دق الدلجة محمد عبد الماجد اليوم نرفع رأية استقلالنا ما كان بتحتاج (قسوتك)… لا نفرتك…. لا زعلتك…. لا كلمتك… لا رفعة اليدين ولا صر العيون. يكفيك تهش (طيرالبقر) من عزوتك. موضوعك الاول طلع بمس مباديء (عزتك)… ……… إلّا المكارم يا هلال… إلّا المواقف ..والرجال… قول للبلملم في الصحانة مع السؤال… القصة ما قصة (حوافز) ..واحتمال.. القصة ما قصة سفر…قول ارتحال… ما في انتصار …بتهادي في سوء الخصال.. القصة اكبر من اسامة ومن (خلابيط) العيال… ……… بطنا طمت. وكورتنا بقت تحتاج الى (نداء عاجل). انسحبوا عليكم الله… كرروا لنيا الانسحاب على رأس كل ساعة. ريحونا بيه.. اكتبوه لينا صباح مساء. اصرفوه لينا مع (شاي الصباح). عيش الفطور. انسحاب واحد على الجماعة ديل – ذاتو ما كفاية. ديل بيستاهلوا (120) انسحاب في الساعة. اصلو اسامة عطا المنان انسحاب واحد ما كفاية عليه. سمير فضل.. ازهري الطريفي… الفاتح خضر.. تاج السر عباس.. محمد عثمان دولي… قصاد اي واحد من ديل اصرفوا ليكم (130) انسحاب. شوال (تبن). شوال (تبن) عشان نفش مغصتنا. انسحابكم من حلاوتو جاب لينا (المطرة).. اشتهينا (المطرة) في عضمنا دي. المواقف وقت تكون قوية بتجيب ليها (مطرة). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). كل الخطاوي الممكنة …(وشوية خطاوي غير ممكنة) كمان مشيناها معاهم…مدينا (حبل الصبر) لمن (الصبر) بطنو طمت. واتقطعت اوصله …روحو مرقت في يدنا. فقعنا في مرارتنا كل شجر الليمون …الليمون بطنو قلبت. قال دي ما طريقة دي. ملاياتنا في البيت (اتقرحت) من البعملو فيه الجماعة ديل. اتهردت ..واتكمشت من (الزعل).. نعلينا اتقطعت.. وشفعنا في المدارس بقوا يدكوا الحصص. القمري في سماه ..نغمتو بقت (هزاز). تمسخو (شية الجمر) في نارها…. يتلب ليك (حرامي) في البيت ..تسوقو وتمشي بيه (النقطة) بي الثابتة. الحرامي يقول عاوز (طلب فحص). يفكوه. يمرق منها… يجيك تاني يوم – يشيل التلفزيون. الملاريا تفحصها في المعمل عشرين مرة. في كل مرة …الدكتور يقول ليك اعمل لي (طلب فحص). يظهر ليك (اسامة) في الدم. فلهمة (لجنة الاسئتنافات)…ياكلوا (السمك)…ويتموها (اعادة) مباراة. في (طلب سمك) بيعيد ليه مباراة – لو الحكاية ما فوضى. كمان عاوزين تدخلوا (فحص الطلب) في اللخبطة بتاعتكم دي. كفاية (تحلل). كفاية (فقه السترة). طلعتوا لينا في اخر عمركم بي (فحص طلب). نحن ناقصين. الكهربة بندفعها بي تلتلة. الموية بنشوفها بعد تلاتة صباحا. خلاص كفاية – بطنا طمت ..ونفسنا مرقت من الكورة. الكورة البتبقى زي (البامية المفروكة) دي نحن ما ناسها. قالوا ليك شغالين على كيفهم …الزول في بيت ابوه ما بعمل كدا. مباراة الامل الاولى مسكوا (القرار) في الدرج ..سبعة شهور كلو ما يجيبوه ليهم بطلبوا فحص طلب. اليهود ما بعملوا كدا. لمن الدوري انتهى.. درجهم على كيفو شغال. يبرمجو على كيفهم. لا والله ما علي كيفهم. على كيف المريخ. انتوا عاوزين شنو؟. اسامة عطا المنان زي (الترباس) الما شغال. لا بفك لا بربط. كرفتة مربوطة. ما عندو في الدنيا دي غير وكالة سفر – وشوية تصريحات. الامل يلعب يوم 21. المريخ يلعب يوم 27. على كيفهم. برمجة من امها. برمجة من فوق. انتوا قايلين البلد دي ما فيها (هلال). الكلام الفارغ البتعملوا فيه دا …اعملوه في (سكوكية). عسكر وحرامية. ما تعملوه للهلال. مريخاب الجنوب قالوا. واتحاد القضارف رسلوا. اخر عمرنا يا مجدي شمس الدين عاوزين تديروا لينا الكورة بي (القوالات). خلاص ..سلموا الاتحاد للحبوبات.. خلوهن يعملن اي شيء..ما في زول بيسألهن. الموضوع ما يبقى عليكم. انتوا لو بتقبلوا بي (المسخرة) دي نحن ما بنقبل بيها. نحن ما عندنا حكاية (تستقيل) تمشي تقعد في بيتكم (6) شهور – وترجع تاني. المريخ دا (داخلية)؟. ما عندنا حاجات زي دي. ولا فحص طلب ولا بنكضب. بعدين يا اسامة عطا المنان ..الشاي بتعاك عاوز تشربو (بدون سكر) ما في زول بيسألك. عاوز تشربو بي (150) ملعقة سكر – ما في زول بيسألك. عاوز تكب في (الكباية) 6 شوالات سكر برضو ما في زول بقدر يقول ليك حاجة. تفصل الشاي من الموية بي طريقتك. لكن (اللخبطة) البتعملها في (كباية الشاي) بتاعتك ما تعملها لينا في (الكورة). الكورة دي ما مصطفي توفيق. ولا سمير فضل. وازهري الطريفي. ولا كباية شاي. الكورة دي اكبر من الحاجات دي. اكبر من (كباية الشاي)..ما تحكم لينا الامور وتسيّر لينا النشاط بي مزاجك. نحن ما حارسين لينا (قفص دواجن). ولا عندنا لوري بطيخ. ولا فاتحين لينا محل حلويات. او حتى وكالة سفر. اعمل اي حاجة في وكالة سفرك يا اسامة. قول يوم الخميس ما في سفر… ما في زول بيسألك. قول ح تعمل تخفيض في تذاكر المسافرين 15 %.. ما في زول بقول ليك حاجة. قول ما عاوز تشوف ليك (شنطة). دا قرارك. ما في مسافر يلبس ليه قميص ابيض. على كيفك. اي حاجة ممكن تعملها في وكالة سفرك …ان شاءالله تقلب طياراتك (حصين). علي كيفك. لكن كمان الحاجات الما بتقدر تعملها في وكالة سفرك ..ما تجي تعملها لينا في الكورة السودانية …مليون هلالابي بقيف ليك. ناس الامل ما بقصروا. سيد الاتيام. الرابطة. هلال كادوقلي. الميرغني. الف كاردينال بقول ليك لا. بطنا طمت. قلبت ..من الحاجات البتعملوا فيها. فترنا من (تفسيراتكم). تطلعوا الشرطة من الملعب …(ما نقول حاجة). تعيدوا مباراة الامل ما نقول حاجة. ما تشتغلوا بالمنتخب …نقول مشي. تسجلوا بكري المدينة مع سبق الاصرار والترصد. نقول ما مشكلة. لكن تحصل تهبطوا على كيفكم ..وتمنحوا البطولة على كيفكم …يبقى نحن قاعدين ليه؟. شن طعمنا. يعني عشان نسدد ليكم رسوم التسجيلات. عشان نتم ليكم تشكيلة المنتخب. كفاية.. كفاية عليكم الله. اي حاجة عندها حدود. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لخبطتكم وصلت اي حتة. ساطوا البلد كلها. مسكوا امور (الرعاية)..لخبطوا ليك جدول سبعة لخبطة ما حصلت في (فتة فول). جدول سبعة بقى زي جدول تلاتة. جدول عشرة من جدول اربعة ما بتعرفو. اعملوا (فحص طلب). الاندية كلها – حقوقها راحت في (يبقى لحين السداد). ما عرفنا معاهم لا ابيض ولا اسود. السبعة تشوفها خمسة. والاربعة تبقى واحد. والخمسة تقعد ليك في (الزور) متل قصائد عاطف خيري وقت ما تفهم فيها حاجة. كيلو الموز تتشريه من السوق (موز) …تصل بيه البيت (خيار). السمك ..في بحرو لحقوه. السمك بقى (سلطة اسود). اي حاجة اتلخبطت. جوز الحمام كان (7) فردات …مع ناس اسامة عطا المنان جوز الحمام بقى (موية فول). اعملوا لي جوز الحمام فحص طلب تاني. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). تلفوا بينا اللفة دي كلها – عشان تمدوا لينا الموسم. بطنا طمت. ونفسنا مرقت من الكورة. كفاية. فترنا. نحن نشيل ونصبر. ونقرّض في (الرغيف). ونحن ما قصدنا (الرغيفة). نحن بنقرّض في (المغصة). اصلو ما قصدنا …(العيشة). نقلع في ضروسنا – ضرس – ضرس. المشكلة ما كانت في (الضروس). المشكلة في (الاتحاد العام). التسوس في (لجنة الاستئنافات). هسع العندو (قبضة) وبطنو مغلطة عليه ..اصلو ما يشيل (المرارة). يشيل بس (لجنة الاستئنافات). المشكلة ما في (القبضة). المشكلة في (لجنة الاستئنافات). ولا في الموية.. ولا في الخيران. المشكلة في (لجنة الاستئنافات). لو محمد الحسن حميد مسك الكورة – ما كانوا ناس اسامة عطا المنان عملوا ليهم وكالات سفر بي (ضربات الجزاء). مسكوا لينا امور التلفزة ..طلعونا من القمر بتاعنا ..تلفزيوناتنا بقت (شتره) ..وطبقنا فتر من (التلفّت). نلفلف فيه كورة – كورة. ما عرفنا الحارس منو؟. الطبق ام جمال سالم من (التحويل) الكتير. نلقاها من عربية النفايات وإلّا نلقاها منكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). كفاية.. بطنا طمت. ونفسنا مرقت. وقد كان القرار الصحيح …الانسحاب الذي اتخذه مجلس الهلال. والانسحاب الذي شاركت في اتخاذه 6 اندية اخرى غير الهلال. كفاية كدا. الكورة ما بتمشي بالصورة دي.. استقلوا. اطلعوا… واليوم.. واليوم نرفع رأية استقلالنا. شكرا ليكم جميعا على هذا الموقف ..وذلك القرار. يا دوب كدا الكورة يمكن تمشي صاح. خلونا نبدأ صاح. بدل (لف الطبق). انطلقوا ..وامشوا لي قدام. …………. و هو قرار تاريخي بكل المقايس. بهذا القرار يمكن تنصلح حال الكورة. يلا بلا لجنة برمجة بلا كلام فارغ معاكم. خلوا بقية المباريات يلعبوها ليكم ناس سمير فضل. كورة شنو مع ناس الفاتح خضر؟. شكرا الكاردينال. وشكرا لكل الاندية التى اتخذت هذا الموقف التاريخي. طبعا ناس الخرطوم الوطني والاهلي شندي ما عندهم نصيب من (المواقف). ديل ناس لا عندهم رأي ولا موقف. ديل سايقنهم ساي. زي (الرعية). تمومة جرتق. ديل جرتق ما بتموه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… السيدة (ل) – بيناتنا المطرة عملت ما عارفة حاجة. وقرّط على كدا.