بابكر سلك كوستي دايرة مستشفي ولادة ياروشا *فتحية بت ام فتحية مواطنة صالحة من بنات ربك *تنتظر مولودها الاول بفارق الصبر *امس حانت ساعة الحلم *ام فتحية بحكم خبراتها ايقنت بان الوجع وجع ولادة *جهزت شنطة الطفل المنتظر *ماخلت شئ *البامبرز الغالي ده جابتو *قالوا حايسموا الولد علي المرحوم ابو فتحية *حايسموهوا صالح *صالح ابو فتحية كان عجب الناس *عشان كدة اختارن للمولود اسم صالح عجب الناس *وختت ليها البشاكير *ومن فرحة ام فتحية بالمولود المناظر *يوم كدة مشت الخرتوم *في جاكسون وعلي الطبالي *في يوم رايييق مافيهو كتمة من كتمات جاكسون *اشترت شبط للمولود اللسة ما اتولد *اها *قامت ختت الشبط في الشنطة *والبيبي اويل *الاصلي يافطومة *وكل حاجات البيبي كير *بدرة الاطفال ماختتها *بدرة الاطفال موضة قديمة بتاعت حفاضات وكده *لكن مع البامبرز السعودي القطعتوا بي عشرين الف ده *التقول قطعة ارض ده *بدرة الاطفال مابتنفع *السودو كريم يافطومة هو البشتغل صاح *المهم *جابن التاكسي الماخمج *وركبن خاتات شنطة الطفل وسطن *اتحرك التاكسي *ام فتحية مدة راسها مخاطبة الشفع *ياجنون اقعدوا بي ادب لامن نرجع *تسكتوا بس *التاكسي وصل تقاطع كوستي *سواق التاكسي سأل *ماشات وين *الحاجة ام فتحية بفرح قالت *فتحية بتي دي بكرية ومواعيدها جات *ودنا مستشفي كوستي بتاع الولادة *بتاع التاكسي لف علي الخرطوم *ام فتحية قالت ليهو ماشي وين ياراجل *سواق التاكسي قال ليها *هي كوستي لو فيها مستشفي ولادة الهلال كان اتغلب فيها *وواصل *وليدكن حاتسمنو منو؟ *نطت فتحية وقالت *حانسميهو علي جدو *صالح *بتاع التاكسي قال *كان كدي الخرطوم بس *اقفلن القزاز ده *روشا *كوستي تحتاج لمستشفي ولادة عاجل *دي حالتها بي اب شنب *يعني لو كانت بدون شنب *كان حرقنو ناس افول وكنو *بالطريقة دي ياروشا *ماتمشوا زامبيا *الفريق حقهم من اسمو صعب شديد *المهم *تمضي مبادرة الجار بما تشتهي السفن *لذا استغربت جدا لمن سمعت كلام الاخ شمس الدين الامين عن المبادرة *وكيف انها وقفت *وكيف أن المهندس النوش قال ليهو خلاص وقفنا *اتحيرت لاني لما سمعت الكلام ده *كنت قاعد في الاستاد *ومن حولي الحديد الجديد والاسمنت والشباب ويجري العمل علي السقالة *الجميع يقف علي السقالة بحرفية واحترافية وشباب *ناس زي النمل *طالعين نازلين من السقالة بمنتهي الرشاقة *حقو ياشمس يا اخوي تراجع باشمهندس النوش عشان تمسح حيرة الناس البعيدين السمعوا الكلام *لانو نوش بتاع العشا عارف حجم المبادرة ومتابع قصة الشغل الماشي *خليهو نوش المهندس المشرف ميدانيا ووجدانيا علي ارض الواقع *ايها الناس *ان تنصروا الله ينصركم *اها *نجي لي شمارات والي الخرتوم *والينا *ان كان عيب قانون النظام العام في تطبيقو *خلوا القانون ونزلوا تطبيق تاني *اجود بس سلك كهربا ننساك كيف والكلب قال زمااان قالوا ليكم ناس ابو لهب رفضوا يتسوروا بيوت الناس قلتوا ماحصل والي لقاء سلك