دق الدلجة محمد عبد الماجد الاعلان رسميا .. (النقعة) منقطة كوارث
* محي الدين عبد التام نائب الامين العام للمريخ …زمان كنت فاكرو اسمو عبدالحي عبدالتام ..وكنت بكتبو كدا…رغم صورو الكتيرة وتصريحاته الاكتر من تصريحات جامعة الدول العربية. * الزول دا بالع ليه (جامعة دول عربية). * الاكيد عندو (قشارة) تصريحات. * بكب ليك تصريحات زي الليل. * كنت جادي في موضوع عدم معرفة الاسم …ما زي معتصم محمود لمن يقصد ليه زول ..يطلعو ليك ما بعرفو. * وبيبقى ليه في رقبتو. * عبدالحي دا اكتشفت اخيرا ان اسمو الصحيح محي الدين. * لكن محي الدين منو؟…إلّا استعين بي صديق. * كنت عاوز اقول ليكم (غوغل). * لكن لقيت (غوغل) كتيرة عليه. * ناس مزمل ما حافظين اسمو ..عاوزني احفظو ليكم انا. * محي الدين عبدالتام منذ ان جاء المريخ لم يقدم له غير (التصريحات). * تصريحات واستديو صور. * في التصريح الواحد بيكب ليه (71) صورة. * معسكر صور كامل. * الكاردينال العمل الجوهرة الزرقاء (3) طوابق. * وجاب عمار الدمازين. * وخلى شيبوب يلعب في شبيبة القيروان ..ما قاعد يصرح قدر تصريحات محي الدين عبدالتام. * وتصريحات محي الدين زي عكسيات بلة جابر. * بتمشي (الكشافات). * اول مرة اشوف لي (اداري) بلة جابر. * بلة جابر ذاتو خلى ليكم الكورة يا محي الدين. * يمين بلة جابر يلعب كورة مع مجلسكم دا ..يودي ليكم الكورة السماء. * الكشافات ذاتها ما بقيف عندها. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * محي الدين عبدالتام بعد تعادل المريخ امام هلال الفاشر في (النقعة) بقى لينا زي ماكينة التصوير. * بيصرح بس. * بقول في شنو؟..هو ذاتو ما عارف. * تصريحاتك دي لو عملتها (بصل) كنت غنيت. * يا زول اركز …التعادلات ماشه عليكم ..ح تشوفوها كتير. * تعادل واحد يعمل فيكم كدا. * اثبت. * ح تشوفوا كتير..ما تستعجل. * التعادل ذاتو ح يعتبر ليكم لاحقا مكسب. * عشان كدا ما تمد كراعك ساكت. * لحافكم صغير. * ضيّق عديل كدا. * تصريحاتك دي خليها للهزائم…ما في داعي تتطلعها هسع. * وقت تتطلعها في (تعادل) في الهزيمة تعمل شنو؟. * تقدم استقالتك. * محي الدين عبدالتام دا بيديني احساس الزول الراكب غلط. * الزول الماشي القضارف ..وراكب بص عطبرة. * ماشي ام درمان ..وراكب المحطة الوسطى بحري. * او زي الزول الراكب صاح ..لكن ما عارف المحطة النازل فيها. * كل ما تقيف الحافلة ..بقول للكمساري ..عليك الله ما تفوتني المحطة القلتها ليك. * ومحي الدين عبدالتام ..فات. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * عبدالتام نزل هجوم في الحكم …وهجوم في ارضية الملعب. * النقعة دي تقول اخترعوها الآن. * يا زول الهلال والمريخ عمرهم كلو بيلعبو في الفاشر في ميدان (النقعة). * يعني عاوز يعملوا ليكم (استاد) براكم. * وإلّا خلاص انتوا اتعودتوا على اللعب في (المكاتب)..ولجان الاستئنافات …بقت (الملاعب) صعبة عليكم. * بقوا يشوفوا (المتسطيل الاخضر) مشكلة. * تعالوا شوفوا عبدالتام قال شنو للجرايد والمواقع بعد مباراة (النقعة). * (رأى محي الدين عبد التام نائب الامين اعلان للمريخ أن اتحاد الكرة يعمل على قتل منافسته مع سبق الإصرار والترصد بالتساهل غير المبرر والمجاملات غير المقبولة وأضاف: لو كان هناك اتحاد صارم وحريص على نجاح منافساته لما سمح بإقامة مباراة امس الاول على ملعب النقعة ولو كان هذا الإستاد هو الخيار الوحيد المتاح في الفاشر لما قدمنا أي احتجاج على هذا الملعب لكن الكل وقف على الحالة الجيدة لأرضية إستاد الفاشر الرئيسي فضلاً عن توفر كل متطلبات السلامة في ذلك الإستاد ومع ذلك لم يهتم اتحاد الكرة بالوقوف على حقيقة الوضع في ملعب النقعة حتى يتأكد من عدم صلاحيته واذا استمر اتحاد الكرة في التعامل مع منافسة الدوري الممتاز بهذه الطريقة سيدمّر منافسته تماماً ، وانتقد عبد التام بشدة طاقم التحكيم الذي تم اختياره لإدارة مباراة المريخ أمام هلال الفاشر وقال إن الاتحاد لديه كوادر مؤهلة في التحكيم ومع ذلك اختار حكماً ضعيف الشخصية ففشل تماماً في إدارة المباراة وسهّل من مهمة لاعبي هلال الفاشر في ممارسة أسوأ أنواع العنف ضد لاعبي المريخ، وأشار عبد التام إلى أن النتيجة التي انتهت عليها المباراة لا تعبّر عن ما دار داخل المستطيل الأخضر وأضاف: برغم كل ما ذكرته عن سوء أرضية الملعب وعن التحكيم الضعيف الذي أدار المباراة والأداء العنيف من جانب لاعبي هلال الفاشر الا أن المريخ كان يمكن أن يخرج منتصراً بعددية كبيرة من الأهداف لولا الفرص العديدة التي ضاعت أمام المرمى من بكري المدينة وتراوري وأوكراه). * ح نأخد جزء ..جزء في هذا التصريح ..ونرد على الزول (الاشتر) دا. * محي الدين قال : (اتحاد الكرة يعمل على قتل منافسته مع سبق الإصرار والترصد بالتساهل غير المبرر والمجاملات غير المقبولة). * الزول دا راكب من وين؟. * يا اخوي ..عشان تكون عارف ..وعشان تاني ما تقول كلامك دا ..الاتحاد قتل المنافسة من يوم ان منحكم (6) نقاط ..لمباريات خسرتوه في الملعب. * منافسة شنو؟ …البتتكلم عنها الآن. * بعدين انت وقت بتعرف (مع سبق الاصرار والترصد) ما كويس!!. * شغال نائب امين عام ليه في المريخ. * مفروض تشتغل امين عام عديل كدا…عشان الامين العام ما بكون عارف الكلام دا. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * عبدالتام ارضية الملعب …ما اكتفي بيها ..قام اتجه نحو (التحكيم)…الشماعة البيمشي عليها اي فريق خاسر. * ( وانتقد عبد التام بشدة طاقم التحكيم الذي تم اختياره لإدارة مباراة المريخ أمام هلال الفاشر وقال إن الاتحاد لديه كوادر مؤهلة في التحكيم ومع ذلك اختار حكماً ضعيف الشخصية). * خلاص يا ناس الاتحاد عليكم الله تاني لمن تكونوا عاوزين تعينوا ليكم حكم لمباراة المريخ ..اعملوا ليه فحص شخصية في (البينية). * واصلو ..واطلاقا ما تجيبوا ليهم حكم ضعيف الشخصية. * يا سيد عبدالتام..انت لو بتعرف كورة ..لو شوية كورة بس (قدر زمن بدل ضائع ) ما بتقول كلامك دا. * لأن كلامك متناقض ..وما فيه اي منطق. * لو كان الحكم ضعيف الشخصية لانحاز للفريق الكبير ..فريق المريخ ..ما في زول ضعيف الشخصية يمكن ان يغضب جماهير المريخ واعلامه ..ولسانك الطويل دا. * دا طبعا اذا اعتبرنا ان الحكم ظلم المريخ. * عليكم الله بعد (ربع ساعة) زمن بدل ضائع ..الحكم عاوز يعمل ليكم شنو؟. * بعد كدا إلّا يبقى ليكم (سمير فضل). * يا عبدالتام ..انتوا كورة ..تجروا فيها ..وتعرقوا ما عندكم ليها قدرة. * وانتصار من غير اسامة عطا المنان وسمير فضل ما بتقدروا تحققوه. * عشان كدا الكورة دي خلوها ..شوفوا ليكم شغلة تانية. * الموضوع ما ملعب (النقعة). * انتوا عاوزين الاتحاد يكيّف ليكم (النقعة)..يركب ليكم مكيفات في الملعب ويفرشو ليكم موكيت ..ويجيب ليكم سمير فضل. * دي تاني ما بتلقوها. * انتوا لو عندكم (فكرة) – شوية فكرة ..بتعرفوا ان الهلال لعب في ميدان بي نحلو. * عاوزين تتكلموا لينا عن (النقعة) الآن. * الطامة الكبري ..في ختام تصريح زولكم دا يا ناس المريخ. * قال عبدالتام: (أن المريخ كان يمكن أن يخرج منتصراً بعددية كبيرة من الأهداف لولا الفرص العديدة التي ضاعت أمام المرمى من بكري المدينة وتراوري وأوكرا). * قال ممكن ينتصر وبعددية كبيرة من الاهداف. * يعني المشكلة ما في الملعب ولا في الحكم. * المشكلة في بكري المدينة وترواري واوكرا. * انت عاوز شنو يا عبدالتام بعد كلامك دا ..واضاعت الفرص العديدو امام المرمى…يعملوا ليكم شنو؟. * الحكم يمنحكم ضربة جزاء من فرصة ضائعة. * اما الملعب يجيبها ليكم زي (سمير فضل). * الحرب على الملعب ..لم تكن من الزول (المتطلع) دا براهو. * البلجيكي لوك ذاتو حفظوه الكلام دا. * لوك قال شنو: * (في حياتي لم أشاهد كرة قدم بهذا السوء ولم أشاهد تحكيماً أسوأ من هذا، ورداً على السؤال عن حديث مدرب هلال الفاشر محمد الفاتح الذي أشار إلى أن مدرب المريخ سهّل كثيراً من مهمته عندما أقدم على سحب الغاني كوفي قال ايمال : كان الأفضل أن يحتفظ برأيه لنفسه لأنه يعلم أن المريخ كان أفضل من فريقه بكثير بوجود كوفي وبعد خروج كوفي والمشكلة لم تكن في سحب لاعب بعينه بل كانت في الأرضية السيئة التي لم تساعد المريخ على تقديم مستواه الحقيقي وفي النهاية التبديلات مسئوليتي لأنني المدير الفني للمريخ وأنا أعرف ماذا أريد وما هي العناصر التي تستطيع أن تطبّق لي المطلوب وإن كان مدرب هلال الفاشر يعتقد بأنه أفضل مني عليه أن يتقدم ليدرب المريخ بدلاً عني). * بلجيكي (انتاج محلي). * انتاج العرضة جنوب. * الزول دا محروق كدا مالو؟. * الكلام دا ما كلام خواجات. * (وإن كان مدرب هلال الفاشر يعتقد بأنه أفضل مني عليه أن يتقدم ليدرب المريخ بدلاً عني) في مدرب عاقل بقول الكلام دا. * منو القال ليك مدرب الفريق المنافس بتقدم لتدريب الفريق الاخر ان كان افضل من مدربه. * دا منطق شنو يا جماعة. * انتوا الجماعة (المجليين) ديل بتجيبوهم من وين؟. * غايتو لو كانت في (امم متحدة) حقيقة ، بعد كلام عبدالتام ولوك مفروض تعلن (النقعة) منقطة كوارث. * خاصة ان لوك اجنبي. * انت لو مع هلال الفاشر بتجرسوا كدا ..مع مريخ الفاشر تعملو شنو؟. * البعرفو ..من هسع قدمتوا (مبررات) الخسارة. * وقدمتوا السبت للحكم ..عشان تلقوا منو الاحد امام مريخ الفاشر. * ……… و * اللهم ارحم واغفر لعوض احمد طه فقد كان الاداري القدوة الحسنة للناس في الرياضة. * ……. * السيدة (ل) – البلد دي فيها ازمة (اقواس)..عشان كدا الليلة ما بقول اي حاجة. * وقرّط على كدا.
