العتب مرفوع هيثم كابو (محايتو) بيبسي و(تشكيلتو) ميكسي ! * ترك إعلام الهلال فاجعة دفن فريقه داخل مقبرته على يد إتحاد العاصمة في ليلة ماطرة سوداء، وفتح ملف (ترحيل الكاردينال لسيخ الجوهرة الزرقاء) ..! * هسه بالله يا محمد عبد الماجد نفسكم فاتحة تتكلموا في السيخ، وانتوا مغلوبين في إستادكم .. (سيخ شنو والفريق الببنوا ليهو ذاتو وينو) ..؟! * يا جماعة موضوع السيخ دا اتجاوزوا إحتمال كردنة شالو داير يبني بيهو خط دفاع بدل الحركات البعمل فيها أتير توماس دي ..! * عوّض اتير إتحاد العاصمة فقد يوسف البلايلي ..! * يا جماعة موضوع السيخ دا خلوه بعد يوم السبت أصلاً ما حيكون عندكم حاحة تتكلموا فيها غير (السيخ وصعود المريخ) ..! * معقولة قبل ما تقفلوا ملف الهزيمة تفتحوا ملف تحويل السيخ، و(يا عالم ما تبقوا زي الزول القال احصروا لينا الورثة يوم موت ابوهو) .! * لسة انتوا بكاكم حار وجنازتكم ما ادفنت تسألوا من السيخ ..! * يا جماعة أرتفعوا لمستوى مسؤولية الكاردينال وسيخ شنو البتتكلمو عنو (سيخ البلد) .! * ركزوا في كورة الرد معقولة دايرين تدخلوا التاريخ بالسيخ .. ؟ * من حق كردنة تحويل السيخ شمال ويمين طالما أنه سيبني الجوهرة بمفرده، و(زول داير يبني ليكم جوهرة تقيفوا ليهو في حلقو بسبب كم سيخة) ؟ * إحتمال السيخ دا مشى السجانة عشان يتباع ويشتروا ليكم مدافع (خرصاني) يشيل الفريق إذا تعرض لهجوم جزائري وكانت الأوضاع خطرة و(صبت مطرة) ..! * و(مطر) الصفر عاود هطل جدد عذاب (الأوصفة) ..! * وعند المطرة الصابة والسواعد الشابة نحكي …! * ما أن وطأت أقدام لاعبي الهلال مطار هواري بومدين بالعاصمة الجزائرية حتى أستقبلتهم الأمطار و(ربنا يستر علي أخوان نزار)..! * بالمناسبة : هل أنتهت مدة صلاحية نزار حامد كلاعب أم أنه يلعب برفقة لاعبين محدودي القدرات والهلال ليس مكانه المناسب ؟ * أصبح نزار حامد عالة على المعلقين والمحللين قبل الجمهور و(كان الله في عون كبسور) ..! * مستوى نزار لا بأس به، ولكن لا أحد يشعر بذلك لأن كل الفرق ليست (سموحة) ..! * نزار الكان جاري بلعيبة سموحة من النص قدام إتحاد العاصمة غالبو يملأ النص ..! * معقولة دا مستوى نزار وانتو بتتكلموا عن السيخ ..! * سيخ شنو البقيف أعمدة في الجوهرة ولياقة نزار واقعة ؟ * لا نخاف على الهلال من شئ سوى اتير والمطر ..! * المطرة ممكن تقيف لكن اتير إذا الكورة عكسوها ما بقدر يقيف ..! * يا اتير إذا ما داير تنط ما تدنقر وخليك واقف سيخة ..! * تاني جاب سيرة السيخ ..! * ما نزلت الأمطار على الأهلة يوماً إلا وأستقبلت شباكهم الأهداف واحداً تلو الآخر، فالوصايفة لديهم تاريخ أسود مع هطول الأمطار في المباريات الإفريقية و(سوابق) رعدية ..! * قال كردنة أن الهلال مسحور وإتحاد العاصمة (ما عندو شئ) ، و(ست الودع ارمي الودع لي كشكشي وشوفيهو لي كان فيهو شئ وقوليهو لي ما تختشي) ..! * يا ابراهيم عوض : (الوداعية) خايفة عليكم من الخماسية ..! * يا مزمل : كردنة قال لاعبين الهلال مسحورين، و(ما ورانا يسحروهم على الإنتكاسات ولا السجل الخالي من الكأسات) ..!؟ * حاحة غريبة : (سحر) من أجل الصفر ..! * والمطار بي وين المطار بجاي، و(السحر) بي وين (السحر) بهناك ..! * (مسحورين) من الخير : إذا كان الهلال مسحور، الأهلي المصري يكون شنو ؟ * من أبطل السحر أمام سموحة يجب عليه أن يضع الهلال في النهائي ..! * وشيخ الأمين ما بقصر معاكم بس ساعدوه بمحترفين من الوزن الثقيل ومدافعين شرسين ولعيبة نص مهرة ومهاحمين بحرزوا من أنصاف الفرص .. و(محايتو بيبسي وتشكيلتو ميكسي) ..! * و(سحرني) وسباني (عودية) الأسمراني ..! * ربنا يستر عليكم في الجزائر من (الساحر) والصحراء ..! * كترّوا البخور وحصنّوا كبسور ..! * كبسور طلع مسحور ..! * فعلاً الهلال مسحور بدليل انو سافر الجزائر بدون ما يعرف وجهتو وين ؟ * الهلال الذي هرب من السفر لوفاق سطيف قاده السحر هذه المرة للجزائر ..! * ليس مهماً أن يحقق الهلال نتيجة إيجابية يوم السبت القادم و(البركة في السفر) ..! * (السفرة) والفضيحة متباريات ..! * يوم السبت أمام كردنة خيارين لا ثالث لهما : يا يجيب بطاقة التأهل يا يجيب السيخ راجع ..! * الكاردينال قال الشركة من حقها تحرك السيخ في كل المواقع وتسلمهم الجوهرة تسليم مفتاح ..و(يا كردنة سيبك من السيخ طالما الجوهرة قائمة قائمة وخليك مع مفتاح بتاع إتحاد العاصمة) ..! * إتسيخي ..! نقوش متفرقة * حتى لو لم يُضمِن الكاف عقوبة يوسف البلايلي فإن مباراة السبت لا تحتاج لنجم الإتحاد الأول، و(مع أخوان زماموش الكلام دخل الحوش) ..! * انا بخاف من (عودية) أطلع لي بلايلي ..! * لا نريد من الهلال تحقيق نتيجة إيجابية بالجزائر فقط نطالبهم بالسترة ..! * وأعملوا حسابكم .. (نو ماكسيم نو تيم) ..! * لا خوف على الزعيم بلبومباشي، و(سجل العقرب لسه ماشي) ..! * يكفينا هناك هدف العقرب ومن بعد ذلك لكل حدث حديث ..! نقش أخير * (سيخ) الإسم .. وصيفي وكتين ينهزم .. الجوهرة يا ناس تنقسم ..!
