محمد عبد الماجد دق الدلجة وقت بتعرفوا (انجليزي) قدر دا – لوزان لزومها شنو؟ فجأة بدون مقدمات. وبدون مناسبة. ونحن قاعدين نتفرج. قاعدين ساكت. ولا في بالنا. ولا مفكرين في الموضوع. جاء في صحيفة الصدى امس : (كشف مولانا عبد العزيز شروني عن تعديلات جديدة في لائحة لجنة شئون اللاعبين غير الهواة بناءً على المنشورات التي وصلت لاتحاد كرة القدم من لجنة شئون اللاعبين غير الهواة بالفيفا وبالتالي سيتم التعديل حتى تكون اللوائح التي نعمل بها مُطابقة لتلك الصادرة من الفيفا ووعد بأن تقوم اللجنة بعمل كبير من أجل تنفيذ تلك التعديلات في أقرب وقتٍ ممكن). شفتوا الزول دا قال شنو؟. قال التعديلات سوف تكون بناء على المنشورات التى وصلت لاتحاد كرة القدم. يعني في (منشورات) وصلت. بكري المدينة هسع تلقوا قلبو وقف. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (السكر) طار السماء. والخبر بقول : ( وأقر شروني بأن هناك العديد من السلبيات في اللائحة التي تعمل بها اللجنة ولذلك استدعى الأمر إدخال تعديلات جديدة ستنهي تلك السلبيات وستحدث المُطابقة المطلوبة مع لائحة الاتحاد الدولي لكرة القدم). شوفوا الناس الما بخجلوا ديل. قالوا شنو؟. قالوا هناك سلبيات في اللائحة. كمان جابت ليها (سلبيات). شفتوا الاعترافات دي كيف؟. عملوها (سلبيات) عديل كدا. طيب دا ما كلام ناس الهلال ذاتو. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس السخانة دي لو جات في رمضان في ناس بفطروا في اذان الضهر. من بدري – بدري. ( وأبان شروني أن أبرز تعديل ستعتمده لجنة شئون اللاعبين غير الهواة هو اعتماد العقود الموقّعة بين اللاعبين والأندية قبل ستة أشهر من انطلاقة فترة التسجيلات ويترتب على هذه الخطوة أن النادي الذي لديه لاعب لم تنته فترته يمكن أن يتفق معه وأن يتعاقد معه تعاقداً رسمياً ومعتمداً يلزمه بإمضاء فترة جديدة مع النادي بحيث يتم تقديم العقد الموقّع بين الطرفين لاتحاد الكرة بغرض اعتماده وتوثيقه وهو نص معمول به في العديد من الاتحادات الوطنية ويتوقع أن تسهم هذه الخطوة في احتواء العديد من المشاكل التي كانت تنشب بين الأندية واللاعبين بسبب عدم الزامية العقود الموقّعة خارج اتحاد كرة القدم على غرار العقد الذي وقّعه الهلال مع بكري المدينة ولم يحرم اللاعب من التوقيع للمريخ). الكلام دا هو ما جاء في صحيفة (الصدى) امس وتداولته مواقع التواصل الاجتماعية والمواقع الالكترونية. الى الآن ما دخلت ايدي في الموضوع. ولا علقت. ولا قلت حاجة…غير من فوق لي فوق. بهبش ساكت. وان كان الامر لفتني الى غرابته الاخ (حسن فاروق) الذي لا بد من ان يتناوله اليوم من منطلق قانوني ، ومن وجهة نظره الخاصة التى نتفق معه فيها في غرابة ما صدر من الاتحاد العام. انا ما عاوز اقول حاجة. ما عاوز اعلق. ولا عاوز اقول الحاصل شنو؟. ولا عاوز اجيب سيرة لقطوعات الكهرباء. ولا قطوعات الموية. وما عاوز اقول اي شيء. بس عاوز اقعد كدا. ما عاوز اجيب سيرة. مالكم انتوا؟. ما عاوز اقول حاجة. عاوز اعرض ليكم الموضوع …وانتوا بي معرفتكم. بي طريقتكم. بي فهمكم …فسروا لي الحاصل دا. قولوا لي رأيكم. انا خلوني. انتوا رايكم شنو؟. قال شنو؟. شروني قال : (أبرز تعديل ستعتمده لجنة شئون اللاعبين غير الهواة هو اعتماد العقود الموقّعة بين اللاعبين والأندية قبل ستة أشهر من انطلاقة فترة التسجيلات ويترتب على هذه الخطوة أن النادي الذي لديه لاعب لم تنته فترته يمكن أن يتفق معه وأن يتعاقد معه تعاقداً رسمياً ومعتمداً يلزمه بإمضاء فترة جديدة مع النادي بحيث يتم تقديم العقد الموقّع بين الطرفين لاتحاد الكرة بغرض اعتماده وتوثيقه). يا ولاد الايه. طيب لوزان لزومها شنو؟. المحامي السويسري ليه؟. الخسارة في داعي ليها. وقت انتوا عارفين كدا. وقت انتوا فاهمين الكلام دا ..بتجرجوا فينا ليه؟. دا الكلام الذي يطالب به الهلال. انتوا لو وصلتوا للحتة دي – يبقى ما في داعي للخلاف. وقت بتعرفوا قدر دا – الغلاط في شنو؟. ما في لازمة للمحكمة الرياضية. القرار الذي اصدره الاتحاد – او الذي قصد ان يمرره للاعلام يؤكد ان موقف الهلال القانوني في قضية بكري المدينة سليم. ويثبت ان الهلال اجبر الاتحاد العام على تغيير قواعده ولوائحه التى لا تتوافق مع لوائح الاتحاد الدولي لكورة القدم. وهذا نجاح يكتب لمجلس الهلال ..وصراع قانوني يثبت ان الغلبة فيه كانت للهلال. ولا غرابة في ذلك ..فقد كان للهلال الفضل في الكثير من تشريعات الاتحاد ومن لوائحه. وكم كان للهلال من مجادلات قانونية ومساجلات قضائية ..كسبها الهلال واجبر الاتحاد العام على التوافق مع الهلال توافقا مع القانون. تصعيد الهلال لقضية بكري المدينة ..اوضح ان الاتحاد يتبع نهجا غير قانوني فيما يتمثل في اشتراطه ان يكون التعاقد داخل مكاتب الاتحاد العام. وهذا امر اسقطته اللوائح الدولية وجعلت قوة العقد في بنوده (الزمنية) وليس (المكانية). الكلام يا دوب وقع لي جماعتك. الاتحاد العام ما كان سوف يستجيب لتبديل لوائحه لتتوافق مع لوائح الاتحاد الدولي لو لم يكن الاتحاد العام مجبرا على ذلك. الراجح ان اتحاد كورة القدم السوداني وصلته اموار او قرارات من الاتحاد الدولي جعله يمرر القرار بهذه الصورة للاعلام. شروني قال في منشورات وصلت في هذا الموضوع. وقد يكون الاتحاد العام استلم قرار من المحكمة الرياضية وقصد ان يسبق الاعلان عن القرار بهذا التعديل حتى لا يظهر الاتحاد السوداني في صورة المنهزم والمنكسر امام الهلال. علما ان قضية الهلال ضد بكري المدينة ..هي قضية ذات ثلاثة ابعاد. الطرف الاول هو بكري المدينة نفسه الذي وقع عقدا مع الهلال واستلم مقدم عقد من الهلال وذهب بعد ذلك للتوقيع في كشوفات المريخ. الطرف الثاني هو فريق المريخ الذي تعاقد مع لاعب يعلم بتعاقده بعد نشر الخبر والصور في الصحف قبل تعاقد المريخ مع اللاعب. بل المريخ يعلم حتى بمقدم العقد الذي استلمه من اللاعب وقام بايداعه في خزينة الاتحاد العام. الطرف الثالث هو الاتحاد العام نفسه الذي تخالف لوائحه وقواعده لوائح وقواعد الاتحاد الدولي. لذلك فان انتصار الهلال في هذه القضية هو انتصار على ثلاثة اطراف. قرار الاتحاد السوداني باعتماد العقود التى توقع مع اللاعبين خارج مكاتب الاتحاد العام هو انتصار قانوني واضح للهلال. ولا في كلام. وان كان الاتحاد العام حاول التزاكي والتلاعب من خلال تمرير القرار عبر صحيفة الصدى ذات المويل الحمراء حتى يفقد القرار اثاره وبعده القانوني الداعم لموقف الهلال. فاكرين الموضوع بفوت على ناس الهلال. الحصل دا هزيمة للاتحاد العام. وهزيمة للمريخ. وانتصار لا يقبل التشكيك للهلال. انتوا وقت غلط – ما تقولوا الهلال صاح. ما تعترفوا. الغلاط في شنو؟. في داعي للفة الطويلة دي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس رمضان السنة دي ان شاءالله يكون فيه (جمعة) واحدة – مع الجمع الطويلة دي. ………… و الهلال مفروض بعد كدا يرجع من تونس. مفروض يرجعو. الجماعة ديل عملوا اي شيء. ما خلوا حاجة. وناس المريخ يا دوب بتجمعوا. يا دوب ببترقبوا في وصول المحترفين. نحمدك يا رب. الاعداد مية المية. الهلال ح يرجع غير من تونس. الممتاز ح يبدأ يوم 11 يونيو. طيب ناس المريخ ماشيين تونس بعد كدا لي شنو؟. ما في داعي. خسائر (تذاكر) ساكت. اصلا انتوا ما عندكم قروش. سيلا قبل ضمه للكشف الافريقي ..احسن تعملوا ليه كشف طبي. عشان ما تتمقلبوا ساكت. الزول دا جابوه الاتحاد العام نائم. ……….. السيدة (ل) الجروح لو 100 ما في مشكلة لو بقت 101. وقرّض على كدا.