دق الدلجة محمد عبد الماجد لمن قالوا لي المريخ لاعب مع (الميرغني) قلت ليهم ح يشتكوا (الحسن الميرغني) مباريات المريخ نادر جدا ما اتابعها. اعمل بيها شنو؟. انا ناقص (مصعب عمر). هسع ايمن سعيد دا لو جابوه لي (صرفة صندوق) بقبل عليه. زول كورتو (محنطة). تقول سايق ليه لوري تراب. المباريات المحسومة والما فيها حاجة ..ما بتابعها. منتهية. مشاهدة مباريات المريخ في التلفزيون زي (قطيع البصل). انا ما عارف العاجبكم في المريخ دا شنو؟. في ناس بيحبوا (المكاجرة). والمغالطة. والفول السادة. يقولوا ليك الفول دا ما تعمل لينا فيه اي شيء ..غير (الملح). بحبوه (مسيخ). عليكم الله – وامانة فيكم ..في وجود الهلال ..فريق زي (الفل)..زي قولة (صباح الخير) في زول بشجع ليه فريق تاني. في زول بيشجع (المريخ). اللون الابيض…الصفاء والنقاء…والطيبة. واللون الازرق ..السماء والرفعة والموية والسحاب ..واي حاجة حلوة. في وجود هذه الالوان ..معقولة في زول بيشجع اللون الاصفر والاحمر. دي شنو (المكاجرة) دي؟. براكم بتحبوا تجيبوا لي نفسكم (الضغط). الجابركم شنو؟. والله مازيمبي ما غلطان عليكم. اصلو ما غلطان. انتوا عارفين مازيمبي لو كان محتاج (سبعة) ناس ايمن سعيد ومصعب وجمال سالم ما كانوا بقصروا. خاصة (البودي قاردات) محبوسة في الغرفة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). نادر جدا ما اتابع لي مباراة للمريخ. امس وقت قالوا لي المريخ لاعب مباراة مع (الميرغني). قلت ليهم : (الميرغني) منو؟. معقولة. هي حصلت. الناس ديل قنعوا من (الكورة). عملوها ظاهرة. الشغل بالواضح. قالوا لي والله المريخ لاعب عديل كدا مع (الميرغني). قلت ليهم في (الحوار الوطني). قالوا لي ابدا في (الممتاز) حقنا دا. تفكيري مشى بعيد. سردبت ليكم في حتة تانية. افتكرت الموضوع – موضوع تاني. طلعت ليكم من شعوري. والطلوع من الشعور الايامات دي صعب خلاص. قلت يا ربي ناس المريخ لو حصلت ليهم اي حاجة في المباراة امام (الميرغني) ح يشتكوا منو؟. هي حصلت كمان يشتكوا (الميرغني). قالوا لي المريخاب بعملوها ..بيشتكوا (الميرغني). ممكن. لو فازوا على الميرغني بيشتكوا …الجماعة ديل اتعودوا على (الشكاوي). لكن كمان الميرغني يشتكوه في شنو؟. في (الحسن الميرغني)!!. الايامات دي الخلافات والصراعات كبيرة بين ابراهيم الميرغني والحسن الميرغني. اشتكوا في الحتة دي. يا ربي الميرغني فيه لاعب اسمو (الحسن). يكون. طيب جماعتنا ديل ح يقولوا شنو؟. ح يشتكوا من شنو؟. شفتوا عشان ..ما يتهموكم بي حاجات كبيرة …الموضوع دا اوعى تدخلوا فيه (مريخاب الجنوب). بتكون خيانة عديل كدا ..لو دخلتوا مريخاب الجنوب في الموضوع. لو دخلتوا موضوع (مريخاب الجنوب) في شكوتكم من (الميرغني) – طوالي ح يتهمومكم بتقويض النظام. النظام بتاع الدوري الممتاز. انتوا افتكرتوه نظام بتاع شنو؟. براكم بتفسروا ليكم في حاجات – انا ولا قاعد اقولها. ولا بجيب ليها سيرة. كمان عاوزين تلخبطوا لينا الدوري حقنا. وتتدخلوا لينا مريخاب الجنوب في الشكوى. اوعكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لو قعدتوا في الواطة وهندستوا الموضوع بتلقوا ليكم (شكوي). ما بتغلبكم يا ناس (سمع اضاني دي). اشتكوا من قطوعات الكهربة. قالوا ليكم الكهربة ما بيشتكوا فيها. الموضوع عادي. قالوا للحسن ..الايامات دي (الكهربة) تجي وتطلع زي ( الغنامية). بدون مواعيد. الكهربة بقت كعبة. لو اشتكيتوا في (الكهربة) – تلاتة نقاط مضمونة. نحن عندنا تلاجة وتلفزيون ضربوا بسبب قطوعات الكهربة ورجعوها. يعني ح تشتكوا (الميرغني) في شنو؟. إلّا في الكهربة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ممكن. ممكن تشتكوا في (الموية). قالوا ليهم الموية الايامات دي (ضعيفة). تقول النيل دا بيجري في (كلفورنيا). انتوا النيل دا (مشفر). مطعم. عاصرين فيه جنينة ليمون. طيب مويتكم مالها غالية كدا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اشتكوهم في (المواصلات). قولوا ليهم مواصلات مافي. يعني ح تشتكوا (الحسن الميرغني) في شنو؟. إلّا في المواصلات. ما عندكم حنك غير دا. حكاية (البونية). وموقوف. والكرت. دا كلام ما بقسم ليكم. ولا بنفع مع الميرغني. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اشتكوا … من (عربية النفايات). عربية النفايات ليها (15) يوم ما جات. من العيد ..ما شفنا لينا (عربية نفايات). تقول : (همر). الاحياء كلها مكومة فيها (النفايات). العربية ما بتجي ..وبشيلوا الرسوم. هسع دي ما شكوى مضمونة. اشتكوا ..ما تقعدوا ساكت. لو اشتكيتوا (الميرغني)..بيدوكم نقاط مباراة مريخ الفاشر. واهلي شندي. الميرغني ذاتو موقوفو ما معروف. يستاهل (الشكوى). نازل. وإلّا قاعد. مشارك. وإلّا لا. ما في زول عارف. اشتكوا. في زول هسع عارف (موقف) الميرغني. هابط…وإلّا لا. في زول بقدر يقول حاجة. اشتكوا… قولوا ليهم الاسعار طارت السماء. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). والخريف والامطار. عندنا (صالون) جرس الرسالة بجيبو واقع. صالون واقف ساي. وناس الولاية كل مرة بقولوا ليك الاستعدادات جيدة للخريف. اول ما تصب مطرة ..تكتشف (الاستعدادات) كانت في الجرايد. في الاعمدة. زي ناس المريخ. اشتكوهم في (المجاري). المسؤول عن الخريف في الولاية تقول (مصعب عمر). اي مطرة بتفوت فيه. غايتو ما عارف. ما عاوز اقول ليكم كلام كبير. وما عاوز اسبق الحوادث. لكن الميرغني بعد نتيجة مباراة امس ..هابط هابط. اتأكد هبوطه. لكن مع ذلك يا ناس المريخ ..اشتكوه. موقوفي دا ما جميل. ما يستاهل. معقولة (الميرغني) في الاخر. في اخر القايمة. دا كلام يا عالم. انا بتكلم عن (الانيق) – انتوا قايلني بتكلم عن منو؟. تشيلوا وتقطعوا من رأسكم. عليكم الله – هسع العمود دا كلو فيه سيرة غير (الانيق). ولا كلمة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… و في الهلال دائما الكبير كبير. كاريكا ..دائما كاريكا. ونزار حامد دائما في الموعد. نزار حامد اذا عاد للفورمة ..براهو بهزم المريخ. كاريكا ..وبشه والشغيل ونزار حامد ..ديل لو كانوا في مستواهم في ام درمان وفي دقلا بهزموا المريخ. عشان كدا لا بد من اعداد كاريكا وبشه والشغيل ونزار حامد بشكل خاص. ديل الناس البحسموا القمة. عجلوا لينا بي بشه. عالجوه ..سريع. بشه دائما في الموعد في مباريات القمة. والهلال عندو قمة في ام درمان وفي دنقلا. الهلال تجاوز عقبة امامه امس. وفي الانتظار ان شاءالله تجاوز مريخ كوستي …وهو العقبة الحقيقية للهلال امام اللقب. بعدو اتفرغوا طوالي للممتاز. البعملها مازيمبي في المريخ ..بعملها المريخ في الميرغني. كمان ما بتخجلوا بتعلبوا (تلاتة). تلاتة مازدا دا مفروض يكون عندكم منها عقدة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……… السيدة (ل) الميرغني نزل – والصادق ذاتو. وقرّض على كدا.
