بالعربي الكسيح محمد الطيب الأمين بعد هدف شيبولا العضم بقى هو البيدخل فى رمضان !! * لما رمضان يدخل في عضم الزول عادي .. * لكن الما عادي لما الزول يدخل في عضم رمضان .. * وأمس الأول الهلال أدخل المريخ في (حتة صعبة جدا) .. * شيبولا شال رمضان من عضم مصعب ودخل مصعب في عضم رمضان .. * والمقصود رمضان الشهر وليس رمضان عجب .. * حاجة تكسف .. * درجة الحرارة الموجودة في (كراع) جمال الوالى أعلى من درجة الحرارة في بورتسودان .. * الزول ده شدة كراعو ما حارة عادى ممكن يكوي بيها جلابية العيد .. * كان أخير ليكم أسامة ونسي والله .. * أسامة ونسي مفلس لكن كراعو ما حارة .. * إنتو تانى قبل ما الحكومة تعين ليكم رئيس لازم تشوفوا درجة حرارة كراعو خاصة لو عندكم مباراة أمام الهلال .. * الحكومة وفرت للوالى كل شئ ما عدا (البرودة في الكراع) .. * غايتو جنس غايتو !! * قبل إنطلاقة المباراة معظم المريخاب كانوا خايفين من الهلال ولذلك فضلوا الجلوس على (القهاوي) ، وعندما سجل ضفر (هدف الصدفة) كلو المريخاب إقتحموا أندية المشاهدة .. * وبعد دقائق معدودة نفس المريخاب الدخلهم ضفر أندية المشاهدة طلعهم شيبولا الى القهاوي .. * ونفس المريخاب الطلعوا من القهاوي بأمر من شيبولا ذهبوا للبيوت بأمر من سادومبا .. * وإحنا بالجد متنا من الضحك والضحك كتلنا .. * وفي النهاية نرجع ونقول : (العارف عزو مستريح) .. * أعتقد أن المريخاب وخلال (90) دقيقة ماتوا ثلاثة مرات .. * المرة الأولى لما شيبولا جاب الهدف .. *وهدف شيبولا إسمو (الدعم السريع) .. * والمرة التانية ماتوا لما ساسا جاب الهدف .. * وهدف ساسا إسمو (سريع الدعم) .. * والمرة التالتة ماتوا لما شيبوب نزل أرض الملعب .. * دخول شيبوب كان أشبه بالزول المهم البيجي يبارك للعريس في آخر خمسة دقائق من زمن الحفلة .. * شيبوب دخل من أجل (المباركة) .. * وحسب ظني أن دخول شيبوب (أوجع) المريخاب أكثر من وجع (الضرس في ليل الشتاء) .. * وتبكو بس .. عين قطرة وعين مس .. * حزين جدا منظر علاء الدين يوسف وهو يهرب من مواجهة نزار حامد طوال زمن اللقاء أمس الأول .. * كل الناس شافت فييرا بيجري من أمام نزار خوفا من المراوغة .. * خجلان من المراوغة .. * فييرا بقى مسكين .. لا لياقة بدنية ولا شجاعة أدبية .. * وفييرا هين .. ناس مصعب ونمر وعطرون كانوا بتعازموا على شيبولا .. * عطرون بيقول لنمر خش عليهو ، ونمر بيقول لعطرون خش عليهو انت أنا قبل شوية خشيت عليهو .. * بتعازموا .. * كل واحدة خايف على (ركبتو) .. * خايفين على الركبة والرباط الصليبي .. * وإحنا متنا من الضحك والضحك كتلنا .. * لكن نرجع ونقول : (العارف عزو مستريح) .. * قالوا بعد المباراة إنتهت لعيبة المريخ طلبوا يصوروا (سلفي) مع شيبولا وشيبوب .. * يا جماعة والله الفرق كبير بين الهلال و(الإصيفر) .. * وأنا ما بقصد الفارق في النقاط .. * فارق النجومية والهيبة والإمكانيات .. * المريخ ده أمبارح ما فيهو نجم ، ولا فيهو زول ممكن تتصور معاهو (سلفي) .. * كلهم مواطنين ساكت .. * بتحس بيهم (باهتين) كده .. * زي الزول القايم من ملاريا .. * هو عليك الله لو ما ساي إرادة في زول بيلبس أحمر في رمضان .. * مشكلتكم كلها في شعاركم ده .. * أنا من الله خلقني ما لقيت لي شعار بشبه (كبسولات النزلة) إلا شعاركم ده .. * طبعا كبسولة النزلة من فوق أحمر ومن تحت أصفر .. * وإحنا متنا من الضحك والضحك كتلنا .. * داير أقول حاجة .. * يا جماعة لما الزول في يوم عرسو يجي (غبار) أهلنا بيقول ليك : (فلان ده زمان كان بيأكل في الحلة) .. * ما بيأكل من الصحن .. * يعني بيأكل (الملاح من حلتو مباشرة) .. * وأنا ما عارف علاقة الأكل في الحلة بالغبار البيجي يوم عرس الزول الأكل في الحلة شنو ؟؟ * ما عارف العلاقة شنو لكن كل البقدر أجزم عليهو إنو جمال الوالى لما كان صغير بيأكل في الحلة .. * والله صحي .. * عشان كده الوالى كل مايظهر بتظهر إنتصارات الهلال .. * ولذلك إحنا وأولاد حلتنا نرى أن مشكلة المريخ كلها تكمن في (الحلة التى كان جمال الوالى يأكل فيها أيام الطفولة) .. * وعموما .. نرجع ونقول : (العارف عزو مستريح) .. * وفي الهلال (عزة جد) .. * الهلال عظيم بهذه الجماهير الوفية التى شجعت وإستحقت هذا الفرح .. * (15) رمضان الهلال في السماء إكتمل وهلال الأرض كذلك .. * وإحنا والله سعداء بهذا المدرب المقتدر وسعداء بهؤلاء النجوم الأشاوس الذين قهروا المريخ وهزموا التحكيم واللقيمات .. * نهنئ نجوم الهلال من أكبر واحد ولحدي آخر العنقود شيبوب .. * وبالمناسبة .. * شيبوب شارك (رجاااااااااله كده) لو فيكم زول بيقدر يوقفوا خلى يوقفوا .. * بنديكم ستة شهور لو بتقدروا توقفوا شيبوب .. * إنتو لو بتوقفوا كان توقفوا شيبولا الذي أعاد تخطيط شوارع دفاعكم الخفيف .. * دفاعكم ده بأمر المهندس شيبولا طلع عشوائي .. * دفاع زي ده مكانو كاس السودان .. * أنا والله ما في حاجة مزعلاني إلا الوهم .. * الناس ديل عندهم أوهام غريبة عديل .. * جايين يغلبوا الهلال .. * كلام يا عوض دكام .. * الهلال سجم خشمو لو بتغلب من فريق زي المريخ ده .. * قلتوا لي الهلال في عهد الكاردينال ما فاز على المريخ ؟؟ * خلاص كويس .. * ما فاز فعلا .. * ومباراة أول أمس دي بنعتبرها ليكم تعادل .. * لانو إنتو أصلا عندكم ضربة جزاء ما حسبوها ليكم .. * نعتبر المباراة تعادل .. * بس إن شاء الله (الإضاءة) تكون عجبتكم ؟؟ * وعندي ليكم نصيحة لوجه الله .. * بشكلكم ده تانى ما تلعبوا قدام الهلال .. * ما كل مرة بتسلم الجرة .. * هسه أفرض إنو الهلال كان أشرك الثعلب وشيبوب وأبوعاقلة والشعلة وولاء الدين من البداية .. * أفرض كده .. * قطع شك كان المباراة بتنتهى سبعة عديل .. * ودى مخاطرة والله .. * خليكم عاقلين .. * لما تحسوا إنكم ما جاهزين أهربوا من المباراة .. * وأظن لما تهربوا قبل المباراة أفضل من إنكم تهربوا أثناء المباراة زي ما فعل الأخ زيكو .. * زيكو ب(الضاء) ؟؟ * ونركب صافنات ونجيبة (نيجيرية) وأصلو الزول بيموت والذكرى تفضل حية .. * و..و.. * وأبقوا رضيانين بيها قسمة والجاية من …(شاشا بتصيب) ..
