دق الدلجة محمد عبد الماجد القون يجيبو مهند الطاهر ..يصفقوا لي احمد هارون هدف مهند الطاهر في المريخ – يتخيل لي الوالي احمد هارون لعب دور كبير فيه. السياسة دخلت في الكورة بصورة عجيبة. الكورنر بقى لو ما عندك خلفية (سياسية) ما بحسبوه ليك. القون – إلّا يكون عندك (ضهر). الاقوان في العالم كله بتسجل ب (القدم) وب (الرأس) – إلّا في السودان ، الاهداف بتسجل ب (الضهر). عندك (ضهر) بتجيب قون. ما عندك (ضهر)…ولا تحلم. ما بقول ليكم احمد هارون مرر الكورة لمهند الطاهر. ولا بقول ليكم احمد هارون هو الذي سدد الكورة. ما بقول ليكم كدا. دي كبيرة ما بقدر اقولها ليكم. ما عاوز اكسر تلج للوالي زي ما بعمل اعلام المريخ…انا عندي منطق في الكلام دا. اعلام المريخ زمان..القون يجيبو عبدالحميد السعودي – يصفقوا لي جمال الوالي. يجيبوا طمبل ..اعلام المريخ بكريتها تلقاهم بتغزلوا في جمال الوالي. القون يجيبو فيصل العجب – الناس تصفق لي جمال الوالي. القون يجيبو راجي عبدالعاطي – الناس تصفق لي جمال الوالي. القون يجيبو كلتشي – يصفقوا لي جمال الوالي. القون يجيبو بكري المدينة – يصفقوا لي جمال الوالي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). هسع لو اشتغلنا بي نفس الفهم دا – مهند الطاهر بعد ما جاب قونو – مفروض الناس تصفق لي احمد هارون. طبعا انا عندي منطقي في الحتة. لولا الوالي احمد هارون – الاتحاد العام كان قام بتأجيل مباراة المريخ امام هلال الابيض. ما كان بتتلعب. الظاهر اي فريق ما عندو (والي)…ما عندو (ضهر). انتوا تفتكروا الاتحاد العام ليه قام بتأجيل مباراة المريخ امام اهلي شندي. عشان اهلي شندي ما عندو (والي). وتفتكروا الاتحاد العام ليه قام بتأجيل مباراة المريخ امام هلال كادوقلي. عشان هلال كادوقلي ما عندو (والي). المضحك ان الاتحاد العام برمج مباراة هلال كادوقلي امام المريخ في شهر رمضان. وما عارفين كيف سوف تلعب هذه المباراة (عصرا) في رمضان. يبقى ذلك اعلان منذ الآن على تأجيل مباراة هلال كادوقلي والمريخ في تاريخها القادم. الاتحاد العام ح يقول لينا المباراة مقامة في رمضان …واستاد كادوقلي ما فيه (كشافات) لذلك تم تأجيل المباراة. انتوا من غير رمضان بتأجلوها. وبي كشافاتكم سبق ليكم التأجيل. ما تأجلوها في تلك الظروف. يضعوا المباراة مخصوص في رمضان عشان يلقوا ليهم سبب للتأجيل. تأجيل مباراة المريخ امام هلال كادوقلي يعني تلقائيا تأجيل مباراة الاهلي شندي والمريخ. وتأجيل مباراة الهلال والخرطوم الوطني. وتأجيل مباراة الهلال والمريخ. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الهلال طبعا ما بيلعب اي مباراة قبل حسم تلك المباريات المؤجلة. عشان كدا الاتحاد قاعد يلعب علينا. كان منذ الآن يقول ان المباريات سوف تلعب بعد رمضان. او لن تلعب في الاساس. الناس ديل وقت متجرسين كدا – ممكن نعفيهم عن مباراة هلال كادوقلي. وممكن نعفيهم عن مباراة اهلي شندي. لكن خلونا نقول من هسع مباراة المريخ في عطبرة ح يعمل المريخ فيها شنو؟. اذا كان في (كادوقلي) بتجرسو كدا. في عطبرة بتعلموا شنو؟. الاتحاد العام بي حالتو دي ممكن مباراة المريخ في عطبرة يحولها بي كل بساطة الى بورتسودان. ممكن يعملوها. اذا كان الاتحاد العام الى الآن ما قادر يحسم مباراة المريخ في كادوقلي – تفتكروا ح يقدر يحسم مباريات المريخ في عطبرة. مباراة واحدة في كادوقلي بعلموا لينا كدا. مباراتين في عطبرة ح تصرفوا فيها كيف؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الاتحاد العام طبعا منتظر المريخ يعمل ليه جهاز فني جديد. ويجيب ليه مجلس ادارة جديدة. من ثم يقوم يبرمج ليهم المباريات. منتظرين جمال الوالي يرجع. هذه المباريات سوف تظل معقلة كدا الى ان يرجع جمال الوالي. الجرسة البعمل فيها المريخاب دي …ما بتسمح للاتحاد العام ببرمجة مباراة (صعبة) للمريخ. إلّا الفريق الذي يباري المريخ يكون عندو (والي) اقوى من (والي) المريخ. والي زي (احمد هارون). اذا الى هدف الغزال بنلقى الهدف عمل عمائل في المريخ. غزال يعمل فيكم كدا. اول مرة اشوف لي (غزال) ممكن يعمل في فريق كدا. انتوا عارفين هدف مهند الطاهر عمل شنو في المريخ؟. اول شيء عملها الهدف – عمل جمعة الرحيل لمجلس المريخ. هدف يشيل ليه (مجلس)..دا ما سمعنا بيه قبل كدا. هدف مهند الطاهر شال الجهاز الفني للمريخ. انتوا تفتكروا برهان تية دي جابو الدرب. الزول دا عينو في المريخ هدف مهند الطاهر. عليه فان الاطاحة بالمدرب البلجيكي اصبحت مسألة وقت. مهند طاهر ايضا اطاح بأكثر من (11) لاعب سوف يشطبهم المريخ في التسجيلات القادمة. قد يبقى بعضهم فقط لأن المريخ ما عندو قروش. هدف مهند الطاهر في المريخ لو في ادارة واعية كدا وبتعرف شغل الكورة طوالي تنزل الكشافات. وتركب ليها كشافات جديدة. ويبدأوا في الطابق الثالث. حالة الفزع التى فيها المريخ الآن ما في حاجة بتثبتها غير (الطابق الثالث). اقول ليكم حاجة تانية ما تطلع برة العمود دا. شوفوا ليكم (سيكافا) مستعجلة. اشرعوا طوالي في سيكافا. الفريق محتاج ليه (سيكافا) مستعجلة. سيكافا (فورية). فريقكم دا لا بثبت في الممتاز. ولا بثبت ليكم في (الترضية). انتوا في الممتاز من (6) نقاط جبتوا ليكم (نقطة) واحدة – في الكونفدرالية ح تعملوا شنو؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الكاردنيال لو ما لحق السوق ..ح ترفعوا لينا سعر (الطوب). والاسمنت طار السماء. والسيخ. الناس ديل موسمهم دا إلّا يقلوبه تشييد للطابق الثالث. الكورة اقنعوا منو. الغريبة نحن فريقنا ماشي لي قدام. وجهازنا الفني جديد. والشغل في الجوهرة الزرقاء ما فيه كلام. والتسجيلات ..اسكتوا خلوها ساكت. وشيبوب بسخن برة. يعني مواضعنا كلها تمام والحمدلله. كشافاتنا ركبوها. انتوا لا كورة. لا جوهرة. ولا كشافات. ولا شيبوب. انتوا القاعدين ليها شنو؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. و غزال الابيض عمل فيهم كدا اسود كادوقلي تعمل ليهم شنو؟. والله (نمور) شندي تقطعكم قطيع. الاتحاد ليه حق يؤجل المباراة. دا انا بخاف من (الغزال) يطلع لي (نمر). علي جعفر حافز تسجيله تموه ليه (ضربات جزاء). الكوكب المراكشي رفع شكوي ضد هلال الابيض ..قال غزال الابيض ما خلى لينا حاجة في المريخ. جمال سالم – لو عندك قروش عند ناس المريخ شيلها قبل مباراة الكوكب المراكشي. اسامة عطا المنان تحرك من اجل تأجيل مباراة الكوكب المراكشي. رضا مصفى الشيخ لا جاب لقطة لمباراة الابيض. ولا مباراة الخرطوم الوطني. عالم الرياضة عملوا لينا كلو (اعلانات). موضوع ما عندهم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. السيدة (ل) – الاسماك الميتة الايامات دي جابت ليها حركة. وقرّط على كدا.