بالعربي الكسيح محمد الطيب الأمين الكاردينال وزع الحوافز لنجوم الهلال ونسى مصعب عمر !! * بشكل قاطع أكد رئيس الهلال أشرف الكاردينال أن والى الخرطوم لم يدعم المريخ .. * حينما قال الكاردينال هذا الحديث المريخاب دايرين يطيروا من الفرح .. * ولكن الكاردينال بعد دقيقتين عاد وقال : (أنا دعمت المريخ وساهمت في الأستاد) .. * ولما قال كده المريخاب دايرين يموتوا من الزعل .. * وبيني بينكم أخير يكون والى الخرطوم دعم المريخ بدلا من ان يكون الكاردينال هو الذي ساهم في بناء استاد المريخ .. * حتى إستادكم طلع ما إستادكم .. * يعني بالميت كده طابق شاخور ده بيكون حق الكاردينال .. * يفترض تسموهو طابق كردنة .. * والله صحي .. * البعجبني في الكاردينال كلو مرة بجدع لينا كرت من (الجواكر) العندو .. * وأعتقد أن كرت (دعمه للمريخ) هو كرت مهم ومن شأنه أن يجعل جمال الوالى يلزم الصمت .. * خير الكاردينال شمل حتى المريخاب .. * وبعد ده يتفاصحوا .. * والمشكلة إنو الكاردينال ما إكتفى بالدعم السابق بل ذهب أبعد من ذلك وقال أنه مستعد يدعم المريخ إذا طلبوا منه ذلك .. * وبصراحة والله أسامة ونسي فوت على نفسه فرصة كبيرة .. * أسامة ونسي خذلته الشجاعة الأدبية .. * أسامة ونسي لو طلب من الكاردينال دعم المريخ لما تأخر ولكنه (خجل) من أن يفعل ذلك .. * شافها شينة .. * وشخصيا أنا ما بستبعد إنو الكاردينال يكون دفع في نفرة المريخ الأخيرة .. * والله صحي .. * الكاردينال ينظر للمريخ باعتباره مؤسسة حكومية تستحق مساعدتها .. * الكاردينال لما ساهم في استاد المريخ كان عارف إنو ده إستاد حكومى يحق لكل رجل أعمال المشاركة فيه من أجل سمعة البلد .. * على هذا الأساس تعامل الكاردينال .. * وفعلا .. المريخ محسوب بشكل واضح للحكومة وهذا الإستاد المسمى بالرد كاسل إحنا عندنا فيهو نصيب وناس الأمل عطبرة عندهم فيهو نصيب وكذلك ناس الموردة ومريخ الفاشر .. * وإعتبارا من الدورة التانية ح نقفل إستادنا ونجي نتمرن في إستادنا التاني .. * وبالمناسبة الكاردينال لما قال بيقفل إستاد الهلال (45) يوما ما قال الكلام ده ساكت .. * ولو ملاحظين في الحوار كردنة قال بنقفل الاستاد (45) يوم وطوالى بعدها قال أنا دعمت وساهمت في استاد المريخ .. * يعني قال الكلام بفهم .. * واضح إنو (الكسكتة) بعد ما إشتغلت في المضمار الفني ح تشتغل في المضمار الإداري .. * تمارين الهلال تانى ح تكون في إستاد الحكومة .. * بنتمرن في الرد كاسل .. عجبكم عجبكم ما عجبكم بنشيل طابق شاخور وبنخليكم في الصقيعة .. * لكن والله الكاردينال بالغ .. * الكاردينال طلع الكلام ده في وقت صعب شديد .. * الدنيا رمضان والمريخ مغلوب وجاي علينا عيد .. ما كان في داعى على شيل الحال ده يا كردنة .. * المريخ كلو جُروح وهذا ما لم يراعيه الكاردينال .. * زاد عليهو الجروح .. * و(أوجع) جرح هو الجرح البيجيك بفوق لجرحك القديم .. * تكون مجروح مسبقا ويتسلط عليك زول يجرحك في نفس محل جرحك الأول .. * وتبقى ما عارف الواجعك الجرح القديم الإتجدد ولا واجعك الجرح الجديد .. * بتلخبط عليك الوجع .. * زي المريخ ده مثلا .. * المريخ بقت عندو مشكلة مع أي هلال .. * المريخ في مدينة الأبيض إتجرح امام الهلال ب(ساطور) مهند الطاهر .. * وقبل ما المريخ يتماثل للشفاء من جرح هلال التبلدي إنجرح من هلال السودان .. * وكل المؤشرات تؤكد ان نقطة ضعف المريخ هي الهلال .. * وحكمة الله المريخ لعب أمام الهلال وقدامو هلال كادوقلي .. * ود زي الوقوف بين لافتتين .. * والمريخ شدة ما خايف من هلال كادوقلي حيسافر بكرة عشان يعمل معكسر بالقاهرة خصيصا لهذه المباراة .. * وبرضو ما بحلكم .. * مش لو عسكرتو في القاهرة ؟؟ لو مشيتو الصين هلال كادوقلي راجيكم .. * ربنا يكتر (الهلالات) في الممتاز .. * الممتاز ده لو بقي فيهو 5 هلال قطع شك المريخ بينزل دوري الاولي .. * لو صعد هلال نيالا وهلال الحصاحيصا وهلال كسلا للممتاز بالاضافة لهلال السودان وهلال الفاشر وهلال الابيض يبقي علي المريخ السلام .. * نحن نطلب من الكاردينال الاهتمام بكل هلال في ولايات السودان المختلفة .. * دعم أندية الهلال بالولايات والوقوف معاها يجب أن يكون هو مشروع الكاردينال القادم .. * حاليا الكاردينال ما قصر مع الهلال الأب .. * عمل جوهرة عظيمة وسجل جيش من اللاعبين يجعلون الهلال مكتفى حتى (2030) بأذن الله .. * يبقي كردنة مطالب بدعم وتقوية أندية الهلال في كل بقاع السودان .. * إحنا بعد شوية دايرين الدوري الممتاز يكون فيهو (9) هلال بالإضافة للموردة والخرطوم الوطنى وأهلى شندي والنيل الحصاحيصا وكوبر وشبيبة القيراون .. * عادى ممكن نعمل لينا فريق نسميهو شبيبة القيروان .. * والله صحي .. * دايرين بطل الدوري يكون الهلال والوصيف هلال وطيش الدوري هلال .. * ودى سياسة محتاجة لنفس طويل والكاردينال الحمد لله يستطيع ان يعمل نهضة هلالية تشمل كل (الهلالات) .. * والقروش راقدة .. * وأهمة حاجة فيها إنها ما قروش حكومة .. * بمناسبة القروش .. * وزع الكاردينال الحوافز لنجوم الهلال ونسي أو تناسي أن يمنح مصعب عمر حافزه .. * الكاردينال هضم حق أصيل من حقوق مصعب عمر .. * مصعب ده يا كردنة عندو عرق في إنتصار الهلال .. * أظن وليس كل الظن إثم أن مصعب عمر لما شاف نجوم الهلال شايلين الظروف المليانة قروش أظن أنه تحسس كثيرا .. * أظن ذلك .. * وأى زول طبعا حر في (ظنونو) .. * قلتو لي جايبين منو للجهاز الفني ؟؟ * ريناد ولا قلتو منو ؟؟ * ريناد ب(الغاء) .. * ريناد شنو البجيكم إنتو ؟؟ * أنا شايف لو شلتو تلفونو ميشو أحسن ليكم .. * وأقول ليكم حاجة .. أهو رقم مشيو (002320987689) .. * إتصلو عليهو .. * عشان ما تمسكو بينا زمن ساكت .. * ولو دايرين رقم كافالي بنديكم ليهو برضو .. * أنا غايتو بتبرع يوميا بنشر ليكم رقم من أرقام مدربين الهلال .. * الليلة أديتكم رقم ميشو وبكرة بشوف ليكم رقم تانى بأذن الله .. * غايتو جنس غايتو !! * ونركب صافنات ونجيبة (تعايشية) وأصلو الزول بيموت والذكرى تفضل حية .. * و..و.. * والجاني منك ومن تباريح الهوى …(عمل لي نزيف في الشيبولا) ..
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore