دق الدلجة محمد عبد الماجد الوك سجلوه في (نوفمبر) وعاوزين يعتمدوه في (مايو)… مقال قديم ايام (قابيتو) كتبته تحت عنوان (حفلتنا بي قابيتو) ، واظن ان الهلال كان يلعب امام المريخ، وقد تألق (قابيتو) امام المريخ وكانت الحفلة فعلا بي (قابيتو) ، في الوقت الذي كان يردد فيه اعلام المريخ عن عدم قانونية مشاركة (قابيتو) مع الهلال باعتباره (قاصر). مرة يقولوا قاصر. ومرة يقولوا ليك الزول دا (محترف) وكان يعامل في المريخ معاملة (المحترفين). نحن مالنا ومال (المعاملة). نحن علينا ب (الورق). الليلة يمكن ان نقول الحفلة ان شاءالله ح تكون بي (شيبوب). مجلس الهلال قالوا طلع لمباراة اليوم تصديق (حفلة) من النظام العام. المباراة الليلة ما كورة – المباراة الليلة غنا. غنا عديل. تعالوا شوفوا (النطة). تعالوا شوفوا (القفزة). واي زول عندو سؤال عن كورة شيبوب في الجزائر هل عبرت ام لم تعبر؟ يكتب السؤال في ورقة ويقدمه لشيبوب. الليلة ح نشوف الموضوع دا. هل عبرت ام لم تعبر؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). شيبوب ح يقدم ليكم (الحزن القديم) – ويهديها للمريخاب. وشيبوب في الفاصل التاني ح يقدم ليكم فاصل كامل من اغنيات (الحقيبة) ، ح يبدأ ليكم (من نوم عيني البقى لي سهر) لغاية (هلالي اتجل واتكمل). الفاصل الثالث ح يكون باقة من الاغاني الحديثة …ح يغني لي سيد خليفة واحمد المصطفى وعبدالعزيز محمد داؤود. حفلتنا بي (شيبوب). سادومبا ممكن يشارك بي (فاصل). ما بديكم سادومبا اكتر من فاصل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الليلة الدخول للجوهرة الزرقاء قالوا ح يكون عن طريق (السيستم). ناس الهلال الليلة ذاتهم ما عارفين يتصرفوا كيف؟. ح يتفرجوا في (الكشافات) – ام ح يتفرجوا في (شيبوب). عشان كدا لازم نطبق (السيستم). اتخيلوا – لو صدرت (قرارات) استوجبت ادخال نظام الفيفا (السيستم) في حياتنا العادية، تتخيلوا البحصل شنو؟. المسألة كان ح تتعقد شديد. ح نتعب جنس تعب. ونحن ما ناقصين (اللولوة) دي كلها. لو ناس الحكومة قالوا ما في (بصلة) تدخل البيت إلّا بياناتها تتطابق مع (السيستم). يعني يعرفوا (البصلة) دي اتزرعت وين؟. وشربت شنو؟… موية النيل ام قامت بالري المطري؟. واتخزنت وين؟. ووصلت البيت كيف؟. وهل استوفت (البصلة) كل مراحل (الرسوم) التى مرت بها البصلة منذ ان كانت (تقاوي) الى ان بلغت (حلة الملاح). طبعا (الرسوم) التى تتفرض على (البصلة) بتخليها هي و(التفاحة) في درجة واحدة. انتوا قايلين (نبقنا) دا ..كان حجمو كدا.. ابدا ..(النبق) حقنا كان في حجم (النبق الفارسي) – لكن (الرسوم) الكتيرة على (النبق) خلت نبقنا في حجم (حبة البندول). (النبق الفارسي) حجمو كبير كدا عشان هناك ما في (رسوم) عليه. هسع شايف الجماعة عاصرين على (البطيخ). البطيخ دا ممكن يوم تصحوا الصباح وتلقوه في حجم (البرتقال). نحن هسع عاوزين نطبق نظام (الفيفا). النظام العالمي الكروي. نحن لازم نكون ناس منظمين. ونتبع (السيستم) في كل تحركاتنا. العالم من حولنا تطور وتقدم – ونحن لسه واقفين مع (سيد اللبن) في خشم الباب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المريخاب كانوا عشمانين في (السيستم) يرفض (شيبوب) ، فاكرين (السيستم) دي (لعبة) في ايدهم. زي (السيستم) البرمجوه لفرض (اليأسو). ناس اسامة عطا المنان ديل (سيستم) ما مضمون. سيستم شغال بي المزاج. انتوا قايلين لو جمال الوالي كان رئيس نادي المريخ ما كان (السيستم) رفض ليكم (شيبوب). الشيء الغريب ان الاتحاد العام الى الآن لم تجتمع لجانه لاجازة التسجيلات الاخيرة. عاوزين اجازة شيبوب. بعد وصول كرته. واجازة سيستم الفيفا له. ولجنة التسجيلات. الاتحاد العام بتأخر في (اجازة) شيبوب – عشان ما قادرين يعلنوا عن بطلان قيد الوك في المريخ. في لاعب بسجلوه في التسجيلات الماضية ..وبعتمدوه في التسجيلات الاخيرة. سجلوه في الرئيسية وعاوزين يعتمدوه في التكملية. الامر الذي يثبت بطلان قيد الوك في المريخ – ان اعلام المريخ وصحفه عندما فشل مجلس المريخ في احضار اللاعب للتوقيع في كشوفات المريخ مرة ثانية قام بنشر (صورة) السابقة عندما وقع في كشوفات المريخ في تسجيلات نوفمبر. ولم تتم الاشارة الى ان الصورة (ارشيفية). هذا الامر وحده يثبت بطلان قيد الوك ..في تزوير في الصور. الوك في تسجيلات نوفمبر نفسها …جابوه الصباح مع (النجمة) للاتحاد العام عشان يوقع في ظروف غامضة. انظر الى اي خطوة غير صحيحة في الاتحاد العام سوف تجد خلفها اسامة عطا المنان. اسامة عطا المنان هو الذي اشرف على قيد الوك في المريخ في تسجيلات نوفمبر. واسامة عطا المنان هو الذي يقف وراء اعارة احمد بيتر للوادي نيالا. واسامة عطا المنان هو الذي قال ان السيستم رفض بيانات (اليأسو). لذلك فاننا نقول ان وجود اسامة عطا المنان وحده في الصورة مع الوك وهو يوقع في كشوفات المريخ يؤكد ان قيد اللاعب غير صحيح. لاعب تسجلوه (وطني) – من غير اي مستند (وطني) – عاوزين تعتمدوا لينا (محترف) وهو وقع في كشوفات المريخ بعد قفل سيستم المحترفين. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). عليه (الوك) دي باختصار شديد. ومن غير لف ودوران. الوك دا إلّا يلعب ليكم في (الوادي نيالا). ناس المريخ لو كانوا (شفوت) زي ناس الهلال كان يعيروا (الوك) الى الوادي نيالا. نخلي (الوك) ونمشي لي (شيبوب). المدير الفني للمنتخب الوطني مفروض بعد مباراة اليوم يضم شرف شيبوب للمنتخب. اتوقع ان يحدث ذلك من مازدا. خاصة ان لاعبي المريخ كلهم في (اجازة). كلهم بشكوا من (الاصابة). لذا لا بد من اضافة شيبوب للمنتخب الوطني باعتبار ان الهلال هو الفريق الذي يتمرن هذه الايام. وهو الفريق الذي كان يتدرب بشكل يومي منذ قرابة الشهر. وهو يلعب اليوم امام سان جورج. كل هذه الاشياء تجعل اضافة عناصر جديدة للمنتخب من لاعبي الهلال امر لا بد منه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. و نرجع للسيستم. يوم داك (جبنا) لينا (كديسة) من برة. قلنا نشوف بياناتها في (السيستم). قدر ما حاولنا السيستم رفض بيانات (الكديسة). اخر حاجة كشحنا لينا (كباية لبن) في السيستم ..عشان يقبل بيانات (الكديسة). انتوا قايلين (السيستم) بعد كباية اللبن ما قبل بيانات (الكديسة). هسع بي صراحة (السيستم) بتاع الاتحاد شغال ب (اللبن). بكرة ان شاءالله (شيبوب) اخر. ابقوا في الانتظار. ……… السيدة (ل) – في زول بفتش ليه (موبايل) يشتغل بي (حجارالبطارية) مع قطوعات الكهربة الكتيرة دي ..تفتكروا بلقي موبايل ب (السيستم) دا. وقرّط على كدا.
