على (المجابدة) دي ولا حاجة. ولا عندو (ضرس) بيستحمل الحاجات دي. كمان نحن ما بنعرف (السيستم) بتاعنا. سيستمنا دا شغال بالهبابة. زي نار الحطب لو ما هبوه ما بيشتغل. ضفر سمع ليك كلام اعلام المريخ ..قال ما في مشكلة ..وقت (السيستم) بقدر حالتنا – ما في عوجة. لكن ضفر قال ليهم في نفس الوقت ..الزول دا لو (السيستم) ما ثبتو ليكم – نحن لا بنقدر نثبتو ولا حاجة. شوفوا ليكم طريقة مع (السيستم) عشان يرفضو. نحن (سيستمنا) محمد عبدالرحمن ما بقدر عليه. الشيء الحصل – السيستم قبل ليك اندرزينهو. السيستم ما قال اي حاجة. المريخاب غلبتهم القعدة. الموضوع وقت اتجاوز (السيستم)..قلبهم طار. وضفر قال ليهم اعيروني للرابطة كوستي – انا لا بقعد ليكم في البلد دي ولا حاجة. ناس الهلال جابوا ليهم (برازيلي) الليبرو البدخل عليه بفكوا زي الخمسين جنيه. الليبرو بفكو (7) باكات ومعاه زيادة (لقاط كور). الارتكاز بفكوا ليكم (3) حراس مرمي مع دستة كبابي. زول صعب. نوع دا ناس ضفر ديل لو ما جهزوا ليهم اربعة صور باسبورت ولا يدخلوا عليه. ويفحصوا الدم. ويشوفوا الوزن. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (السيستم) ما قصر معانا. اصلو ما قصر. المريخاب حاولوا يقنعوا نفسهم. حاولوا يقنعوا امير كمال وضفر وعلاءالدين يوسف وعلي جعفر والريح علي وعنبكة المشى هلال الابيض. قالوا ليهم الزول دا (كرتو) ما بصل. اقعدوا ساي. نوموا قفا. تسجيل اندرزينهو دا ما بكتمل ..ما تخافوا. ضفر قال ليهم قلتوا كدا – لو الكرت ما بصل نحن ما عندنا اي مشكلة – بنلعب كورتنا. لكن كمان لو الكرت وصل ..لا بنقعد ليكم في البلد دي ولا حاجة. بنتخارج عديل كدا. المريخاب قالوا ليه ما في مشكلة. اصلو ما في عوجة. اليوم التاني الكرت وصل. انا ذاتي استغربت. قلت (الكاردينال) دا مالو مستعجل كدا. الزول دا كان يعطي اعلام المريخ فرصة. يخليهم ينقوا شوية. بعدين كرت يصل يوم الجمعة دي انا ذاتي ما سمعت بيه. دا إلّا كرت عقد – البجي يوم الجمعة. المهم الكرت وصل. والعملية اكتملت على اكمل وجه ..وضفر انهارت اعصابه. وعلاءالدين دخل في حالة عجيبة. وامير كمال قال ليهم ما بعيد تسجيلي. انتوا جنيتوا. والياسو قال الله شافنا ..الحمدلله السيستم رفضني. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس الياسو دي قصتو غريبة يعملوا ليه (12) كشف طبي ويرفضو (السيستم). اعلام المريخ – ماشه عليهم مجموعات – وهم جديدين في الشغلة دي. قالوا يكضبوا شوية. يثبتوا ضفر بي اي طريقة. عارفنهم عملوا شنو؟. قالوا اندرزينهو عمرو (45) سنة. عاوزين يعملوا الموضوع زي حكاية الشركة الصينية. الشركة القالوا شركة بتاعة بزازات ومرايل. يا جماعة الزول وقت يكضب ..يكضب بي عقل. يقول ليه حاجة تصدق. انتوا بي كلامكم دا. بي العمر القطعتوه من رأسكم ريحتونا ذاتو من الكتابة في الموضوع. كضبتكم دي المريخاب بضحكوا فيها. خلوهم الهلالاب. الغريبة اعلام المريخ ..قالوا ان مرتب اندرزينهو (80) مليون جنيه. وقالوا في نفس الوقت ان عمرو (45) سنة. قالوا ليكم نحن الزول دا جايبنو (طبيب). بعدين الزول دا ما تكتبو فيه كلمة كعبة. ما تهاجموه ساكت.. اندرزينهو دا بعد (14) سنة ح تجيبوه المريخ. يعني لو قلتوا الآن عمرو (45) سنة ..فذلك يعني انكم لمن تجيبوه عمرو ح يكون (59) سنة. واكيد انتوا ما جايبنو (مدير فني). غايتو بي سنكم البتروجوا ليها دي ..لو جبتوا اندرزينهو بعد (14) سنة إلّا تجيبوه (رئيس نادي). عشان كدا ما تخربوا لي نفسكم ساكت. الزول دا لعاب ..وبعمل في حاجات بتشيل (اللوز) طوالي. ما تخسروه ساكت. اندرزينهو دا دخلنا (اليوتيوب) قلنا نشوف الحاصل شنو؟..لقينا المريخاب ليهم حق. ليكم حق تكضبوا. والياسو الله شافو لمن رفضو السيستم. وعنكبة ..الله بريدو ..مشى هلال الابيض. الزول دا لا بتصاقع ولا حاجة. ولا بتمسك. دا زول ما عادي .. ليكم علي يا مريخاب التسجيلات القادمة تشطبوا ليكم (19) لاعب. وتجيبوا جمال الثعلب وطارق احمد ادم ومجدي مرجان وصلاح دوشكا. اندرزينهو دا بي ناس ضفر لا بتسمك ولا حاجة. وانت يا امير كمال – عاوز اقول ليكم حاجة ال (3) مليار التى رفضتها الآن بعد اندرزينهو (50) مليون ما بتلقاها منها. الزول دا صعب شديد. كشافاتكم دي لو قعدت ليكم – بتكون ما قصرت. وجمال الوالي احسن ليه من بدري يقدم استقالتو. ويتخارج. اندرزينهو دا لا بقعدوا معاه ولا حاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس جمال الوالي لو قال ليكم بعد اسبوع عاوز استقيل ..خليكم عارفين السبب شنو؟. ………… و بستغرب ناس الثعلب والصيني ما في المنتخب الاولمبي ليه؟. المنتخب امس كان فاقد الزول البجيب قون. الديبة قعد ينظر. ومحسن سيد عاوز يظهر ساكت. واقف قصاد الكاميرا. والله انت يا محسن سيد ..غارزيتو ما غلطان عليك. مشاكل غارزيتو بدأت. مجلس المريج جهّز صداماتو مع غارزيتو. مجلس المريخ سجل بتقرير فني طالع من اعلام المريخ. خلاص انتوا وقت بتسجلوا ..امسكوا التيم. قال شنو؟. قال تراوري عمل مؤتمر صحفي اعتذر فيه لي غارزيتو. انتوا قايلين غارزيتو دا طيب للدرجة دي. انتوا كمان ما بتعرفوا غارزيتو. ……….. السيدة (ل)..امس في (13) حرف وقعوا من الجملة الاخيرة ..ما عارفهم مشوا وين؟. ان شاءالله الجملة تكون ليك واضحة بعد كدا. وقرّض على كدا.