في السلك بابكر سلك يا خبر بلايلى طلع بتاع بحر * الأخبار أمس أفادتنا بإيقاف البلايلى لثبوت تعاطيه للمنشطات المحظورة * وفى بعض الناس قالوا القصة إدمان * قالوا فحصوا ليهو فى كورة الإتحاد والعلمه * بدرى الكلام ده * والنتيجة طلعت أسى * قبل لقاء الإتحاد والهلال بأيام * وفقد البلايلى كبير للإتحاد الجزائرى * ولكنه خبر مفرح بالنسبة لينا كمريخاب * هذا اللاعب المهول نضمن عدم مشاركته ضدنا فى النهائى * فهو مهاجم جيد * على الرغم من انه ماقدر يتعبنا يوم لاقيناهم فى الجزائر * بالله شوف * بلايلى منشط * وحكم ينقض هدف شيبوب * كم انت كبير يا مريخ * المهم * البلايلى طلع بتاع بحر * وانا اقول الزول ده خيالو واسع * يضربها من تحت تمشى لافه * يقبل على الجمهور ويشوتها * تجى وراهو وتدخل قون * خيالو واسع شديد * غايتو القرار ده لو طلع بعد البلايلى قابل الهلال * كان وراهم ليك الخيال * ناس مساوى ديل خيالهم ما واسع * بيتعاملوا بالقطعة * الكورة فوق ينطوا * الكورة تحت يقشوا * يعنى البلايلى ابوخيال واسع ده * لو برمها ليهم فوق * فى خيالو ترجع تحت * لما ينطوا ليها * تكون نزلت * ولما يشوفوها * تكون دخلت * المهم * إتحاد الجزائر ليس بالفريق الذى يعتمد على بلايلى واحد * عندهم بلالى كتيره وسيور كمان * وعلى الرغم من ان حرب حياتو وروراوه بدت تظهر نتائجها فى هذه المرحلة بالذات * إلا أن إتحاد الجزائر لايعتمد على روراوه وحده * إعتماده على مهارات داخل الملعب فى المقام الأول * بعدين ممكن تدخل حكاية حكم زى ماحصل فى كورتنا * أيها الناس * مسارات بعض الأندية فى هذه البطولة بالذات * أثبتت ان كفة حياتو وأعوانو داخل الإتحاد الأفريقى هى الأرجح * ولكن إن صنعوا للميزان الف كفة * كفة المريخ سترجح بالكأس عنوةً وإقتداراً * المهم * نهائى بدون بلايلى فرصة طيبة لقهر إتحاد الجزائر والظفر بالأميرة السمراء كبطولة افريقية ثانية للمارد الأحمر * المهم * واحد قريبنا * ماشى فى الشارع * المواصلات صعبه * سايق ولدو الصغير من يدو وماشين * كلما يجوا جمب محليه * الولد يتلفت يعاين ليها ويتقل مشيتو * ابوهوا لو فكاهو بيمشى المحليه عدل * قام ابوهوا قال لى الولد ده : معاينتو لأى محليه بفرحه كده طالع ضابط إدارى خلى بالك * قلت ليهو طالما مغرم بالمحلية يمكن طالع هلالابى * من حقو * أيها الناس * كديابا كمل رقصاتو الخمسه فى المقبره * مافضل ليهو ولا رقصه يرقصها * عشان كده إن شاء الله سنستمتع بعذرية شباكنا على أرضنا * وسنتخطى مازيمبى * طالما الشفوت فى الموعد * المهم * أتصل بى الأخ محجوب كرار رئيس المراسم بتشريعى النيل الأبيض * الراجل ما داسيها * هلالابى كبير * قال لى المريخ أفضل مننا * وأنا من قلبى بتمنى المريخ يشيل كاس افريقيا لأنو بيستحقو * وقال لى فريقنا السنه دى ضعيف * وماقدر مقام الهلال * سواء كتب الإعلام كلام غير كده * أو طمبرو * ماشين بى كراركة البليلة * لكن المريخ يستحق البطولة * الراجل عجبنى كلامو * إنتمائه للهلال لم يفقده صوابه وقوميته * أحييك أخى محجوب على هذه الروح * وأتمنى ان تسود كل الجمهور الرياضى * لأن الحسد الرياضى هو سبب تحطيم الرياضة فى البلد دى * ناس خمسه وعشرين سنه * عينهم على مانديلا * يقولوا ليك ما كاس * لاتبخسوا اشياء الناس يا ناس * وكيف يعمل الحاسد مع الرازق؟؟ * أيها الناس * قرار عقوبة لاعب أمل عطبره من إتحاد القضارف * إن كانت صدرت عقوبه فعلاً * وإن كان قد تم إخفائه * يبقى الموضوع يا سعادة الفريق طارق * ما محتاج لى لجنة تحقيق من الإتحاد العام * محتاج لى بلاغ جنائى * والشاهد الوحيد هو رئيس النادى الذى كان يلعب به اللاعب بالقضارف * على اليمين * أخطروهوا بعقوية لاعبو فلان ولا لأ؟؟؟ * لو قال أخطرونى وسلمونى صورة القرار * يبقى المتهم الأول طوالى هو المسئول عن حفظ المستندات بإتحاد القضارف * وعشان يبرئ نفسو يورى منو السحب القرار * لأن مجرد الإهمال يعتبر جريمة * الموضوع ده لازم يتسكه ويتحكه شديد * المهم * نقابل الإتحاد فى النهائى بدون البلايلى مكسب كبير * الله ادانا قدر نوايانا * وحادثة البلايلى لاعب الإتحاد الجزائرى هذه * ذكرتنى بحادثة لاعب الهلال السودانى فى البطولة العربية * الأحداث الزى دى ما بتتنسى * وأندية بعينها هى التى تنشط الشرائح بالمنشطات المحظورة * نحمد الله انو سمعتنا فى الحته دى زى الورد * المهم * أعجبتنى حكمة جميلة * لو كنت ما عارف عنوان رزقك لا تقلق فرزقك يعلم عنوانك * سبحان الرازق الباسط * ايها الناس * إن تنصروا الله ينصركم * أها * نجى لى شمارات والى الخرتوم * أكان شفت ياوالينا * العيد قرب علينا * السنه دى الخروف إلا تأجروهوا لينا * نصوروا مع الشفع ونرفعها فى الفيس يقولوا خروف جابوهوا لينا * ونرجعو لى سيدو يا والينا * الخوف الخروف برضو يتصور معانا ويرفعها فى الفيس يا والينا * ويكتب المفلسين ديل قاشرين بينا سلك كهربا ** ننساك كيف والكلب راااااقد عارف خروف بيزعجوا مافى؟!! والي لقاء سلك
