� في السلك بابكر سلك قلعة كردنه *ايها الناس *الحرب التي يشنها الاعلام الازرق طيلة طلطاشر سنه علي جيمي *ماحرب نصاح *وماحرب ساي *حرب لاغراض كيديه *وقيام الاعلام الازرق بفتح صفحاته لمعارضي جيمي *ماساي *لكن صاحب العقل بميز *هي في حقيقتها اعتراف وقناعه من الاعلام الازرق بقوة الرجل *وقوة المريخ في عهد الرجل *وامكانية تحقيق المعجزات اذا استمر الرجل *ايها الناس *كان الاعلام الازرق يسخر من هتاف الجماهير الحمراء *جمال الوالي رئيس طوالي *والآن يكتب الاعلام الازرق قلعة كردنه *سمعتوا ليكم زول قال قلعة جمال ؟؟؟ *برغم الطوابق التي حسدوها وكسروها وتاني قامت *والكشافات نور طويل وقصير *وبرغم المقصوره *جمال زاتو بقول القلعه الحمراء *لاننا في المريخ لا نجعل رجل اكبر من الكيان *ولكن في الهلال *حفرتين لسه سيخهم ماطلع *شبكونا ليك قلعة الكاردينال *الفرق كبير بين الكيانات *ايها الناس *الليله نجي كلنا *لنشكر اولاد غرزه علي ماقدموه يوم العلمه *اولاد البروف غرزه *لنؤكد علو كعبنا *لنؤكد صدارتنا وجدارتنا *ايها الناس *الممتاز والاميره الافريقيه *قطبان سكك حديديه *بمشي عليها قطر واحد *قطر احمر يجر من خلفه العربات *وافريقيا نحن بطل المجموعتين *بدون منازع ولا مشارك *وافريقيا نحن الآن في شارع المك نمر *داخلين علي شارع افريقيا *شارع افريقيا اسمو *واسمو برضو شارع المطار *شارعنا وحافظنو كويس *نجي كلنا *لنحسب الباصات *الجماعه ديل بغالطونا *يوم العلمه لعبنا خمسه وتمنين باص *قالوا ما خمسه وتمنين *قالوا اربعه وتمنين بس *عشان ما يغالطونا *نجي ونحسب بالصوت العالي *واحد , اتنين تلاته , اربعه *سبعين واحد وسبعين *تمنين واحد وتمنين *تسعين *لما نصل تسعه وتسعين *تاني مانعد *بل نهتف *قولولو ماشاء الله *ماشاء الله ماشاء الله *غالاطين خلاص ناس محمد عبدالماجد ديل *ياخ ديل متبوا الشعب يريد اخراج الشغيل *الليله البكتبوهوا عن الشغيل ماعندو علاقه بي كتاباتهم السابقه *وبكره لما يرجع الشغيل لي ناسو *حايرجعوا لي الشعب يريد اخراج الشغيل *المهم *امل عطبره قال زعلان من التأجيل *ورونا زعلكم ده بكره *مع العلم بان موقف الامل لايتحمل اي خساره *الامل لو نزل *تاني الدولار مابرفعوا *والطاهر حماد قالوا زعلان شديد *والطاهر لما يزعل شديد *بشوت شديد *المهم *دايرين نغير اسم القلعه الحمراء *مادايرين نسميها قلعة جمال *حانسميها الميناء البري *باصات قدر ده ما ميناء كيف بس ؟؟؟ *ايها الناس *جهود الجماهير والمحبين والانصار كبيره *يجب ان تستمر كذلك *لان ريحة المطار فاحت *وعمت القري والحضر *ايها الناس *جماهير المريخ مبدعه *ومن ابداعاتها *شفوت المناقل اطلقوا علي الشارع بتاع جامع الفكي علي الماحي *اسم شارع العقرب *المناقل كلها اسي بتقول شارع العقرب *بتاع الركشه لو ماقلت ليهو شارع العقرب ما بوصلك *ونحنا زاتنا هنا *سمينا شارع العرضه شارع العقرب *واتعقربي *ايها الناس *الليله كلنا من عصرا بدري *بس داير اذكركم *ابو الهل لما غلب مازيمبي في الكنفغو *مازيمبي غلب ابو الهل هنا خمسه *مازيمبي بالكنغولي يعني عربية الجاز *بتسخن لي قدام *ايها الناس *كلنا خلف الكيان *حتي نتخطي آخر جزائري *خلف الكيان حتي نطير مازيمبي *خلف الكيان حتي نلقن وفاق سطيف في النهائي درسا عقربيا كبيرا *والكاس كاسنا ونحنا اهلو ونستاهلو *ايها الناس *بطل المجموعتين اليوم يوعدنا بسهره رمضانيه رائعه *ماتفوتكم *وماتنسوا تعدوا *لما تصلوا تسعه وتسعين *قولولو ماشاء الله *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *رمضان دخل علينا *باقيهو ده يا تأجزوا لينا *يا تتهجدوا لينا يا والينا سلك كهربا ننساك كيف ورمضان دخل العضم وريحة المطار دخلت الخياشيم والي لقاء سلك
