دق الدلجة محمد عبد الماجد في المنتخب ح (ترص) لينا شنو يا محسن؟ كثير جدا ما يحدثوننا عن (الوطنية). والمثل والقيم. والحاجات الجميلة ديك. يخرج اسامة عطا المنان. ويعقد مجدي شمس الدين مؤتمر صحفي. ويتحدث اسامة عطا المنان عن (الامن الاجتماعي). وتحذر السلطات من التفلتات. وتتبرع المؤسسات للهلال والمريخ. والدولة لا تتبرع للمنتخب. والمنتخب (الوطني) ولا هنا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). وتبدأ (الحولية) بعد كل انتصار للهلال والمريخ – الكل يريد ان يستغل ذلك وان يأخذ نصيبه من (التورتة). عندما يخسر الهلال والمريخ. ويخرج المريخ من مرحلة وصل لها لاول مرة في تاريخه ..يبدأ الهجوم على (الاعلام الرياضي). الكل بطلع ايدو ..ويقعد ينظر ليك ..ويكلمنا عن (الوطنية). ونحن وين؟. وووين؟. ووين؟. اي زول يقول ليك : السبب الاعلام الرياضي. النشيد الوطني. اللحمة تزيد. العيش يزيد. الكهربة تقطع. المواصلات مافي. والسبب (الاعلام الرياضي). كلهم في الانتصارات ..بظهروا في (الاطار) وبكونوا (متصل الآن). عند الهزائم ….السبب الاعلام الرياضي. كلو من (الاعلام الرياضي). والجرايد. الاعلام تجاوز تلك المساحة الضيقة (الصحف)..عندما نختزل الامر في ذلك ..نقضى على كل الوسائط. الاعلام اصبح فضائيات. والاعلام اصبح اذاعات. ومواقع اسفيرية. ومواقع تواصل اجتماعي. الاعلام اصبح متحرك اكثر من تلك المساحة ..متحرر اكثر من هذه النظرة. اي زول عادي بقى اعلامي من خلال موقعه وصفحته ومنبره. معقولة الجرايد الرياضية بتقود الناس بعد كل هذه الثورة التى حدثت في مجال الاتصالات. الدولة ما بتهتم بالمنتخب ..لا دعم ولا رعايا ..ولا اهتمام. ويقولوا ليك الاعلام الرياضي. الاتحاد العام ما شغال بالمنتخب ..ممكن يوقف الدوري الممتاز من اجل عيون الهلال والمريخ. المنتخب لا ..والف لا. الدوري بقيف لمعسكرات الهلال والمريخ. والمنتخب يجمع لاعبيه من (المطار). ويقولوا ليك الاعلام الرياضي. بعد دا كلو بحدثوك عن (الوطينة)..وبيهاجموا الاعلام الرياضي ..باعتبار ان الاعلام الرياضي بقود الدولة والادارات والاتحاد والجمهور. اعطوا الاعلام الرياضي اكثر مما يستحق باعتباره هو السبب في كل شيء ..وهو الذي يحدد المصاير …يشيل ويجيب على كيفو. يعني ناس الكاردينال وجمال الوالي البدفعو المليارات قاعدين ساكت. الاعلام هو الذي يسير النشاط. تتخيلوا. يا عالم؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). عشان تعرفوا ان المنتخب اقل قامة من الاندية – تعالوا شوفوا الاتحاد العام ومحسن سيد بعملوا في شنو؟. امس في تصريحات خاصة لقوون (اعلن المدرب محسن سيد عن تقديم استقالته من العمل بالجهاز الفني للمريخ وكذلك اي عمل أخر بالفريق ، وتفرغه الكامل للعمل ضمن الطاقم الفني للمنتخب الوطني ، والذي اخيتر للعمل به مؤخرا ، وذلك لأن نداء الوطن اكبر والمنتخب يحتاج لكل جهود ابنائه في الفترة المقبلة حيث تنتظره استحقاقات عديدة تتطلب العمل بكل جدية من اجل رفعة شأن المنتخب). شوفوا (الكضب). محسن سيد ما استقال ..محسن سيد شالوه عديل كدا ..مع ذلك بخرج محسن ويقول استقلت من الجهاز الفني للمريخ. يا راجل!!. الكل بيعرف ان محسن سيد اضحي غير مرغوب فيه في المريخ وهو قد انهي علاقته بالمريخ او ان المريخ هو الذي ابعده. اي زول عارف الكلام. الكلام دا ما مدسوس. ولا كلام اعلام رياضي. اي زول شاهد على هذه المعلومات دي. مع ذلك محسن سيد بحدثنا (كتر خيرو) عن تفرغه الكامل للعمل ضمن الطاقم الفني للمنتخب الوطني ، والذي اخيتر للعمل به مؤخرا ، وذلك لأن نداء الوطن اكبر والمنتخب يحتاج لكل جهود ابنائه في الفترة المقبلة. يا جماعة. يا عالم. محسن سيد بعد طرده من المريح بكلمنا عن (المنتخب) الحيطة القصيرة. وبقول لينا (نداء الوطن اكبر). وبقول لينا انه سوف يعمل في المنتخب من اجل رفعته. الكلام دا – او التعليق عليه ما عاوز ليه (اعلام رياضي). نحن لو بنسكت على كلام زي دا ..بنشوف لينا شغلة تانية. يا نقولها عديل كدا – يا نشوف لينا شغلة تانية. يا محسن نداء شنو؟. ورفعة ايه البتتكلم عنها؟. محسن سيد جاء للمنتخب شغل بتاع (اصحاب اصحاب). علاقة محسن سيد باسامة عطا المنان وبقية المجموعة هى التى تمنحه تلك الصلاحيات (الوطنية). عشان محسن سيد يدينا حصة عن الوطينة. ويقولوا ليك المنتخب الوطني. الحاصل يا جماعة ..والواضح ..والما عاوز ليه (اعلام رياضي) ان جمال الوالي شال محسن سيد من المريخ ووداهو المنتخب. شغل بتاع ترضيات ساكت. يعني زول نقلوه من حتة لي حتة. والمنتخب (ضيعة) للناس ديل. الزول البفشل في حتة ممكن يجيبوه للمنتخب. عشان كدا المنتخب ما بمشي لي قدام. وعشان كدا فقد الاعلام والجمهور احساسه بالمنتخب. هسع لو سألنا الاتحاد العام. وسألنا محسن سيد ذاتو في (المنتخب) ح تعمل شنو؟. اذا كنت (رص علامات) ما بتعرف ليها حسب كلام غارزيتو …المنتخب الوطني يعمل بيك شنو؟. زول قلب الدنيا دي كلها في المريخ. واخرج تصريحات غير مقبولة في حق مديره الفني …المنتخب يعمل بيه شنو؟. وما بعرف يرص العلامات!!. على الاقل من اجل السلوك والانضباط ..كان يفترض ان يبعد محسن سيد عن المنتخب. لكن عشان المنتخب ما عندو وجيع. وعشان بقدموا الهلال والمريخ على المنتخب..بتحصل مثل هذه الترضيات. شلة فطور ساكت ممكن تقود المنتخب الوطني. الموضوع ما عندو علاقة بالامكانيات الفنية. ولا بالمؤهلات. حرام ان يكون هناك مدربين في قامة الفاتح النقر وشرف الدين أحمد موسي وفاروق جبرة بعيدين عن المنتخب بينما يتجول محسن سيد بين المنتخبات زي ما عاوز. من الاولمبي للشباب. للصغار..للمنتخب الاول. بلد القياس فيها بالانتماء والصحبة والقرابة. والفطور. ما في اي قياس للمؤهلات والقدرات والشهادات. الغريب بعد كل هذه (العكة) وضرب النار الناس الذي شاهده الناس في الايام الاخيرة بين غارزيتو ومحسن سيد واجبار محسن سيد على المغادرة – جاء محسن سيد ليقول لنا انه لبي نداء الوطن. إلّا وطن تاني. ليه نحن بندخل (الوطينة) في حتة ما حتتها؟. ليه دائما المنتخب الوطني عندنا الحيطة القصيرة. تتخيلوا بعد الحاجات دي كلها بقولوا ليك : (الاعلام الرياضي). ومحسن سيد بقول لينا من اجل الوطن. يا ود لا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). و دور مهم ينتظر جمهور الهلال اليوم والفريق يلعب مباراة هامة مع الممتاز. يظل الممتاز بطولة الهلال المحببة. ما بنقبل فيها اي شيء. نحن ممكن نجامل في اي شيء عدا الممتاز. ان شاءالله اختيار لاعب ام بدة ابوعاقلة والذي اتفق معه الهلال للمنتخب ليس فيه (مآرب) اخري. ان شاءالله الموضوع يكون طبيعي. او يكون صدفة ساكت. المنتخب اصبح (مخالب قط). وبيسألوا عن الوطنية. لماذا لا يقوم مجلس الهلال بعمل اقرارات في الاتحاد مع اللاعبين الذين رصدهم. الاتحاد كان بفتح مكاتبه للمريخ انصاص الليالي عشان المريخ يعمل اقرارات. قبل انضمام ابوعاقلة للعسكر المنتخب اعملوا معه (اقرار) في الاتحاد. وشوفوا ناس الاتحاد بقولوا ليكم شنو؟. وبالمرة كدا اعملوا ليكم اقرار مع امير كمال. نشوف الموقف ح يكون كيف؟. اصلو اتحاد شغالة (لخبطة) ساكت. اتخيلوا امير كمال المطلق السراح يعمل اقرار مع الهلال ويلعب مباراتي القمة مع المريخ في الدوري والكاس. الموقف ح يكون شنو؟. عشان نوريكم بس شغل الاتحاد كلو غلط. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …….. السيدة (ل) – شارعنا ضاق على (كرعينا) ..وليس (نُعلينا) براها كما يقول الدوش. وقرَض على كدا.
