في السلك بابكر سلك وتتواصل هداياك يا كردنه * كردنه أدانا دورى وكأس * كردنه أدانا بكرى المدينه * وتتواصل عطايا كردنه * أمس كردنه أدانا أفضل مدافع مر على تاريخ الهلال * قلب دفاع رديف الهلال * خليفة طارق أحمد آدم * وقافلين عليهو يقفاهت ليهم التسع سنوات الجايه * أمس كردنه أدانا ليهو * فى عملية فرديه * بطلعه ارضيه جويه * أتوفق طارق سيدالمعتصم فى قيد اللاعب المهول * عباس عبدالله * القصه تستحق فيلم * الولد قيدو إنتهى فى الجنينه * قبل شهر قلت ليكم عندنا ثمرتين ما بنستناهن ينجضن فى الجنينه * بنقطعن نيات وندفنن فى العيش * ينجضن لدينا * أها دى واحده * التانيه غايتو ناس فوزى المرضى إلا يبيتوا فى شارع افريقيا * جبادتنا مشت عليها * القصه إنو الولد كان فى القاهرة ومفروض يجى يوم سبعه وعشرين * الشفوت تكتكوا ليهو حجز جديد * وصل أمس الدغش * وسقناهو من هناك * طارق ساق الولد للإتحاد * وناس فوزى ماشين على المطار الليله * بتطولوا وتاخدوا مده يا كوتش * رساله جديده من المريخ لكردنه * عبر طارق المعتصم * الدايرنو ما بنلبس ليهو كسكته * بنقول ليهو تعال يا إنت * وقولوا واحد * المهم * قطاع المراحل السنيه يسير على أربعه وأربعين قدم وستين ساق * أمس وصلت معينات التدريب كامله * تمنها بدون جمارك أربعه وسبعين مليون جنيه * ولسه * فى عهد طارق نتوقع مزيداً من الإبهار والإنتصار * ونطالب الشفوت بمزيد من الدعم والمساندة * أيها الناس * كلام غرزه فى النادى أول أمس يحتاج لوقفه طوييييييله * غرزه يتحدث عن متأخرات * والوالى يتحدث عن سداد * ولم نعهد جمال كاذباً لا سمح الله * ولم نسمه بخواجه كذاب هداه الله * ولكن المصيبة تبقى * لو ثبت أنهما الإثنين صادقين * تبقى مصيبه * فالحضرى قبل كده قال ما إستلمت * ووقتها جمال كان واثقاً من أنه إستلم * والتونسى بتاع العلاج الطبيعى قبل كده قال ما إستلم حقوق تلاتة أشهر * وسمعنا إنو مستلم وموقع كمان * وإتضح حسب ما سمعنا أن التوقيع ما توقيع التونسى * التوقيع كان توقيع زول مهول * أيها الناس * لو الخواجه طلع ما كضاب تبقى مصيبتنا مصيبه * لأنو جمال ماممكن يكون كضاب * وحاندخل فى دوامه من سرق الروب؟ * أنا سرقوا؟؟؟أنا ما سرقوا…هذا سرقوا * وهذا كمان يقلب نفس العباره * هو الكلام بقروش؟؟؟ * إن شاء الله الخواجه يطلع كضاب * أيها الناس * نلوم مجلس التسيير على الفلس * ولانلوم أنفسنا على عدم الدعم * مشروع الدعم الجماهيرى لليوم ما جايب حقو * أين الشفوت منه؟ * ولماذا لا نقدم لنادينا بإنتظام وإصرار * ولماذا نقعد وننتقد وبس * ولا ننتقد أنفسنا فى قصورنا * إن كنا كجماهير نحضر للإستاد يوم المباراة لندفع ملياراً * فهذا المليار لا يتعدى منصرفات المباراة نفسها من معسكر وسفر وحوافز * المليار مساهمه * ولكنها ليست فرض كفايه تسقط دعمنا الثابت للنادى * أيها الناس * من دواعى فشل المشروع * كثير من الناس الشركات ما بتخصم إشتراكهم * والقائمون على أمر المشروع ما جايبين خبر * ومريخاب الخارج ينتظرون فتح حساب الدعمز البنكى ليهم * ولاحياة لمن تنادى * يا مجلس التسيير * فلسكم ده ما بخففوا إلا دعم الجمهور * جمهور الداخل والخارج * فعلوا المشروع كويس * وأفتحوا الحساب البنكى للمغتربين * لى مريخاب الخارج * وشوفوا لو تنضاموا * أيها الناس * مجلس التسيير يحتاج لوقفه قوية مننا الى جانبه * الرجال ديل قبلوا الأمانه * حقو نكبر دى فيهم * المهم * لو راجين زول يجى زى جمال فى الجاهزيه * بنطول وناخد مده * حقو نفعل ما لدينا ونتأقلم على الظروف * ونفكر فى إستثمارات تعود على النادى بالنفع * وتغنى الناس عن الإعتماد على جيوب الأفراد * حتى ولو كان الأفراد ديل ناسنا وتاج راسنا * المهم * عملتها ظاهرة يا طارق المعتصم * أديهم * بالحته الفيها الحديده * الحديدة دي فيها حته * بتجهجه الكسكته * المهم * البعض يقول ان الجمعية العموميه ماقالت المريخ بطل الممتاز * القصه دى ذكرتنى الزول الخطب البت من أبوها * والأبو بتاع بحر * قال ليهو يدها بس؟ * أيها الناس * العضوية فتحت * دايرين العضويه أم راس * ما العضويه بالراس * أيها الناس * المرحله مرحلة صمود * ماتبقوا زيف * أيها الناس * إن تنصروا الله ينصركم * أها * نجى لى شمارات والى الخرتوم * تتذكر يا والينا * الناس القلت ليك عملوا جمعيه خيريه لينا * بيوفروا الأدويه المنقذه للحياة * ناس كتاااااااار إتصلوا بيهم ودعموا يا والينا * ومستنين دعم البقيه لينا * لكن السؤال يا والينا * الأدويه المنقذه للحياة دى يا والينا * موش ياها السبب القلتو جاب الإنقاذ لينا؟ * إنقاذ شنو غير إنقاذ حياتنا يا والينا؟ * همتكم معاهم ودعمكم لينا * 0912243914 دكتور محمد مالك البدرى سلك كهربا * ننساك كيف وكلب عبدالجليل الوفى حاول ينقذ البت لكن ما قدر..وعبدالجليل فهمو غلط..؟؟! * الي لقاء سلك
