دق الدلجة محمد عبد الماجد الود (اتكسكت) قبل 9 ايام و17 ساعة و(بطيخة). البطيخة ما تشتغلوا بيها كتير. البطيخة للتمويه. يسمعوا بيها ناس ابوجريشة وعبدالتام يجبوها في مطار الخرطوم ويتصوروا معاها. عارفكم انا بتخلوا ال (9) ايام و ال (17) ساعة وتمسكوا لي في (البطيخة). قبل الايام دي – قلت ليكم في هذه المساحة – الله يستر من عملية (شيبوب) الاولى ..لأن الكاردينال ما كان لابس فيها (كسكتة). العقد ما كان قانوني. العمة ما مضمونة. صورة بدون (كسكتة) – الفيفا ذاتها ما بتحسبها ليكم. نحن ما عارفين العملية فيها جزء تاني. مسلسل شيبوب بقى زي (ليالي الحلمية) – قدر ما ينتهي فيه جزء بطلع فيه جزء تاني. ونقعد (نتشهق). (الفرحة) وقت تتلخبط بي شوية (تعب) – بتبقي زي (شاي اللبن) وقت يكون (لبنو) شوية. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). (التومة بنت عسل النحل) الليلة ما عاوزة تقول اي حاجة. خلونا في المفيد في (البرد) دا. (التومة بنت عسل النحل) ..تتضحك لي هنا – !!. شيبوب خلاص دخل (القفص). اتصور مع (الكسكتة). لبس (الكسكتة) براهو. الزول دا ما عاوزكم عديل كدا يا ناس المريخ. مرتين مشي للهلال براهو. (110) جمال الوالي بعد كدا ما بقدروا يقلعوا (شيبوب). لو عاوزين تصوروا معاهو زي ابوجريشة وعبدالتام في مطار الخرطوم ما عندنا مانع. ممكن تصوروا. وممكن تجيبوا مزمل وسلك يتصوروا معاكم للتوثيق وكدا. الزول دا تاني ما بتشوفوه. خلاص اقنعوا من شيبوب. شيبوب ..قصتو من البداية قصة لاعب (ضجة). لاعب بتاع اثارة. وصور. ودراما. وكسكتات. تبعته (الضجة) في كل خطواته…منذ ان كان في الموردة. شيبوب قعد معاكم سنة كاملة. سنة تقدروا في امير كمال. وتدللوا في راجي عبدالعاطي. وتنفخوا في بكري المدينة. وشيبوب قاعد ساكت. المسكين القون البجيبو ما بحسبوه ليه. ترفعوا في ابراهومة ومازن شمس الفلاح وتصعدوا فيهم للفريق الاول. وشيبوب ما في زول شغال بيه. شيبوب المسكين في البرد دا (هاوي). ولكن مع ذلك فقد نال اللاعب الدرجة الكاملة من غارزيتو. وغارزيتو ما بدي ليه لاعب ساكت ..الدرجة الكاملة. لو ما بنقطها …غارزيتو ولا بشتغل بيه. ولا بلعب. غارزيتو ما بجامل في حاجة زي دي. في كل يوم شيبوب كان بيثبت فيها انه لاعب (ضجة). الزول دا جاب ليه هدف في الاتحاد الجزائري. المريخاب ديل ستة شهور شغالين في عبرت ..وما عبرت. البلد قامت وقعدت. 6 شهور يعيدوا في الكورة ويحللوا في (اللمسة). عبرت – ما عبرت. لمن اللاعب زي ما قال رمضان أحمد السيد (عبر) بي هناك. شيبوب في عضمو (عبر). وشبع (عبور). وهم برضو شغالين لي في (عبرت ..وما عبرت). خالد عزالدين يقول ما عبرت. مزمل ابوالقاسم تاني يوم يقول عبرت. وشيبوب بخطط هناك في حاجة اكبر من كدا. الموضوع اكبر من كورة عبرت. وقت هم شغالين في (النشيد) حقهم ..عبرت وما عبرت ….الكاردينال شغال هناك في حاجة اكبر. الكسكتة شغالة. والجماعة قاعدين تحت الشجرة يتغالطوا في عبرت وما عبرت. في النادي. في المواصلات العامة. في المطعم. في الاذاعة – التلفزيون – الجرايد. شغالين عبرت ..وما عبرت. المريخاب خلوا صاحب الكورة واشتغلوا ليك في عبرت وما عبرت. المريخ طار. وهم شغالين عبرت ..وما عبرت. حصلت ازمة في الغاز ..والجماعة مدورين في الحوش – عبرت وما عبرت. الازمة خشت في البنزين …وهم برضو في عبرت وما عبرت. اللاعب طار. وهم برضو في عبرت وما عبرت. عليكم الله هسع (السقط) دا – سقط عبرت وما عبرت. اخر حاجة …الكاردينال ظهر ليهم وقال ليهم : (عبرت). هم في (البرد) دا افتكروها (الكورة) – والكاردينال قاصد حاجة تانية. الكاردينال قاصد (الكسكتة). هسه بعد اللفة الطويلة دي كلها …ممكن اطلع ليكم واقول ليكم بكل ثقة (عبرت). عبور مبالغ فيه. قبل كدا قلنا ليكم. شرحنا ليكم الحكاية. الفكي ابو تمانيات …قال ليهم. كلمهم. وقعد معاهم في الواطة في (البرد) دا. الفكي ابو تمانيات قال ليهم ممكن تجيبوه ..وتلعبوه معاكم. ما في مشكلة. اعملوا ليه (مهرجان) – اصلو ما بنسألكم. بشارك في المهرجان…(لقطوا بيه شوية قريشات). ناس ضفر وكريم الحسن قرش ما بجيبوها ليكم. ان شاءالله تعملوا ليه (اجازة رسمية). خصصوا ليه يوم في السنة. سموه اجازة شيبوب. اخطفوه. ولدكم وتخطفوه ..بي طريقتكم. ما في زول بيسألكم. تفرحوا بالموضوع دا زي ما عاوزين. ما عندنا معاكم مشكلة. ابو تمانيات قال ليهم الزول دا شفت بتسلق ليك (الماسورة)..وبنزل من الفندق. يقفز من الطابق الثالث – من الطابق الخامس. جميل. تعملوا بيه تمويه. ممكن. اصلو ما عندنا مشكلة. تخلوه (يتزحلق) في (البرد) دا من (الشباك)…برضو ما بنختلف معاكم. اي حاجة بتعملوها. تتنفخوا معاهو برد بي طريقتكم. تطلعوا ليه بدل فاقد للجواز. ممكن. اها قول قدرتوا على بدل فاقد للجواز ..وطلعتوا ليه (وثيقة). شيبوب في عضمو بتطلعوا ليه (بدل فاقد) كيف؟. شوفوا بلة جابر …ممكن يبقى ليكم بدل فاقد. موش الزول دا تعب معاكم في العملية. تحوموا بيه مطار مطار. ما بنقول حاجة. تجيبوه الساعة 2 صباحا عشان يتصور مع عادل ابوجريشة وعبدالتام ما بنختلف. يعني هي بقت على (الصور). تقعدوا معاه. يضرب ليه جمال الوالي تلفون…ما في مشكلة. اللاعب ذاتو يقعد مع اسامة ونسي وسوداكال ..ما عندنا قضية. ان شاءالله يقعد مع الامين العام للامم المتحدة. ان شاءالله تصوره مع (اوباما). هي بقت على (الصور) يعني. الفكي ابوتمانيات قال ليهم. الزول دا بتصور معاكم. ويتسلق ليكم الماسورة ووتطلعوه بطل في القفز.. يتكلم مع جمال الوالي…ساعة ونص ما في زول بيسألو. لكن في النهاية اللاعب بيرجع الهلال. وبيلبس (الكسكتة). بحوم معاكم المطارات دي مطار – مطار ..لكن برجع لي هلالو. بتزحلق ليكم بالماسورة. وبنزل ليكم من الطابق الثالث بالشباك. لكن برجع هلالو. خلاص لبس الكسكتة. شيبوب (اتكسكت). شوفوا ليكم موضوع تاني. شوفوا معتصم عبدالقادر. اعملوا ليه نفس الحركات. خلوه في المرحلة الاولى يتصور مع اسامة ونسي. اسامة ونسي بالتحديد – صور ابوجريشة ما بنحسبها ليكم. عبدالتام ما تصوروه لينا معاهو ..زي الزول الشال هم (الغاز). عبدالتام دا انبوبتو لو كملت من الغاز ..ما بعرف يتصرف ..عاوزنو يتصرف ليكم في (شيبوب). شيلوا معتصم عبدالقادر..ما عندنا اصلو مانع. خلوه يتكلم مع جمال الوالي. سفروه جوبا. الكلام دا كلو يكون سرا. نزلوه في فندق. ومن الفندق نزلوه بالماسورة. واعملوا بيه حوامة في المطارات الافريقية. نحن بعد ما تعملوا الجولة دي كلها وتتفقوا معاهو ..بنجي نشيل (معتصم عبدالقادر). ما عشان يلعب في الهلال. عشان يلبس (الكسكتة). ان شاءالله نوديهو اهلي شندي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). (حليمة بنت شاي البلح) …ما عندها اي رأي. وما عندها قول بعد (الكسكتة). تاني تقول شنو؟. تسكت ساي بس. ……………. و اسلم جاجة لشيبوب يلعب في نادي مصري من اندية الممتاز (ب) بعد اتفاق وتعاقد محكم بواسطة وكيل لاعبين والهلال. التسجيلات في مصر سوف تبدأ في يناير القادم. حكاية المريخ يشتكي لاعب (هاوي) دي جديدة علينا. لاعب (هاوي) إلّا تشتكوه في (الميناء البري). بس مطلوب اخفاء (شيبوب) نهائي من الانظار. الزول دا تاني لا تلفون ولا شريحة. طلعوه برة البلد. صورة ما تنزلوها ليه تاني. اوعكم تتلدغوا تاني. بيان المريخ دا كضب ساكت. جمال الوالي برنامج عودته للمريخ بتكون في اعادة شيبوب. عشان كدا اعملوا حسابكم. ونجضوا شغلكم. الشغل (الني) ما كويس. يا الكاردينال ما تثق في زول. ناس المريخ بعد الضربة دي ممكن يعملوا اي حاجة. اعملوا حسابكم من سفير السودان في مصر. عشان كدا في مصر …احترسوا. شهر خمسة ما بعيد. شهر خمسة باقى ليه خمس شهور و8 ايام. خلوا شيبوب في الحفظ والصون. ……… السيدة (ل) – (القرع) شايلها بدون سبب مع (البطيخ). وقرّط على كدا.
