محمد عبد الماجد دق الدلجة (بشه) في الكاملين و (كشه) في كادوقلي المطر عندها علاقة بالموضوع. يتخيّل لي كدا. الشاي عندو (نكهة) خضراء مع (المطرة)…تطلع الكراسي برة في الحوش – او تقيف ساكت في الباب. وتقعد تعاين في السماء. تشرب ليك (جغمة) شاي وتصنقع. مرة تعمل كدا – ومرة تعكسها. تصنقع اولا – وتشرب ليك (جغمة شاي) ..(زي قون بشه). القهوة من (المطرة) بتبقى حاجة مختلفة…بتتراوح فيها ..يقوم المزاج يختلط بالدعاش. وحبات المطر تتداخل ليك مع حبات البن. لا تعرف المزاج دا من (البن) – لا بتعرفو من (المطر). قون بشه برضو كان فيه الجزء (التشكيلي) دا – بين الانبثاق على الروح ..او الاتكال على العشم. والشفع في الحوش ينططوا …لا عارفينهم بنططوا من (المطر) ..لا عارفينهم بنططوا من (الهدف). نحن ذاتو استقيلنا المطرة وقعدنا ننطط معاهم ..بي (كبرنا) دا. عملناها في (المطرة). ونحن قاصدين (القون). لو اكلت ليك (قراصة بي دمعة) ساكت مع قرن شطة وفحل بصل مع (المطر) دي بتحس بي شعور تاني. تقعد تغني للقراصة عديل كدا ..(كيف لا اعشق جمالك)..الناس فاكرنك قاصد القراصة ..وانت قاصد حاجة تانية. قاصد قون بشه. مطرة شديدة. عشان كدا – انا بعتقد ودون ان يكون لاعتقادي هذا تدخل من السفارة التركية في الخرطوم ..(اصلو الموضوع بقى رومانسي خالص). ما بين المطرة وخشم الباب ..واقفين اتنين. بعتقد قون بشه مع (المطرة) زي (شيلة العروس) البجيبوها ليها من برة البلد. الحلة كلها تجي تتفرج فيها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). نحن اولاد حلتنا لو نقطت ساكت نصهم بعملوا ليك فيها (شعراء). اي واحد بعمل ليك فيها شاعر …وهو ما عندو اي علاقة بالشعر ..لا من قريب ولا من بعيد. ويخشوا ليك في اجواء (رومانسية) كدا ..مبالغ فيها ..الما بدخل قاعة الصداقة عشان يحضر ليه (فيلم هندي) بدخل ليه واتس آب. والفيس ذاتو بدوروا ليك فيه ..(حبكانات) شديدة. الافلام الهندية الرومانسية ديك تشوفها في الشارع. نهي ..بسي ..كندي مون. يعني بشه جاب القون التاني. رني ..حني سني كوم. يعني الجماعة ديك المغصة كتلتهم. معقولة الهنود ديل عندهم (مغصة). انا فاكر (المغصة) دي عندنا برانا. المغصة البجيبها لينا تلفزيون السودان القومي في نشرتو الرئيسية يقول ليك الهلال تصدر (مؤقتا). مؤقتا ليه يا نازك بن عوف..البكتب ليك (النشرة) دا منو؟..انتوا (الخبر) ما قادرين تجيبوه صاح. مؤقتا دي يا ناس التلفزيون القومي لمن يكون الهلال متقدم على المريخ في عدد المباريات التى لعبها. ما في حاجة اسمها (مؤقتا) هنا …ونحن بنتكلم عن الاسبوع ال (25) للدوري ..وبنتحدث عن صدارة في هذا الحدود. قال (مؤقتا) قال. شغل السياسة واللخبطة دي عاوزين تعملوا لينا كمان في الخبر الرياضي. امشوا عديل ..احسن ليكم. طلعتونا من الموضوع. خلونا هسع دي في (رومانسية) الهدف. هدف بشه. بشه والمطر. ومهند ونور. عشان كدا نحن قون (بشه) دا بنعتبرو قون (رومانسي) خالص. قون جاء في (المطر). …انا حسب فهمي القديم ..وانا زول (تقليدي) كدا ..وبمشي على الحاجات حسب ما كان. بالفهم دا كنت قاعد في التلفزيون ..بتابع في النشرة الرياضية – عاوز اشوف هدف بشه. كملت ليك النشرة الاقتصادية دي خبر ..خبر ..نشرة مسيخة كدا زي (الدراب). عملوها لينا كلها (دقيق). ناس التلفزيون القومي عندهم نشرة اقتصادية ..تقول جايبنها من الصومال. نشرة الجوع ضاربها. النشرة الاقتصادية انتهت. جابوا ليك (الدعايات) قعدت اتابع ليك في الدعايات دعاية – دعاية. دعايات معتتة كدا. دعايات زي الناس ما عندهم. عبدالماجد دخل علي في هذه الاثناء ..قال لي انت عاوز تشوف شنو؟. قلت ليه عاوز اشوف قون بشه. عبدالماجد قال لي هدف بشه ما بجيبوا ليك في النشرة الرياضية – هدف بشه بجيبوا ليك مع النشرة الجوية مع المطر دي. فعلا ما جابوا لينا الهدف في النشرة الرياضية. جابوا لينا كورة المريخ – تقول الناس ناقصة (مغصة). انا عرفت ليك مشكلة البلد دي وين؟. مشكلة البلد دي لا في الدقيق. ولا في الكهربة. ولا في الموية. ولا في الشوارع البتقفلها المطرة. ولا في الجقور. مشكلة البلد دي في التلفزيون القومي. ديل عندهم تلفزيون زي (الدرج) بتاع المتوسطة. لكنا برضو دا ما موضوعنا. خلونا في القون والمطر. قالوا ليك (بشه) جاب ليه قون …خلى ليك (المطر) في حتة …والحارس في حتة. منسوب النيل طوالي ارتفع. شفع الحلة طوالي طلعوا يغني للمطرة ..يا مطيرة صب لينا. ما عرفنا الفرحة الاساسية من شنو؟. من المطر وإلّا من قون بشه؟. رجعنا ننطط تاني. ناس الارصاد الجوي قالوا امس في نشرتهم اتوقعو (مطرة) في الكاملين وقون لي بشه وتعادل في كادوقلي. التلاتة حصلت. لكن بشه ذاتو (غتيت). بشه خلي ليك مباراة هلال كادوقلي والمريخ تتنهي وجاب قونو. عشم وانقطع. عارفين بشه عمل كدا ليه؟. عشان ناس المريخ ما يمنحوهم (ضربة جزاء). الجماعة ديل لو عملنا ليهم كدا ..ما بتغشوا لينا. عشمناهم ليك. الجماعة قالوا ليهم الهلال مغلوب 1 / صفر. جماهير المريخ في كادوقلي خلت كورتها وقعدت تكورك في هدف ولاءالدين. غارزيتو وقت قالوا ليه الهلال مغلوب ..طلع ليك بكري المدينة. واسترخوا ليك. ومزمل ابوالقاسم بدأ يكتب في عمودو. الهلال اتعادل بي ضربة جزاء..ناس المريخ قالوا التعادل جاء بي ضربة جزاء ..الناس ديل ما بتغلبوا. اصلو هم تركيزهم كلو كان في (الكاملين). استرخوا ليك للاخر ..مع تعادل الهلال والاهلي في الكاملين. ناس ضفر قالوا الهلال في (الكاملين) اتعادل!! .. معقولة نحن نغلب في (كادوقلي) !!. دي ما بتجي. عاشوا ليك في الدور. وناموا على كدا. بشه (غتيت) خلى مباراة المريخ تنتهي. لمن الزمن الرسمي انتهي في كادوقلي. والزمن البدل الضائع ..خمسة دقائق انتهى. والحكم صفر. وناس المريخ مشوا على طيارتهم. مباراة الهلال وقتها كان باقى منها (10) دقائق. بشه عاوز يجيب قونو في الزمن الاصلي ..خاف ناس اسامة عطا المنان يرجعو ليك ناس المريخ من طيارتهم ويمنحوهم ليك ضربة جزاء. عشان كدا بشه صبر لمن الزمن البدل الضائع قرب يخلص. ولمن الطيارة اقلعت من مطار كادوقلي ..حتين (بشه) جاب قونو. قالوا ليك لمن ناس علاءالدين يوسف وصلو الخرطوم سألو من كورة الهلال..قالوا ليهم الهلال غالب 2 / 1. ضفر قال ليهم نحن الهلال دا خليناه متعادل في كادوقلي ..الحصل شنو؟. واحد من الشفوت ..قال ليه الهلال فعلا (متعادل) لكن في كادوقلي. ضفر طوالي اتعقد ..وشعر ليك بي كميات كدا من الخجل. عليكم الله هو لو ما الكورة دي مجنونة فعلا. هلال في الكاملين ينتصر. وهلال في كادوقلي يتعادل. في نفس الوقت. ليخرج الهلال من المباريتين بي (5) نقاط. الهلال اضاف لرصيده (3) نقاط …وحرم المريخ من نقطتين. 5 نقاط في مطرة واحدة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……. و جمال الوالي …التعادلات كترت عليه ..بعد كدا بيستقيل. الاستقالة وجبت. تحالف معارضة المريخ ح يطلع بيان. طيارة خاصة عشان تجيبوا ليكم نقطة. النقطة دي بي (هايس) كان ممكن تجي. طيارة لي شنو؟. قلنا ليكم (حبيبي مفلس) قلتوا جمال الوالي عندو قروش. اها خموا وصروا. رغم ان النقطة الواحدة ما عاوزة ليها خم وصر. ……….. السيدة (ل) ..قالوا ليك ناس المرور مسكوا (القهوة) برضو. وقرّض على كدا.
