من هنا وهناك هيثم صديق افطروا لانهم علي (صفر) !! برشلونة يلعب متنكرا خلونا نتكلم عن الكان لما صاحبي ضرب لي وقال :اول مرة اشجع البرشا قلت ليه ده المريخ حلف بالتقطعو انو دي برشلونة خلوه صاحبي ده في واحد قال لي قلت لاولادي وقفوا البلي استيشن وشغلوا لينا كورة المريخ قالوا ليه دي كورة المريخ ما صدقهم الا طلعوا الايادي برة والايادي جوة الاستاد كانت بتولع نار اطول صفقة في الملاعب الفنانة تقول الصفقة وين في الحفلة في استاد المريخ تقول (الراحة وين) واحد كان بيرد علي التلفون وهو ماسك التلفون بكراعو قلت ليه ده شنو ده قال لي يديني شغالات صفقة حلفت عليه يوقف واحدة بقي يصفق بيدو و(كضمو) كفت نفسو كفيت ما لقاه حرامي في مولد ولا …الهلال امام الترجي ومازيمبي انا قلت الحاصل شنو علي انريكي مدرب البرشلونا مالو عجز كده؟ طلع غارزيتو غارزيتو المعلم الغلب العلمة قال ليها يلا بلا ع(لمة) غايتو المابشجع المريخ في البلد دي مفروض يفحصوه يعقربوه شفتو العقرب اول امس شكر(ن) كاردينال رأفت الهجان بتاع المريخ الحمد لله العم (شبشة) قاعد معاهم اهو يعوض مغسة (العقرب) العم (شبشة) ده والله بأثرني من زمن فوراوي قاعد لحد زمن الكاردينال ما شاف عرض زي بتاع اول امس ولا انتصار زي اللي كان داعش يوم الجمعة ضربت تونس وداعس دعس الجزائر اريتو لو المريخ بتقسم ديديه الله عليه الزول ده بيتمركز تمركز صاح وحريف حرفنة ما حقت نصاح و ضفر حاجة تانية بقي صانع العاب شاط ليه كورة دقت في كيبي اقصد في الماسورة لعبها بطريقة تناول بلحة الافطار لما تشيلها بكل هدوء وتدعو بكل خشوع وتمضغها بكل فن وجابسون كلام تاني طول زي الطول وعرض ولا عرض المريخ امام العلمة مباراة انتهت في ربع ساعة من المتعة ما حسينا بالزمن وناس العلمة انتهوا..انتظروا الاجتياح غايتو انا شعرت بالارتياح وانتظرت الاجتياح قالوا قاقرين الجزائري دخل بين الشوطين الدبلوماسية دي خربت علينا متعتنا ياخي نحن اتمتعنا متعة اول مرة اشوف لي مباراة كل المعلقين والضيوف ومقدم البرنامج بيمدحوا في فريق واحد سمعت ابو عركي يغني تصحي العقارب في الشوارع قلت لواحد جنبي انت مش المفروض تصحي (الكهارب) قال لي كانت كده لكن عدلوها وثلاث نقاط تحت الاباط تأبط المريخ نقاطا قالوا الوفاق واتحاد العاصمة يرجفو ساي نحن البنشجع الزعيم رجفنا قلنا هسي لو ده مافريقنا ما كان تعبنا امس واحد قال لي ناس الهلال ديل امس فطروا بياتو رخصة قلت ليهم كانوا علي (صفر) الدماعة فرحانين بالتعادل فرحة الود الانقذوه من الغرق اوع تقولوا لي ما سمعنا بالقصة ديك شخصيا ما حا اقدر احكيها هنا لا رمضان ولا المكان بيسمحوا الخلاصة مجموعة الحمام غريبة خلاص مجموعة افلام محمد سعد بس عوكل واللمبي وما شاكل مازيمبي سمع انه ناس الهلال جنهم درون درن ليهم فريق بتاع قسام بس النس النس اغرب حاجة الكاردينال يخرج غاضبا لتعادل الهلال في الدوري مع اهلي شندي كلو من اهل شندي و بغلة عبد الخير نهاية سباقها معروف