دق الدلجة محمد عبد الماجد كورة كريم الحسن ما بعرفها لكن الزول الواقف وراهو اخطر منو مرات بتمشي ليك (عرس). تكون ما بتعرف العريس كويس. تمشي الحفلة. تقعد قدام. وتحاول تجاوب مع (الفنان). فنانين الزمن دا – زي فرامة سنة 1970…الواحد فيهم صوتو كان اجمل من صوت اي فنان شاب في الوقت داك. تقعد. يجيبوا ليك (العشا)..ويقولوا ليك عليك الله شفتوا ازمة الغاز دي كيف؟. ازمة الغاز الدخلها في العرس شنو؟…لو ما الناس بفتشوا ليهم مشاكل ساكت. ازمة الغاز دي فيها حاجة. ويقعدوا يحدثوك عن قطوعات الكهرباء. مواضيع انت ما عندك معاها اي قضية. ولا شغال بيها. يقعدوا يحكوا ليك عن اي شيء. ما يخلوا ليهم شيء. في اللحظات دي ..في زول بيكون ظريف ..وبيتراشق في الحفلة وبطلع وينزل ومحنن ايديه الاتنين. ولابس ليه بدلة كاملة. واي كاميرا بقيف قدامها. ان شاءالله كاميرا موبايل. انت بتفتكروا (العريس). العريس بكون قاعد في (الكوشة) زي الزول الماسك الاضاءة للمصور بتاع الحفلة. زول عادي كدا. والبدلة اللابسها ذاتها كبيرة عليه. في نهاية الحفلة يقولوا ليك الزول الفاكرو العريس دا ما العريس – العريس الزول التاني (ابوصلعة داك). مالو كبير كدا. ابوصلعة دي فيها حاجة. هسع اللخبطة في العريس بقت لي زي قصة تسجيل (كريم الحسن) في المريخ. قالوا ليك كريم الحسن جاء اتحاد الخرطوم لابس ليه بنطلون (سيستم). قلت ليهم دا شنو دا؟. قالوا لي الزول دا عامل كدا مخصوص – عشان لاحق (السيستم). انتوا يا جماعة ما تفتكروني بتكلم ساكت ..شوفوا (الصور) في المواقع. تحديدا صورة كريم الحسن مع عادل ابوجريشة وهم امام السيارة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ما عاوز اصدم المريخاب ساكت…(ما ينصدموا ان انصدموا ..انا مالي ومالهم). يستهالو. لكن اكون واضح معاكم .. علي جعفر بتعرفوه. اجيب ليكم حاجة من عندكم….عشان ما تقعدوا تنكروا لي ..وتعملوا لي فيها ما عارفين. اصلو ما بمشي ليكم بعيد. علي جعفر كورتو احسن من كريم الحسن. على الاقل علي جعفر ما مجنس. ولا معار. ولا عاوز ليه ابداء رغبة. وحكاية السيستم والما سيستم عند علي جعفر مافي. علي جعفر كورتو (محلية) ومرتبه بالجنيه السوداني ..وبفطر فول ..وما بقيف في الغداء كتير. وبمشي البكيات. الكلام كريم الحسن. ابداء رغبة. وشقة..وعربية. وعملة صعبة. وفي الكورة اكعب من كورة علي جعفر. دا عاوزين بيه شنو؟. الفرق بين علي جعفر وكريم الحسن في (اللغة) بس. علي جعفر بتفوق على كريم الحسن فقط في انه بعرف ام درمان كويس. بعرفها شارع ..شارع. غير كدا ما في اي اختلاف بين علي جعفر وكريم الحسن. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لمن شفت صورة كريم الحسن وهو بوقع على ابداء الرغبة …افتكرتو اول حاجة (الوكيل). زول متقدم في العمر. الكبر ظاهر. شوية كدا – صلحو لي المعلومة ..قالوا لي دا ما الوكيل. قلت ليهم الاتحاد العام بقى يشترط على المدربين التوقيع في مباني الاتحاد العام. الاتحاد العام عندو قوانين بعرفها براهو. قالوا لي ابدا …ما في كلام زي دا…الزول الوقع دا لاعب المريخ الجديد. قلت ليهم اسمو منو؟. قالوا لي كريم الحسن. قلت ليهم الاسم دا ما اسم لاعب. الاسم دا اسم خبير. اختصاصي. مأذون. مسلسل عربي. اصلو لاعب كورة بالاسم زي دا ما لاقني. ولا سمعت بيه. قالوا لي اللاعب دا لعب في الزمالك. قلت ليهم لعب في الزمالك شنو؟. الزول دا في الزمالك لم يشارك إلّا في مباراة واحدة ….وبعدها اختفي. المدير الفني في الزمالك وقتها – قال في (السكن) ما عاوز اشوفه. والاعلام المصري قعد يقرح في اللاعب – رغم من ان الزمالك وقتها كان يمر بأسوأ اوقاته مع ذلك اللاعب لم يستطع ان يثبت وجوده. اللاعب في كل محطات مشاركته مع الاندية التى لعب لها لم يحقق نجاح يذكر. غير كدا يبدو واضح عليه انه متقدم في السن. طاعن عديل كدا. وانا المحترف وقت يكون متقدم في السن بطلع من نفسي. ناس الهلال رفضوا سادومبا عشان اتقدم في السن. سادومبا بكل تاريخه والقه وابداعه وحبه للهلال. انتوا جايبين ليكم لاعب يا ناس المريخ ..في شغل (النقاشة) تاني ما بنجح. فات فيه الفوات. دا إلّا يحرس ليكم مدرسة. او عمارة. الصورة التى نظرت فيها …اتفصحتها كويس…صورة زول ما عندو علاقة بالكورة. ولا عندو فكرة. ووقفت في الناس القاعدة – والناس الواقفة في الصورة. واخر حاجة اكتشفت ليكم الزول الواقف وراء كريم الحسن دا اخطر من كريم الحسن. قالوا لي لكن الزول الواقف وراء كريم الحسن ما بلعب كورة ..ما عندو علاقة بالكورة. قلت ليهم يعني كريم الحسن العندو علاقة بالكورة. انتوا بتتكلموا كيف؟. على الاقل الزول الواقف وراء كريم الحسن اصغر منه في السن. ويرجى منو. جايب ليكم لاعب عاوزين تسجلوه بس عشان السيستم ما يقفل. انتوا جايبنو لي مدرسة ثانوية. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الغريبة ..ناس المريخ عاوزين يرجعوا تراوري تاني. ايمن سعيد (الصعيدي) ما قعد ليكم بعد جمال الوالي. ايمن سعيد العمرو بقى 44 سنة ما قعد يقعد ليكم تراوري. تراوري في فترة جمال الوالي زمن اي لاعب بعطوه شقة وبنزل في الفندق ..ما قعد. عاوزنو يقعد ليكم في (الفلس) دا. يقعد مع ناس عادل ابوجريشة. احسن ما تتعبوا ساكت. ولا تشغوا الجماهير بي عودة تراوري. تراوري لو رجع القروش العاوزها تسجل (ساماتا). قولوا ليكم كلام يتصدق. ما تنفخوا ساكت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). غايتو الموسم الجديد الاهلي شندي بختو. الاهلي شندي من هسع وصيف للهلال. والامل عطبرة بي الوضع دا ممكن ضرب ليكم المريخ خمسة في عطبرة. بس اوعكم تقولوا لينا (شكوى) ولجنة الاستئنافات ..الحركات البتعملوا فيها السنة دي. من هسع يا اسامة عطا المنان ما تقعد تتحرفن لينا. الموسم دا قلبتوه لينا فوق وتحت. الموسم القادم ما بنقبل فيه (كورنر). اي لف ودوران …انتوا عارفين براكم البحصل شنو؟. ………… و الهلال في انتظار مفاجآت سعيدة في الاسبوع الاخير من التسجيلات. لسه الساحة المحلية فيها اكتر من لاعب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. السيدة (ل) – السيستم قفل. وقرّط على كدا.
