بالعربي الكسيح محمد الطيب الأمين (أكلنا) في حنانا لما ظهرت لينا (كرش) !! * من ذكاء الشعب السوداني إنه أطلق علي (البطن الكبيرة) إسم (تلاجة) .. * يقول ليك : (فلان ده عندو تلاجة) .. * والتلاجة هي (الكرش) أو (البطن الكبيرة) .. * والكرش الكبيرة عندنا إرتبطت بشراب (الموية الباردة) .. * يقول ليك فلان ده لقى الموية الباردة وعمل ليهو (كرش) .. * الكلام ده كان زمن الموية الباردة كانت حاجة مدهشة .. * زمن كنا فاكرين (البيبسي) بجيبوهو من الصيدلية .. * والله صحي .. * أنا في حاجتين عرفتهم بعد ما بقيت كبير : (طعم البيبسي والمريخ) .. * المريخ والبيبسي عرفناهم بعد كبرنا .. * المهم .. في ناس من تشوفهم كده بتعرف إنو الزول ده لما يبقي كبير بيكون عندو كرش .. * مثلا عندك زي تراوري ده .. * تراوري ده لما يحصل الأربعين ح تظهر ليهو كرش .. * أما الأخ مهند الطاهر واضح جدا ما ح تكون عندو كرش .. * الكرش تجي لمهند بي وين وهو شغال (يجلد) في جمال سالم .. * مهند الطاهر أول أمبارح (ورنش الكدارة) .. * أول مرة في حياتي أشوف لي كدارة بورنشوها .. * ما حصل سمعنا بكدارة عملوا ليها ورنيش .. * لكن من مهند الطاهر تتوقع أي حاجة .. * والله صحي .. * وأنا أجزم ليكم مهند الطاهر بين الشوطين شرب (قهوة) .. * مهند ده ولدنا وإحنا عارفنو .. * كورة القهوة ظااااهرة .. * مهند لما المباراة في الشوط الأول تكون (معصلجة) طوالي بين الشوطين بيشرب ليهو قهوة .. * ولو شرب القهوة معناها في هوبا جاية .. * والهوبا لو جات معناها الرماد كال حماد .. * وإحنا لينا يومين بنقول مهند عندو قون في شبكة المريخ .. * يومين بنتكلم عن هدف مهند وعن تخصص مهند في الحراس الأجانب .. * داير تِزعل مهند قول ليهو الحارس ده من بره البلد .. * لو داير (تجنن) مهند بس قول ليهو الحارس ده أجنبي .. * ياخ قبل كده لعبنا مع أهلي الخرطوم الموسم قبل الفات .. * وكان حارس الأهلي أكرم الهادي .. * والشوط الأول كان تعادل .. * بين الشوطين ناس بشه قالوا لمهند : (حارس الأهلي ده يوغندي) .. * مهند شايف الحارس أكرم لكن ناس بشه أقنعو إنو ده ما أكرم ده حارس أجنبي .. * مهند صدق .. * وعينك ما تشوف إلا النور .. * في خمس دقائق مهند جاب قونين .. * مهند عندو مشكلة مع العمالة الاجنبية .. * من زمن رمزي صالح وشيكوزي والحضري ولحدي زمن جمال سالم .. * وبصراحة كده ناس المريخ لو دايرين يرتاحوا من أهداف مهند دي عندهم أربعة حلول (3) هي : يسجلوا مهند أو لو قابلوا مهند ما يكون الحارس أجنبي .. * والله صحي .. * وكونو مهند يلبس شعار المريخ دي من المستحيلات السبعة .. * المهم .. * نرجع لموضوع الكرش .. * عندنا في ونستنا العادية لما الزول تحصل ليهو حاجة بيقول ليك : (والله حارة لكن أكلتها في حناني) .. * يقول ليك : حرقتو لكن أكلها في حنانو .. * وإحنا بصراحة من كترت ما (أكلنا) في حنانا الواحد ظهرت ليهو (كرش) .. * كرش عاطفية .. * كل مرة نأكل في حنانا لحدي ما عملنا (تلاجة) .. * والسنة دي يا جماعة المريخ ح يعملوا ليهو تلاجة كبيرة جدا .. * السنة دي كلها المريخ ح يأكل في حنانو .. * في الأبطال أكل في حنانو وفي الكونفدرالية ح يأكل في حنانو وفي سيكافا برضو وفي الممتاز كذلك .. * يعني الكرش جاية جاية .. * بالذمة ده حال فريق داير ينافس علي بطولة ؟؟ * والله فريقكم ده (بستلة) ما ينافس عليها .. * قوموا لفوا ياخ .. * ولسه الغريق قدام .. * راجيكم المراكش المغربي .. * والمراكش ده برقش براهو .. * تمشوا للمراكش بفريقكم ده علي بالنعمة تجوا من هناك ترقشوا عديل .. * والسنة دي بالذات إحنا يا متنا من الضحك ويا كمان الضحك كلتنا .. * وأنا لاحظت حاجة .. * اللقيمات بقت ما جايبة حقها مع ناس المريخ .. * والله صحي .. * لازم تقلبوا التخصص .. * كده جربوا (البسبوسة) .. * ما هو ماممكن اللقيمات تكون شغالة موسمين .. * لازم يكون في تنويع .. * السنة الفاتت لقيمات يفترض السنة دي تكون بسبوسة والسنة الجاية تورتة .. * معقولة إنتو شغلكم ما عارفنو ؟؟ * يعني إلا نوريكم شغلكم ؟؟ * هسه الإتحاد بتعامل معاكم بذكرى اللقيمات القديمة .. * أجل ليكم مباراة كادوقلي تقديرا للقيمات السنة الفاتت .. * ومباراة كادوقلي لو ما إتأجلت كان بين الدورتين ممكن الهلال يستلم الكاس .. * غايتو جنس غايتو !! * المهم إن شاء الله الناس تكون عرفت الفرق بين الهلال والمريخ .. * الهلال كله جراح ومع ذلك يحقق الإنتصارات وينفرد بالصدارة .. * الهلال تخلص من كل الأجانب ومع ذلك في الصدارة .. * الهلال يعاني من أزمة إدارية وأزمة إعلامية ومع ذلك في الصدارة .. * ودي عظمة الهلال .. * إحنا لما الهلال يترنح بنقسو عليه وهي قسوة حب وعشق .. * والزول البيحب ما بكره لكن بنتقد حتى ولو كان النقد قاسيا .. * وإنفعالاتنا النقدية مع الهلال عادة تكون بحجم حبنا له .. * ولكن تعال شوف إعلام المريخ .. * والله أنا مرات بحس إنو فعلا المريخاب ديل هم هلالاب زعلانين .. * بحس كده .. * واي زول طبعا حر في (محاسيسو) .. * المريخاب ما بعرفوا ينتقدوا فريقهم .. * أكتر فريق مؤهل للنقد هو المريخ ومع ذلك لا يجد من ينتقده .. * عشان كده المريخ ح يكون مريخ ليوم الدين .. * ح يكون وصيف .. * ح يكون ضل .. * ح يكون دخان .. * والله صحي .. * غايتو باستعجال كده كتبنا عن مهند الطاهر ولكن غدا لو الله أدانا عمر سنتحدث عن هذا الإنتصار الذي حققه هلال الأبيض من خلال صفحتين تحت إسم (بين شارعين وناصية) .. * لسه .. الفوز ده ح نتكلم عنه أسبوع كامل لو ما متنا .. * ويا مهند إن شاء الله يوم شكرك ما يجي .. * و..و.. * ومن حور الجنان أم أنت …(من كسلا يا غزال) ؟؟