في غفلة رقيبي * شفعنا امس كتر خيرهم طلعوا بتعادل سلبي امام مضيفهم الزامبي * امطار خير وبركة * وصبياننا طبعا تأهلوا علي حساب نيجيريا * والتربية الصحيحه والاهتمام بالشفع والصبيان بتخلينا نحلم بمنتخبات قوية مستقبلا تتواجد في النهائيات دائما * ولكن الاحتمال الاقرب هو حدوث ماحدث مع اولاد ماسا * لاننا دولة نجاحاتها ان وجدت كلها سببها الصدفة * عشوائية العمل الاداري عندنا عنوانها المجاري * والموية القاطعه في الماسورة ومكدسه في ميادين الحواري * و ارتباط السداد الحكومي بشبكة طاشه طوالي * مظاهر عشوائية العمل الاداري عندنا كتيره * من يفشل في ادارة موقع يتم تحويله لموقع اكبر * ومن يفشل في ادارة الموقع الاكبر يتم تعيينه كبير في موقع كبير * وهكذا تدكه وتتشكه وتتوزع من جديد * نفس الورق الكعب الكان بي جاي بجي بهناك والكان بهناك بجي بي جاي * وقيمنا لسه * يشكوها ويوزعوها ويدكوها ونحن قاعدين راجيين قيمنا * والكيشه كتار * في البفوت الخمسين * وفي البجدع بايظو مرتين * وفي الاتقبض هبابتين ولسه ماحرق * لكن التربيزه كلها زون * تربيزة العمل الاداري * وصاحب التلتين عندو فتوح * ان شاء الله من هنا وخمسين * بطيروا لانهم كلهم زون * مادايرين تلتين وفتوح يقعدنا شوته تاني بره اللعب * صدقوني العمل الاداري عندنا عقيم شديد * نسأل الله السلامه * المهم * في غفلة رقيبي * من اجمل اغنيات الحقيبة * هو في شئ في الحقيبة شين! * في غفلة رقيبي قلت ازور حبيبي لقيتو شويه حاسي * وعلي الرغم من ان غفلة الرقيب ماحبابه * الا انها في الغنية دي كانت جميله * واذا صدقت انباء مطالبة لجنة التحكيم بوقف فقرة تقييم الحكام في برنامج الرياضه وفي الاستوديو التحليلي * يبقي حبيبي موش شويه حاسي * يبقي مات عديل * الرقابة هي وسيلة اجبار لتحسين العمل واستتباب الامن و مراجعة الاخطاء * ولما ترفض الرقابة معناها ناوي ليك زيارة لحبيبك يا حبيب * وزيارة الحبيب بدون رقيب بتجيب الكلام * والكلام التحتو كلام بخلي مابنفس يعقوب يتضح * ايها الناس * تقييم التحكيم تلفزيونيا يجبر الحكام علي الاجتهاد والحياديه * واذا كانت ادارة الحكام ترفض تلك الرقابة * تبقي ادارة عقيمة وفاشله شأنها شأن جميع مناحي العمل الاداري في كل النواحي * في غفلة رقيبي?? * ليييه! ولنا ان نسأل * اذا صحت تلك الاخبار * هل في نية غمت كتيمي??? * طيب سايقننا هناك ليه ماتكتلونا هنا * ايها الناس * نطالب وبشدة بفقرات تحليل اداء الحكام * ونطالب القناة الناقله بزيادة عدد كاميرات النقل لدقة اكثر * ولصورة من زوايا مختلفه * و عشان نشوف الاوف اوف ولا الفيديو ساي * بالطريقه دي نجبر الحكام علي تطوير مستوياتهم * وتقليل اخطائهم * عساهم يعدوا بلنت اهلي مدني * وتجيهم الشجاعه لاحتساب بلنت للمريخ ضد الهلال بالممتاز * مع العلم * بان الكاميرات الفوق شغاله زي الورد * ومسجله كلو شئ * دايرنك تزور حبيبك في وجود رقيبك عشان تلقاهو معافي وسليم وفي السليم * المهم * هلالابي محرووووق * قال لي تدوا الاهلي تلاته?? اكرم ده عملتوا ليهو شنو? * قلت ليهو صنا ليهو مستشفي العباسيه * قال لي انتوا بتكتبوا حاجاتنا وحاجاتكم مابتكتبوها ليه? * قلت ليهو اول حاجه نحنا خشمنا ماخفيف * وما زي بنات بايو * بنات بايو ديل طبعا قالوا خشمن خفيف شديد * وبحبن الشمار *بعد يفطرن يختن قهوتن * فلانه طلقوها * راجلها قال بالليل كلما تمسح وشها ده بتخلعوا * جابت ليهو القلب * فلانه قالوا ليك ماتشوفي جيهتها وسماحتها دي * بيتها وسخان وسخان وسخان * الجقر بقغل نخرينو لما يجي بيتها * وفلان... قالولك حرامي.. ماكل البلد دي كلها في بطنو * وفلان ود حامد اسكتي ساي * محل مايدوهو وظيفه ياكل مال الدولة * باقي واصل * تاني يدوهو وظيفه وتاني ياكل * قالولك أخر مرة دي جارو اتشاكل معاهو قام قال ليهو ياحرامي * ولا اثرت فيهو * قام جارو قال ليهو والله انت تاكل مال النبي * قال ليهو ومالو... النبي حبيبنا * وهلل ودور وفحط خلاهو في محلو قالولك لاحقلو اكله * المهم دي شغلت بنات بايو يوميا * خشمن خفيف * فيهن واحدة متزوجه * قال ليك الحرامي يوم جاهم جلد ليك راجلها جنس جلده * لكن ناس الحله ماعافين * وخايفات يتكلمن اختن تطلق * سكتن بالموضوع اسبوع * اتضايقن شديد * يوم شالن عفشن وراحلات * ناس الحله سألوهن مالكن راحلات * قالن لي ناس الحله مخلين الحله دي... الحله كلها تنضم بنات بايو خشمن خفيف بنات بايو خشمن خفيف! * نحنا لو خشمنا خفيف فلان راجل اختنا ده الاسبوع الفات الحرامي دقاهو لمن جعر نحنا ما اتكلمنا تقولوا خشمنا خفيف!! * اها * دحين نحنا كمريخاب لو خشمنا خفيف من اهلي شندي صعد الممتاز لي الليله ما غلبتوهوا في شندي قلنا لي زول! * ليكم تمنية وتمنين سنه ماشلتوا كاس افريقي قاعدين في صفركم ده نحنا كلمنا زول!! *قبضوكم بالمنشطات في تونس خشمنا عندنا * غيرتوا اتنين واطناشر قايلننا عشان ساكتين ماعارفين * زغتوا من وفاق سطيف وعملتو رايحين نحنا كلمنا زول!! * تدق محل الحقنه وتشوتوها بلنت قلنا للكاف! * شاتها الماسورة دقت في الماسورة رجعت للماسورة بدون ماتهبشها اي ماسورة.. كلمنا الفيفا?? * اسي جابت ليها صيانة مستشفيات قلنا لي زول! * نحنا خشمنا ماخفيف مازي بنات بايو * والله لو كنا زي بنات بايو كان ماو يوم راحلين ندق بيكم الطار دق * ايها الناس * ان تنصروا الله ينصركم * اها * نجي لي شمارات والي الخرتوم * كان شفت يا والينا * والناس مصنقرة حزينه وسط موياتها وطينها * اكتشفنا انكم ما مقصرين فينا * ماغلطانين يا والينا * غلطانه المطرة البتجينا سلك كهربا ننساك كيف والكلب يغني ساي يامطيرة صبي لينا في عينينا وفي كرعينا وفي ريسينا سوطي مويتك دوبي طيننا مابتجرأ زول يمرقك من حينا البلد امان ياستنا والي لقاء سلك
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
