دق الدلجة محمد عبد الماجد رضا (اعتذارات) حوّل رضا مصطفى الشيخ برنامج (عالم الرياضة) الى ما يطلبه المريخاب – كورة المريخ (قون) …ضربة جزاء الهلال ما ضربة جزاء ..عشان المسافة ياردة واحدة بين اللاعب والكورة. بقيت تحسبها بي (الياردة) يا سيحة. شاطرين اوي يعني!!. زولكم بيجيبوه في الاستديو رافع ايدو فوق عيونو عشان يشوف (اللقطة) ويقول ليك (ضربة جزاء) الهلال ما صحيحة. ضربة الجزاء ما بشوفها – زي الزول البشوف ليه في (قافلة). ما فاضل ليه إلّا يقول (نقلا عن عمود مامون ابوشيبة). الموضوع ما كدا. وقت تكون للمريخ بقول ليك الحالة (تقديرية) لحكم المباراة. وللهلال بقول المسافة اقل من ياردة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). برنامج (عالم الرياضة) تحول الى (حلقة استرضاء) واستسلم البرنامج بي مخرجو لكتابات الاعلام المريخي. برنامج حسب الطلب. البقولوه المريخاب في اعمدتهم كلو بيجوا ناس رضا مصطفى الشيخ ينفذوه ليهم يوم الجمعة. بالكربون. قالوا ما ضربة جزاء يبقى ما ضربة جزاء. قولوا قون تبقى قون. المسابقة ذاتها بقينا نشك فيها ..يكون بفرزها ليهم اعلام المريخ. الفائز ذاتو بكون منهم. رضا مصطفى الشيخ في نفسه تحول الى (رضا اعتذارات) وهو يعتذر عن كل شيء. بعتذر عن ضيق الوقت. وبعتذر عن فرز المسابقة. وبعتذر عن تعطل الجهاز. شغال (اعتذارات). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). رضا بلغ درجة من (الخوف) انه اصبح لو قدم مباراة الهلال قبل مباراة المريخ يقول : (يا جماعة معليش بس عشان مباراة الهلال سبقت مباراة المريخ نحن بنقدم مباراة الهلال اولا). كأنو بعمل لي اعلان لمناديل الورق ..اعتذارات شديدة. عليكم الله دي عاوزة ليها (اعتذارات). دي (ظرافة) مبالغ فيها. (رشاقة) فايتة الحد. (رضا اعتذارات) امس اول ما ظهر ..مسك لينا البرنامج (15) دقيقة في (الاعتذارات)..والله انا ما قلت الكلام دا ..ومجموعة المريخ في شنو كدا ما عارف شكرا ليها كتير ..ومجموعة مريخاب اون لاين في الواتس اب ما قصرت. زولكم بعتذر عن حاجات ما عملها. ولا نحن عندنا بيها (دخل). البرنامج حولو (كرت دعوة). بطاقة اعتذار. رضا اعتذارات قال شنو؟..قال والله (وزولكم بحلف قسم ) ويقول انا ما قلت الكلام الذي حرف عني في (الواتس اب). والله ما عملت كدا. وكأننا في مشهد من فيلم عادل امام (رجب فوق صفيح ساخن). رضا فوق صفيح ساخن. في زول بحلف ليه في برنامج. انت في (محكمة). مقدم البرنامج اذا لم يكن (شجاعا) وقويا والحاجات المدبلجة ما بتهزو ما بنفع يقدم ليه برنامج (قومي). ما ممكن تكون زول (مبرري) لهذه الدرجة. زول بتاع (تبرير) بس. جابوه يعتذر ويرجع. ما معقول نص البرنامج تضيعوا لينا في (الاعتذارات) يا رضا وبعدين تجي تقول (زمن البرنامج انتهى) وقت ندخل على مباريات الهلال. الغريبة ان (رضا اعتذارات) طلع ليه (بيان) بعتذر فيه لمجموعات الواتس اب مع ذلك زولكم ما اكتفى بالجرسة. جاء في تلفزيون السودان القومي يعتذر لينا ويوم الجمعة كمان. عشان كدا اي حاجة كانت للهلال قال ما صحيحة ..حتى ضربة الجزاء يا كافي البلاء. دا شكل من اشكال الاعتذار. يعني البرنامج دا لو بقدمو عادل ابوجريشة ما بعمل في البعمل فيه رضا اعتذارات. اعتذارات راضا لمن دفقت في قناة النيل الازرق…جماعتكم تاني يوم برضو دوروا (اعتذارات). قون الهلال ما صحيح. مخالفة المريخ ..قون صحيح. ضربة جزاء المريخ صحيحة. اي حاجة للمريخ قالوا صحيحة. رضا يوم الجمعة كلو عملو لينا اعتذارات..يا ربي نحن في (محل اتصالات)؟..وإلّا في (حدايق حبيبي مفلس)؟..دي شنو (الرومانسية) الشغال بيها رضا مصطفى الشيخ دا؟. اقصد (رضا اعتذارات). رضا مصطفى الشيخ الظاهر عليه بيستجيب للضغوط وبيستسلم تماما لما يكتبه مامون ابوشيبة ومزمل ابوالقاسم وهيثم كابو زي (فيصل سيحة) عشان كدا بيظهروا بهذا الضعف والهوان والاعتذارات. انتوا في زول عاوز منكم قروش؟. في زول طالبكم؟. مالكم بترجفوا البرنامج كلو..(ويقولوا ليك نحن ما بنخاف). اكتر من كدا تعملوا شنو؟. الجماعة ديل يتخيل لي بين الفواصل بقوموا جاريين ..بيجيبوهم من بوابة التلفزيون الشرقية. البقولوه ليهم كلو في (الاعمدة) بيجوا يطبقوه لينا يوم الجمعة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اما فيصل سيحة فهو قد فات (طابق شاخور) بي غادي ..من (التجليات). تجلي عجيب. دا منو دا؟. ضفر؟. امير كمال؟. الريح علي؟. الزول دا يوزع في (ضربات الجزاء) زي ما هو عاوز. يشيل ويوزع فيها زي الزهور. ويجي في نهاية البرنامج يقول لينا انا ح اغيب اسبوعين عشان مسافر اليونان. برضو بعتذر. عشان كدا يا سيحة قلت احسن تطمبجها بالشكل دا. اي حاجة تلاقيك للمريخ (ضربة جزاء). واي حاجة للهلال ما صحيحة ..والحكم بالغ فيها. سيحة الذي خرج في احد الجمع واشاد بي (لامبيتي) الحكم الغاني الذي احتسب للمريخ ضربتين جزاء وطرد ليه لاعب من وفاق سطيف ..يحسب ان ظلم النادي الذي يلعب امام المريخ هو (الانصاف). وان (الشجاعة) تتمثل في ان يمنح المريخ ما لا يستحق. لامبيتي الحكم (الفاسد) والذي هاجمه الاعلام الجزائري وهاجمه الاعلام المصري واوقفه الكاف لمدة (6) شهور وكان الكاف قبل ذلك قد اوقف والده واتهمه بالفساد ..سيحة بقول عنو حكم شجاع. وحكم عادل. اذا كان (لامبيتي) في نظر سيحة بهذا العدل ..ليه حق يشوف جماعتنا ديل ظالمين. الجماعة عاوزين ليهم في اي مباراة ضربتين جزاء. وعاوزين ليهم حالة طرد. سيحة (الكريم)..قال ان للمريخ هدف في مباراة هلال كادوقلي. ثم جاء لمباراة المريخ وهلال الابيض وقال ان هناك مخالفة قبل هدف فريد. ما خلى ليه هلال. المضحك ان سيحة وصل درجة من (الكرم) قال ان الحكم يفترض ان يعيد ضربة الجزاء التى اهدرها عبده جابر. لا بالله. سيحة لو كان حكم تلك المباراة كان ح يكون بعيد لينا في الضربة الى وقتنا هذا. لو الكورة ما جات قون ..ما بقيف. سيحة ذهب بعد ذلك لمباراة الهلال واهلي مدني وقال ضربة الجزاء ما ضربة جزاء ..عشان شنو؟. عشان المسافة اقل من (ياردة). ضربات جزاء الهلال بيحسبها ليك بي (الياردة)..وضربات جزاء المريخ بحسبها ليك بالنية…حسب تقدير الحكم. لا – لا ضربة جزاء. الغريبة ان سيحة عشان (يطبظها) سمح جاب هدف (بشه) في الرابطة وقال الهدف دا صحيح. هو القال ما صحيح منو؟. الهدف اصلا صحيح ..ما عاوز ليه (شهادة) منك يا سيحة عشان تصححو. شكرا يا كابتن. مجلس الهلال يجب ان يكون عندو موقف من هذا الذي يفعله رضا اعتذارات وفيصل سيحة في برنامج عالم الرياضة. البرنامج لو ما كان يوم الجمعة كنا قلنا ما مشكلة ..خلوهم يكضبوا ساكت. لكن البرنامج يوم الجمعة وبعد صلاة الجمعة كمان. ما بصح يعملوا كدا ..ويغشوا المريخاب ويضللوهم بهذه الصورة (الفجة). عشان كدا عمركم ما بتمشوا لي قدام. خلوا فيصل سيحة يجيب ليكم بطولة. ويعمل ليكم (ممتاز) كدا ويمنحكم ليه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و الحذر – الحذر من النسور اليوم. التهاون مرفوض. والاطراء الكتير يمكن يعمل مشاكل. ومباريات كاس السودان قابلة للمفاجأت. اعملوا حسابكم. وجضموا كفركم بس. وان شاءالله ينتصر الهلال والجو يبقى تمام. عشان نتفرغ لسموحة. الهم الاكبر. والهدف الاعظم. جمهور الهلال مطالب ان يمنح الفريق اليوم الروح المعنوية والمساندة التى يمكن ان تنفعهم في الاسكندرية. ساندوهم اليوم. شجعوهم ..سوف ينعكس ذلك على مباراة سموحة. ودوعهم واسألوا لهم التوفيق. خليكم معاهم اليوم. ………… السيدة (ل)…الجماعة ديل عندهم فكرة يخصخصوا (القهوة) ويعملوها (شوربة كوارع). وقرّض على كدا