دق الدلجة محمد عبد الماجد نحن (ضحيتنا) جاهزة من الآن – صفراء وكبيرة وعندها (ضربة جزاء) الزول الحريف الايامات دي – هو الزول البمشي يعمل جولة في سوق الاضحية. يمشي ام درمان. يقولوا ليه شرق النيل احسن. يرجع بحري. شغل المروحة!!. يقولوا ليه في الاقاليم ارخص. يقفل المروحة!!. عليك الله يا ود الناس ما تدخل لينا (مروحة) في العمود دا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الزول الحريف هو الزول البياخد ليه (خفصة) كدا على الاسواق ويمشي يشوف الاسعار كيف؟. ما يكلم (المرا) عشان الملاحظات ما تكتر. خليك حريف. النقة بتزيد. لكن الزول الاحرف من كدا – هو الزول البيشتري عديل كدا. اضمن. يا زول مالك ومال الجرجرة ..المطر نزلت والاسعار ح ترتفع ..وقبل العيد (الضحايا) دي ح طير السما. في واحد حلف وقال والله مع (الامطار) دي …في العيد (طلب الفول) يبقى مشكلة. عشان كدا اشتروا من بدري يا جماعة ..وما تجهجوا (الشفع) ساكت. الشهر باقى ليه اربعة ايام ويقفل …عليكم الله اي زول يربط (ضحيتو) قدام خشم الباب. ما ضيعوا (المرتب) ساكت. ارتاحوا من نقة الشفع الكتيرة. طبعا زي ما في (ضحايا) في العيد ..الكورة برضو فيها (ضحايا). كل حاجة فيها (ضحايا). ونحن ضحيتنا اتحددت. من هسع عرفناها. بس ان شاءالله الهلال يتصدر. ضحيتنا في الكورة صفراء وكبيرة ..وعندها ضربة جزاء. عرفتوها. جنها (سيكافا). وعندهم (مقصورة طايرة). يا جماعة كدا الحكاية وضحت ..ضحيتنا ظاهرة. عندهم سلك ومزمل ابوالقاسم. عارفكم ح تفكروا في الاهلي شندي. طيب عندهم (جمال الوالي)…ما عرفتوها برضو؟. اعمل ليكم شنو اكتر من كدا..بعد كدا ما فاضل إلّا اقول ليكم الاسم. الحرف الاول (ميم). والتاني (ر). والتالت (ي). والرابع (خ). عارفكم ح تفتكروه (مريخ الفاشر). هسع عليكم الله الكلام دا كلو فيه (الفاشر). يا جماعة (مريخ الفاشر) كيف يعني ح يلاقينا في دور الاربعة. اتكلموا كويس. مريخ الحصاحيصا ؟؟. مريخ الحصاحيصا الدخلو هنا شنو؟. خلاص وقت ما عرفتوها ..انتظروا دور الاربعة ..(الضحية) بتظهر..(كنت فاكر المريخ معروف). طلع ما في اي زول بعرفو. لمن خليت (السطر). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الحمدلله نحن الله قاعد يكرمنا في (المقبرة) كل سنة قاعدين نضحي لينا بي (رأس كبيرة). بنجيب اكبر فريق في افريقيا ونضحي بيه. ولا بنسأل في زول. في اغسطس 2007 ..نحن كنا قد ضحينا في مقبرتنا دي بي (الاهلي المصري). الاهلي المصري وقتها كان يهز ويرز ..عصام الحضري كان لسه (شباب) ووائل جمعة ما كان كبير ..وشادي محمد وسيد معوض وحسام عاشور ومحمد شوقي وعماد متعب وفلافيو وجيلبرتو..فريق مثالي. فريق نموذجي. منتخب مصر كان بتكون من تشكيلة الاهلي المصري عدا فلافيو وجيلبرتو طبعا. بجيبوا المنتخب المصري وبختو الاهلي ناقص المحترفين في تشكيلة المنتخب المصري. منتخب مصر بتشكيلة الاهلي وقتها حقق ثلاث بطولات امم افريقية. مع ذلك ..ومع تلك الاسماء ..الاهلي المصري انضرب ليك في المقبرة بي ثلاثية. زي الحلاوة. الاهلي ما شاف فيها اي حاجة. لغاية الان انا ذاكرة هذه المباراة بتمر في خاطري والبرتغالي جوزيه بطلب من اسامة حسني يقوم يسخن عشان يدخل ..بعد ان صعبت الحكاية على الجماعة الجوة. بتذكر اسامة حسني وهو في الكنبة منطط عيونو زي العنقريب الما فيه لحاف ..وهو بيلبس في الفانلة. مشهد لا انساه. وكما كان ذلك المشهد متألقا في الذاكرة ..تبقى مباراة مازيمبي مباراة لها خصوصية خاصة عند الهلالاب. مباراة كان فيها جمهور الهلال حضارا ..وجمهور الهلال لمن يحضر ..ما في فريق بيركز في (المقبرة). كلهم بنقبرهم ليكم. كلهم ضحايا. مازيمبي ..كان قد استفز الهلال ..وكان لا بد من (الادبة) دي ..عشان كدا هدف اطهر الطاهر في الدقيقة السابعة من اصغر ولد في الملعب ..كان درسا قاسيا لمازيمبي. اصغر زول في الملعب جاب قون في اكبر زول في الملعب ..(شفتوا المعادلة دي كيف؟). انتصار الهلال في تلك المباراة اعاد للهلال فرصه كاملة ليس للتأهل فقط وانما لصدارة مجموعته. والصدارة تقود الهلال الى ان يكون باذن الله وتوفيقه النهائي في (المقبرة). لكن اهم من كل هذه الاشياء ان الانتصار اعاد (الثقة) في الهلال ..ورجعت (اعلام الهلال) تملأ الشوارع ..فوق البيوت والعربيات. الهلال يحتاج الى هذه (الثقة) اذا اراد البطولة ..ما في بطولة سوف تحقق من غير ثقة. الزميل اكرم حماد الذي يكتب بفكر ..تحدث امس حديثا (فكريا) في زاويته (كما افكر)..وقد اسعدتنا ملاحظته وهو يتحدث عن انتصار الهلال على مازيمبي عندما قال : (الحقيقة هي أن المريخ لا يذهب بعيداً في البطولات الأفريقية إلا عندما يكون جيداً.. إلا عندما يكون في أفضل حالاته.. عندما يكون المريخ في أفضل حالاته يمكنه أن يصل لدور المجموعات في الكونفدرالية.. وقد فعل ذلك أكثر من مرة.. ويمكنه ايضاً أن يتأهل إلى دور المجموعات.. وقد فعلها مرتين.. ولكن عندما يكون في اسوأ حالاته فإنه يخرج من الدور التمهيدي.. وكلنا يعرف ارتباط المريخ بالتمهيدي!.. بمعنى أدق إرتباطه (بالخروج) من التمهيدي..أنظروا إلى الهلال.. الهلال في اسوأ حالاته يتأهل إلى دور المجموعات.. الهلال في عام 2011 لم يكن يعيش أفضل حالاته الفنية ولكنه وصل إلى الدور نصف النهائي من البطولة.. وفي عام 2012 كان الفريق يعاني الأمرين بسبب مشاكل هيثم مصطفى والأجواء كانت ملبدة بالغيوم ولكن الفريق عرف كيف يصل إلى الدور نصف النهائي في الكونفدرالية.. وفي العام الماضي لم يكن الهلال مقنعاً من ناحية المستوى.. ولم يكن مستقراً من ناحية التدريب.. ورغم ذلك وصل إلى دور المجموعات.. ونفس الأمر هذا العام.. فبالرغم من إنتقادات الكثيرين للمستويات التي يقدمها لاعبو الهلال.. وبالرغم من المشاكل الهجومية والغيابات المتفاوتة ها هو الهلال يتجاوز كل ذلك ويتأهل إلى دور المجموعات بل ويقترب من الدور نصف النهائي!). ويقول اكرم حماد : (الحقيقة تقول أن المريخ في أفضل حالاته = الهلال في اسوأ حالاته.. وهناك حقيقة أخرى تقول أن ما حققه المريخ اليوم ولأول مرة في تاريخه حققه الهلال قبل خمسين عاماً.. وحققه بعد ذلك مرات ومرات..!!). يعني ديل فرحانين بي حاجة حققناها نحن قبل خمسين سنة. الوقت داك طبعا لا في سلك ولا مزمل ابوالقاسم ولا مامون ابوشيبة..(ما تقعدوا تغالطوا فينا ساكت). جنكم غلاط..تقول (الجرجير) الزارعنو قاعد يقوم ليكم (عدس). هسع في ناس ح تزعل ..وما ترضي وتقول لي يا زول (العدس) الدخلو هنا شنو؟. والجرجير في حد ذاتو ما في داعي ليه. ما في داعي شنو؟..يمين تتابعوا لي (اطهر الطاهر) دا ..اجيب ليكم (سمك) في العمود دا. تاكلو وتقرأوا. كمان نحن بنلعب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… و تبقى الامنيات والدعوات ان يعود الهلال من الكاملين القريبة دي باذن الله وتوفيقه منتصرا. الهلال ان شاءالله يرجع لينا بالنقاط الثلاث. الممتاز بطولة محببة لنا. بطولة عزيزة علينا. بفضلها نشارك في البطولة الافريقية كممثل اول للبلد. وبفضلها سوف نشارك في البطولة العربية في القاهرة. والاول هو الاول. وسيد البلد لا بد ان يكون سيدا في البطولة الاولى في بلده. …….. السيدة (ل)…المطر ما قاعد تزعل ليها من زول ..شوارعنا هي البتزعل. بكرة فرحة اكبر ان شاءالله. وقرّض على كدا.
