محمد عبد الماجد دق الدلجة الكوكي قلبو قوي ربع الساعة الاول كلها في المباراة وانا ما فاهم شيء. قلت النسور لاعب مع منو؟…هلال الابيض؟. بسأل. الاسماء دي غريبة علي…لا شفتها – لا سمعت بيها. دا هلال الفاشر؟. قالوا لي ابدا. هلال كادوقلي …ما بعرف واحد اسم واحد فيهم. انتوا الناس ديل بتجيبوهم من وين؟. الظاهر قطوعات الكهرباء الكتيرة بقتنا ما بنعرف اسماء لاعبي الهلال. بعد مرور تلت ساعة من عمر المباراة قلت ليهم (الفن) البعملوا فيه الاولاد دا ما غريب عليّ. طوالي رفعت ليك السقف. قلت ليهم دا ريال مدريد؟. اصلو دا ما شغل هلال الابيض او الفاشر. قالوا لي ريال مدريد البيجيبو استاد الخرطوم شنو؟. طيب مالكم يا جماعة عاوزين تلخبطوني. دي برشلونة؟. قعدت انقر في الاسماء ما عارف اي حاجة. انيستا. دي حركات ميسي. ودا نيمار ذاتو. قالوا لي ابدا – ما في كلام زي دا. شفت ليك (بشه) بعمل في حاجات – طلاب (الهندسة) في (اللاب) ما قاعدين يعملوها. قلت دا سواريز. رجعت تاني. قلت ليهم (بشه) دا مالو بقى قصيّر كدا؟ – المجموعات كمان بتقصر الزول. يكون بشه قصر من الجري الكتير. قالوا لي دا ما بشه الكبير – قالوا لي دا بشه الصغير. قلت ليهم هو الهلال عندو بشه تاني غير بشه البجيب في اي مباراة قمة هدف في المريخ. قالوا لي دا بشه الصغير بلعب في الرديف. قلت ليهم انتوا المريخاب ديل يوم بتكتلوا ليكم فيهم واحد بي (بشه). هم بشه الكبير – فهمو ليه شنو؟..عشان تجيبوا ليهم (بشه 2015م). والله اكون صريح معاكم ..(بشاتكم) كترت يا ناس الهلال. الجماعة ديل لا بستحملوا ليكم (بشاتكم) الكتيرة دي ولا حاجة. وناس اسامة عطا المنان احتمال ذاتو يقولوا ليكم بشه واحد كفاية. المباراة بدأت تقع لي. قلت ليهم الزول اللابس (7) دا منو ؟..البتجاري في الناس وبعمل في حاجات زي (حصة الفنون الجميلة). قالوا لي دا (الثعلب). قلت ليهم الثعلب رجع يلعب تاني – الزول دا موش قلتوا في (امريكا) الرجعو شنو؟. بعدين الثعلب البنعرفو كان بلعب (مدافع)..وثعلبكم (الشفت) دا بلعب (هجوم). وبجيب في الاقوان متل (الرغيف). قالوا دي ثعلب جديد ..اسمو صهيب (الثعلب). قلت ليهم اول مرة اشوف لي (صهيب) ثلعب. الزول دا مالو بتثعلب كدا؟. صنقعت فوق كدا ..ثعلبكم جاب ليه قون –ما بجيبو إلّا (ثعلب). الزول دا فعلا (ثعلب). لكن ناس الهلال ديل بجيبوا (الثعالب) ديل من وين؟. ثعلب واحد كان موقف ليك الخرطوم دي على فد كراع – كمان جايبين ليكم (ثعلب) تاني. ومهاجم. شربت لي كباية شاي ..(الاسماء) ما نزلت لي لغاية الآن. الثعلب تاني جاب ليه (قون). قلت ليهم والله البعمل فيها الثعلب دا – الثعلب البي جد – جد ما بعملو. معقولة (ثعلب) من اول مباراة كدا يجيب ليه قونين. الشوط الاول انتهى… رجعت تاني اسأل ..قلت ليهم الزول الطويل البخرب في الكورة دا منو؟. اي كورة قاطعها. ما بخلي ليه زول يفوت. قالوا لي دا (الصيني). الصيني ياتو؟..خالد؟. قالوا لي ابدا ..دي عماد الصيني. قلت ليهم عماد بقى (صيني). يعني يا جماعة (شغيل) واحد ..قاطع الموية والنور ..تجيبوا ليكم (شغيل) تاني عشان يقطع (الهوا). غايتو الهلالاب ديل بحبوا المشاكل. بفتشوا ليها فتيش. في زول كدا بتجاري قدام ..بثبت وبلعب ..وبطلع من التسلل. سألتو منو؟. قالوا لي دا (الشعلة). وضعت ايدي في رأسي. قلت ليهم الشعلة تاني رجع. قالوا لي ابدا دا ما الشعلة القاصدو انت دا شعلة جديد. والشعلة الجديد دا جابو من وين؟. قالوا لي دا جابوه من الاهلي الخرطوم. والله دا لو جابوه من الاهلي الخرطوم – ناس المريخ ليهم حق يعملوا ليهم مشكلة مع ناس الاهلي الخرطوم. الحاجة الما قدرت استوعبها – ناس الهلال جابوا ليهم طرف شمال اسمو (محمود محمد)..الزول دا لو ما كان لابس (3) كنت قلت (تنقا). حركات تنقا ذاتها ..نفس (اللفت). الهلال رجع لينا هلال 87 لكن بي اعمار لم تتجاوز ال (19) سنة. عليه يا جماعة نحن سوف نضع ليكم (بورصة) تسجيلات المريخ في الاعوام القادمة. نشرح ليكم الحكاية. ونكون واضحين معاكم. ما تخجلوا يا مريخاب – الموضوع ما فيه اي حاجة. المريخ بعد 21 سنة سوف يسجلوا صهيب الثعلب. بنتظروه (21) سنة – جمال الوالي بالو طويل ..وما وراهو حاجة. ح يقعد ينتظر صهيب الثعلب (21) سنة. بعد 23 سنة سوف تسجلوا اطهر الطاهر. محمود محمد سوف يتسجل في المريخ بعد (19) سنة. بشه الصغير بعد (22) سنة ح تشوفوه في المريخ. انتوا قايلين سنين الزمن دا سنين – والله ال (22) سنة تجري زي الحلاوة. وليد الشعلة بعد (20) سنة في المريخ. عماد الصيني عاوز ليه (17) سنة عشان يكون في المريخ. معتصم (20) سنة. الجماعة ديل صغار يا مريخاب ..اصلو لو ما لعبوا عشرين سنة في الهلال ما بنفك لينا لاعب فيهم. لكن يا جماعة بي امانة كدا – الكوكي دا قلبو قوي. والله دي مدرب (روسي) ما بعملها. البعمل فيه الكوكي دا ..الروس ما بعملوه. معقولة في مدرب بلعب امام النسور في مباراة رسمية وفي استاد الخرطوم بتشكيلة (اساسي) واحد ما فيها. تشكيلة ما بنعرف فيها اي لاعب. الشوط الاول كلو نحن قاعدين نسأل من الاسماء ب (الواتساب). اسم ما عرفناه. الكوكي اشرك عبداللطيف بويا في الشوط التاني بعد غياب استمر اكثر من 6 شهور. واشرك الكوكي نيلسون الذي اجرى عملية قبل 72 ساعة. في مدرب بعمل الحاجات دي. يلعب بي جمعة ومحمود محمد واطهر وبشه الصغير وصهيب الثعلب ومعتصم عبدالقادر ووليد الشعلة والصيني. ناس بشه وكاريكا ونزار حامد والشغيل ومكسيم برة. اندرزينهو ذاتو قاعد يتفرج برة. هسع دي انتوا يا مريخاب بتقدروا تعملوها. والله تعملوا حاجة زي دي يجيكم (تسمم). تموتوا فيها. غارزيتو عامل لينا فيها مدرب عندو شخصية. عامل فيها مدرب شجاع – وهو (ضفر) ما بقدر يبعدو من تشكيلة المريخ. ما عندو غير (بكري المدينة). (الكوكي) قلبو قوي ..ودي مجازفة ما بعملها إلّا مدرب شجاع ومدرب كبير. حقيقة نحن لمن شفنا التشكيلة اعترضنا ..ووضعنا يدنا في قلبنا. قلنا الكوكي دا مفتكر (الممتاز) منافسة (ودية). الكوكي ما عارف نحن ما بنلعب في الممتاز. يعني خلاص بعد ما عاوزين نتصدر ..ونسيطر على بطولتنا المحببة..الكوكي عاوز يفك لينا اللعب. الكوكي كان يمكن ان تطيح بيه مباراة النسور. اي نتيجة غير فوز الهلال كانت بتشيل الكوكي. لا بنعرف مجموعات ولا حاجة. الكوكي راهن على الرديف وكسب الرهان ..حقيقة نحن ذاتو ما كان ح نرحم الكوكي لو تعثر في هذه المباراة. لكن الحمدلله الهلال حقق انتصار كبير وقدم عرض ممتاز ..واعاد اتير توماس ونيلسون وبويا لاجواء المباريات. الحمدلله ان جمهور الهلال اكتشف بنفسه هذه المواهب – بشه الصغير والثعلب والصيني ومحمود محمد ووليد الشعلة واطهر ومعتصم. هذه كنوز. الهلال تاني ربع قرن ما عندو مشكلة. وممكن نقول ليكم من الآن – المريخ ذاتو بعد ربع قرن ما عندو مشكلة. بختكم يا مريخاب …بعد ربع قرن – تاني ح تصلوا للمجموعات. ح تصلوها بي ناس الثعلب وبشه الصغير. بس انتوا اصبروا – وما تعملوا لينا ازعاج. …………. و مباراة الهلال امام النسور رغم من انها كانت بالصف الرابع إلّا انها كانت من اجمل مباريات الهلال في هذا الموسم. فريق النسور لأنه فريق شرطة ..اصبح جهازه الفني والاداري في كل مباراة بيشتبك مع الحكام. يجب ان يعلم فريق النسور انه يمثل (الشرطة) يفترض ان يمثل هذه المؤسسة العريقة باحترام وتقدير. الفاضل ابوشنب ..كان في اجازة مفتوحة في حالات الضرب التى تعرض لها لاعبي الهلال. ………….. السيدة (ل)..الاولو شرط اخرو (نور)..لكن يمكن الكهربة تقطع. وقرّض على كدا.