في السلك بابكر سلك وصلنا بيم السقف 2 / 5 *وقفنا امس في ان جماهير المريخ بنسبة كبيره جدا *تؤيد قرار التجديد لغارزيتو *بل وتقف قلبا وقالبنا مع استمرارية الملعم غرزه *ايها الناس *قلنا ان التاريخ منذ 1927 يحفظ في سجلاته اسماء لمدربين مروا علي المريخ *البقيه لن ننسي ماقدموه *ولكن انجازات الذين يتربعون علي صفحات التاريخ تؤهلهم للبقاء في الذاكره مادامت الحياه *منصور رمضان صاحب اعجاز بدون تعادل او هزيمه *وهو اعجاز لانه لم يتكرر ولن يتكرر *رودر صاحب مانديلا لزم *وهورست الذي اوصلنا لنهائي الكونفدراليه *وغرزه *واري ان غرزه اميزهم *فشكل اداء المريخ في عهد المعلم غارزيتو غير *امتاز الاداء في عهد الثعلب الفرنسي بالجمال والقوه والغيره والانضباط التكتيكي *لذا اختارت جماهير المريخ الواعيه التجديد لغرزه *ولن ننسي ان شكل المريخ كان السبب الاساسي في الكثافه الجماهيريه *وهو السبب الرئيسي في التدافع المجنون نحو دعم الزعيم من الشفوت *وهو ملهم الطوائف التشجيعيه المختلفه في ابداعاتها التي شهد بها الاجانب قبل الاقارب *وهو السبب الرئيسي في الوحده والالتفاف حول الكيان والاستقرار الذي استقر بحنايا المريخ *وهو السبب الاول في عودة الروح للمدرجات *شكل اداء المريخ هو من اتي للمريخ برموز المعارضه لتقف جنبا الي جنب مع الشفوت في معارك افريقيا *شكل المريخ هو ماجعل ناس محمد عبدالماجد وروشا يرتجفون بشدة عند سماعهم لعبارة ريحة المطار *شكل المريخ هو مادفع الجميع في الكاف لترشيح المريخ للبطولة *اذن غرزه صاحب الشكل الذي اتي الينا بتفرد في هذا الموسم يستحق الاستمرار *الاخ همت لم يوفق في ما ادلي به منفعلا عن غرزه *ونجاح غارزيتو الفني لايشك فيه احد حتي ولو كان عدوا لدودا علي عمر *وغرزه بشر *يصيب ويخطئ *ولكن تحميله وزر مباراة مازيمبي بسبب التغييرات ليس من العدل *اليس هو ضفر الذي دخل بديلا يوم عزام واحرز الهدف ؟؟؟؟ *الم يدخله غرزه في نفس الخانه ؟؟؟ *اليس هو ضفر الذي احرز الهدف الاول في كابو اسكورب من نفس الخانه ؟؟؟ *طيب *لما يلعب ضفر في الوسط ليتقدم مساندا بكري *من في المريخ افضل من عمر بخيت في التمريرات الطوليه ؟؟؟ *يبقي ما نعادي الراجل ونجيب مبررات غير منطقيه *ايها الناس *وان كانت هناك هنات في طريقة تعامل الخواجه *فهذه امور يدركها المجلس لوحده *وعلي المجلس معالجتها في بنود العقد الجديد *ابقوا علي غرزه *واطلقوا يده في الاختيارات التي تدعم النقص *صدقوني التتويج ببقي ساهل *المعلم وصلنا بيم السقف *اخير لينا من الكانوا لما يصلوا العتب *بسقفوا لينا علي كده *والغريبه البسقفوا لينا مع حفر الساس *فكونا من الخوض في تجربة جديده تكلفنا موسما آخر *امسكوا في الخواجه قوي *وان كنت امسك علي المعلم حاجه *عندما نلعب نهارا افريقيا او محليا *تنهار اللياقه البدنيه *ونخسر *راجع عزام وكابو ومازيمبي وحتي عروضنا في الولايات التي نلعب بها عصرا *ونخسر بالذات في الشوط الثاني حيث يبلغ الانهيار مداه *مع ملاحظة ان غرزه لايمرن الناس نهارا وهو قادم علي مباراة نهاريه *ومانفعنا في دور المجموعات *هو ان جميع مبارياتنا لعبناها ليلا *الاوستن *الليل برد ليه *لكن بالنهار بقيل تحت الشجره *ايها الناس *شعار الشفوت غارزيتو مدربي *فلا ترموا شعار الشفوت علي الارض *ولاتضربوا برايات الطموح عرض الحائط *مافي زول يجيب لينا محترف اجنبي *غرزه يختار براهو *كفايه المواسير العترت لينا في مشينا كتير *والمره دي حتي التسجيلات المحليه *حقوا تكون بمشاورة غرزه *مع التأكيد علي ابعاد ناس الرنين والوبائي والسحائي *زول كان وقف يغطي بلد *ضلو قدر ضل العماره *يجينا زول ناطي *ويقول لينا عندو الوبائي *الوبائي عندك انت ياخ *خلينا السنه دي *اسمع كلامي يا جيمي وخلي غرزه يمسك بزمام امر الانتقال *ترشيح الناس الساي ديل بتتعبنا يا جيمي يا اخوي شديد *المهم غرزه يقعد *ويختار ناسو *ونضع ليهو شروطنا *ايها الناس *نحتاج لشفوت في قيادة بعثاتنا الخارجيه مستقبلا *فمابدر من شفوت مازيمبي *كان بتقطع ليهم في لومومباشي لو كان معانا شفوت *-بندقية شنو البتخوف زول *لو جا وزير الدفاع الكنغولي ولا بس قميص كونغولي *مابقدر يضرب طلقه *يبقي تهديد الشرطه الكنغوليه كان وهم ساي *اذا ناسنا اتشفتنوا *الشرطه كانت انسحبت *لانو مجرد عيار طايش *كان حرم الكنغو من منافسات الكاف سنين *راحت عليكم يا الرحتو للكنغو *ومازيمبي ما بعمل عمايلو دي الا مع الاقوياء *مع اورلاندو الجنوب افريقي عملها *ومع وفاق سطيف الجزائري عملها *ومع المريخ عملها *مازيمبي عارف فرق زي دي مابغلبها الا بطرق زي دي *اما الزناطير *يمشوا الكنغو ويجدوا احسن معامله *مامنهم خوف *المهم *خالتي قالت لي التعيس وخايب الرجا *قلت ليها خايب الرجا ده منو ؟؟ *قالت لي خايب الرجا العمرو من بره شايل شئ ماجا *لكن التعيس سوء حظ وبروح *قلت ليها والله خايب الرجا حكايتو جكاية *ايها الناس *رب ضارة نافعه *لو شلنا الكاس ده *كان فقدنا اخوه اعزاء علينا *البلد دي مع كاس افريقي تاني لينا *ما بتتقعد ليهم *فكرنا بعد نشيل الكاس *نقايضهم بالسوريين *هم اخير ليهم الحرب من القعاد مع جوية جديده في بلد واحده *البراميل المتفجره اخير ليهم وارحم عليهم من اقوان بكري *ونحنا السوريين بشبهونا *حمر وصفر وحلوييييييييييييييييييييين *السنه الجايه لازم نشيل الكاس *السوريين ديل مابتخلوا يا حبيب *اشقائنا واحبابنا واخواننا في الله *وناس روشا الحرب يا حبيب *محمد عبدالماجد *لو ماعملت الخدمه امشي اعملها *اتعلم ضرب النار وفك وتركيب سلاح *واتعلم تزوغ من البراميل المتفجره كيف *الموسم الجديد سوريا محمداك محمداك يا محمد *ايها الناس *امس المستوي كان ما تمام *يمكن الارهاق والاحباط كانا سببا لذلك المستوي *لكن اوكرا كان رائعا جدا *الولد موهوب ومبدع *ولكني لا اميل للرأي البقول انو غرزه قاصدو *فالمدرب لايحارب اسلحته واسباب نجاحه *وقد تكون هناك اسباب منطقيه لابعاده عن التشكيل *فنحن لا ندري لياقته ولا نعلم بمدي انضباطه التكتيكي *وافتقدنا العقرب امس *ان شاء الله في نوفمبر تقوم علي جنها وتقرص من طرف *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *السلام بعجبنا وبنجينا *بقدم بلدنا وبحفظها لينا *والدعوه للحوار (بكسر الحاء) جد سارة لينا *لكن يا والينا *تفتكر البلد دي محتاجه اكتر لحوار (بكسر الحاء ) يا والينا *ولا محتاجه لحوار (بضم الحاء) زاهد في شيخو الوطن ومهموم بينا ؟؟؟؟ سلك كهربا ننساك كيف والكلب لما يسرح ويتذكر ايام زمان بنبح ساااي بدون كديسه والي لقاء سلك