دق الدلجة محمد عبد الماجد اضغط (نجمة) وشيل (امير كمال) لمن الهلال حسم امر ولاءالدين موسي وابوعاقلة عبدالله وعمار الدمازين واستلم اوراقهم ..وقيدهم رسميا في كشفهم ..جابوا ليك صورة معاوية الجاك وهيثم كابو مع (خالد النعسان)..مع خبر يقول ان المريخ احكم قبضته على (النعسان). قلت في نفسي (النعسان) دا لو ما حكمتو عليه قبضتكم …شن الفائدة؟. لو (النعسان) بجهجهم كدا – امير كمال (المفتح) ح يعمل معاهم شنو؟. امير كمال يجرجر فيهم من مايو الماضي – لمن جمال الوالي استقال ما فهمو منو حاجة. القروش يجيبوها ويرجعوها ليه. شفت ليك صورة الجاك وكابو مع خالد النعسان ..لقيت ليك (النعسان) واقف في النص على شماله هيثم كابو وعلى يمينه معاوية الجاك – قلت يا ربي الزول دا جايبنو (يربط الطبق). يفك (المروحة). والله الزول دا ذاتو لو ما كان (نعسان) – ما بجيكم. والكاردينال ما بخلي ليكم. الهلال سجل ولاءالدين وابوعاقلة وعمار الدمازين واحمد ميسي – تقولوا لي المريخ يحكم قبضته على (خالد النعسان). طيب قول الزول دا (نام) عليكم فجأة …ح تصرفوا كيف؟. رجعت فتشت اسماء لجنة التسيير. لقيت ناس همد والشاذلي. قدر ما فتشت عن اسم (كابو) ما لقيت اسمو في اللجنة. طيب كابو الجابو مع الزول دا شنو؟. كابو ماسك غرفة تسجيلات المريخ ؟ – يعني يا ناس المريخ لو جاب ليكم (احمد الصادق) وقال ليكم الزول دا كورتو ما كعبة سجلوه – ما تستغربو. الغريبة – خالد النعسان دا ليه عشرة يوم في غرفة تسجيلات المريخ – جماعتكم ما قادرين يتموا ليه قروش التسجيلات. قروش اورنيك التسجيل ما قادرين يتموها. قالوا ليك خالد النعسان قال ليهم انا هين …الكلام امير كمال. امير كمال شاف ليك الكاردينال بيدفع في (المليارات) لي ناس احمد ميسي …امير كمال طوالي قال ليهم (شيك) ما بستلمو – إلّا (كاش). انا زول (مصحصح) انتوا قايلني (نعسان) برضو. كاش دا كان زمان يا امير كمال زمن جمال الوالي. زمن (النفط) بيكب. والحنفية فاتحة. هسع مع لجنة التسيير دي – تسجيلاتكم دي إلّا يتموها ليكم من (زاد المجاهد). نفط مافي. لجنة التسيير دي كلهم رتب ..ومهندسين ..وموظفين في الحكومة – يجيبوا ليكم قروش من وين يعني؟. لو الحكومة عندها ليكم قروش – جمال الوالي من الاساس ما كان بيفوت. انتوا قايلين الخلي جمال الوالي شنو؟. مليارات امير كمال دي. الوالي عرفها. وعاوزين يعملوها في اسامة ونسي. جمال الوالي لو كان عندو قروش لتسجيل امير كمال – هو ذاتو ما كان بيمشي. كان بكون قاعد ليكم. عشان كدا لجنة تسيير المريخ دي مفروض تستعمل الخطة (ب). وهي الخطة التى كان يستعملها جمال الوالي في مثل هذه الظروف. الخطة (ب) يا اسامة ونسي هو ان تطلع وتقول للمريخاب : (قفلنا ملف التسجيلات). ما في زول بيسألك. الموضوع سالك – جمال الوالي معودهم ليك على الحاجات دي (ما في اي زول بقدر يقول ليك حاجة). ما يتشطروا عليك. جمال الوالي كان شغال على كيفو في تقفيل الملفات دي. ما معقول حارسين لي خالد النعسان ومختلفين في مبلغ (5) الف جنيه ..(5 مليون جنيه يعني). يا جماعة ال (5) مليون ما بيناتكم. شنو يعني؟. لجنة تقيف ليها في (5) مليون جنيه – اقنعوا من (تسجيلاتها). اقفلوا ملف التسجيلات ..ولو مفتحين شديد كدا – اعملوا ليكم (سيكافا). علاقتكم كويسة مع الحكومة. من دنقلا لي كاس الشهيد. ما في احسن من كدا. نظموا (سيكافا) – وكرموا على هامش البطولة (لجنة الاستئنافات). العملتو ليكم لجنة الاستئنافات ..لا بكري المدينة ولا فيصل سيحة ما عملوه ليكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). رأيكم شنو فيصل سيحة يجيكم يوم الجمعة يقول ليكم تسجيل ولاءالدين موسي في الهلال ما صحيح. تسلل. كدا ارجع لينا يا رضا لاللقطة الاولى. انا ما عارف المشكلة وين؟. في الجهاز وإلّا في المقدم وإلّا في الضيف؟. لكن عجبتنا ليكم (زرة) امير كمال. قالوا ليك امير كمال بزرزر فيهم في جنس زرزرة. يجيبوا ليه (الكاش). يقول ليهم شوية. يشيلوا الكاش ..يجيبوا ليه (الشيك). يقول ليهم ما بستلم (شيك) – الكاردينال قال (كاش). يجيبوا ليه كرتونة شعيرية. يقول ليهم الشعيرية يعمل بيها شنو؟. بوكسي 78 فوق الشيك. بوكسي شنو؟. قطعة ارض في الفتيحاب. امير كمال برفضها. اسامة ونسي ندم على قبوله لرئاسة المريخ. يا زول انتوا (النعسان) بعمل فيكم كدا. الغريبة لجنة تسيير المريخ مع امير كمال السنة دي شغالة بي حكاية (تسجيل امير كمال في الساعات القليلة القادمة). ونحن مع (الساعات القليلة القادمة) من مايو الماضي. قبل جمال الوالي ما يستقيل ..بقولوا ليك تسجيل امير كمال في الساعات القادمة. ساعاتكم دي ما شغالة. يا كمان عندكم مشكلة في التوقيت. المريخي محمد محمود قال لي امير كمال دا قالوا ناس المريخ جابوا ليه (800) مليون وقالوا ليه بنتم ليك الباقى (قنفد). يعني امير كمال يكون طالب المريخ (3) ابوالقفند. امير كمال بي ابوالقفند ما بتسجل ليكم. يعمل بي (ابوالقفند) شنو؟. كمان عاوزين تغشوه. اوعك يا امير. احسن ليك (الكاش) الموضمون. تلعب مع ناس بشه ومساوي وكاريكا والشغيل ونزار حامد وولاءالدين وابوعاقلة والقنابل التى سوف يحضرها الكاردينال – ترتاح في عمرك دا. يا امير كمال بعد كدا علاءالدين يوسف ما بقدر يشيل معاك. كفاية. وغارزيتو ما قاعد ليك. وجمال الوالي فات. انت البقعدك مع الجماعة ديل شنو؟. ابوجريشة فات …تقعد انت. ود الياس قال ما بمسك المريخ…انت الجابرك شنو؟. شوف مستقبلك. بعدين الجماعة ديل ذاتهم ما عندهم ثقة فيكم – انتصاراتهم بحققوها بي (لجنة الاستئنافات). اتخارج يا زول لو عاوز تلعب كورة. معقولة تلعب لي مع ناس خالد النعسان. خالد النعسان دا قالوا ليك لو (الجدعة) طولت ..بتشيلو نومة. لو شاف ليه (نقالة) داخل الملعب ..بقوم يتم ليك فيها نومتو. زول (نعسان). اسمو كدا. الزول دا ح يكون نايم نوم في التسلل ..وسيحة ح يقول ما في تسلل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الكاردينال ذاتو عاوزنو (يجضم) الشغلة. يعني امير كمال دا لاعب جاهز ..ومتعود على ملاعبنا ..احسن تدفع فيه (4) مليار جنيه…بدل تدفع المبلغ في محترف ما مضمون. بعدين 400 الف دولار ..بقت ذاتها ما بتجيب ليها محترف رابط. المحترف الرابط بقى من مليون دولار وانت ماشي لي فوق. عشان كدا امير كمال مقارنة مع معادلة المحترفين ما بكلف حاجة. لا شقة. لا عربية. لا مرتب بالدولار. لا جنسية. الكاردينال اصلا متجه الى دعم الهلال باللاعب الوطني وعاوز ينتصر لاللاعب السوداني. وجود امير كمال في الهلال يجعل تشكيلة المنتخب الوطني كلها من الهلال. وفي ذلك انتصار كبير لاللاعب الوطني. كثيرا ما قلت ان فريق الهلال يحتاج لعناصر خبرة ..لأن الهلال اصبح فيه مجموعة من المواهب واللاعبين صغار السن يحتاجون الى قيادات وخبرات. يا الكاردينال انت اصلا ما خسران.. اضغط (النجمة) وشيل امير كمال. الكاردينال هذا الموسم عمل (الجوهرة الزرقاء). واصدر الكاردينال اخطر قرار حفظ كرامة الهلال عندما اعلن الانسحاب. وهو يحتاج ان يكمل ثلاثيته بضربة قاضية للجماعة. جيب امير كمال عشان تكون قفلت (المجموع). اعملها. جماهير الهلال التى ساندتك ووقفت معك – ولم تخزلها ..رد ليها (الفرحة) بي امير كمال. يا كمان ناس المريخ يدفعو في امير كمال سبعة مليار جنيه. عشان ناس لجنة التسيير يبيعوا عربياتهم. قرار لجنة الاستئنافات دا لازم نرد عليه ب (امير كمال). ميسي ما قصر. لكن كمل الجميل بي امير كمال. انتوا عارفين اكتر زول بغضب منو لو امير جاء الهلال؟. اسامة عطا المنان. وسمير فضل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………… و افراح الهلال يجب ان تتواصل. يجب ان تستمر. تاني ما تقيفوا. الموسم القادم ..عاوزنو موسم للجماهير. كل الناس تكون مع الهلال. عودة الجماهير والصفوف والفرح في موسم الهلال القادم. عشان كدا هلال الموسم القادم …لو عرفتوه من هسع بتقيفوا في صف التذاكر. ناس (النعسان) ديل ..إلّا يسندوهم بي عمك سمير فضل. جماعتكم من ثقتهم في لجنة الاستئنافات بقوا يسجلوا في (النعسان). ……….. السيدة (ل) – مويتنا ما مُرة …مُرة فاتورتها. وقرّط على كدا.
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore