محمد عبد الماجد جاريين للمشاكل دفعوا رسوم (الشكوى) وما دفعوا رسوم (فحص) الكورونا الزول وقت يكون (متلقح) حجج ومشاكل بعمل البعملوا فيه ناس المريخ ديل. عندنا زول في الحلة لو وقعت (صاقعة) في الحلة – بقول لينا : ديل ناس الهلال. الكهربة وقت تقطع ..بقوم يقيف في ىنص الحوش ويقول : قطعتوها يا ناس الهلال. المريخ يكون لاعب مع ام بدة …يقول ليك والله انا ما خايف من شيء اكتر من (الغربال). امسكوا الغربال!! لو مسكتوا (الغربال) ما بتجيكم عوجة!! غايتوا يا ناس المريخ عندكم رئيس نادي – بعمل (المشكلة) اول حاجة.. ثم يقعد بعد كدا يشوف الحلول. المشاكل عندو اهم من الحلول؟. يعني الاصل عند سوداكال (المشكلة) وليس (الحل). الزول دا ما بعرف يعيش من غير (مشاكل). سوداكال عارف الاوضاع الطبيعية ما عندو طريقة فيه – عشان كدا بفتش للمشاكل. لو ما المشاكل ما بقعد. الامور فى المريخ جايطة شديد – ما كدا يا سوداكال. روق. ما في زول بيبقى ليه رئيس نادي غصبا عن الجميع. الناس كلهم ضد سوداكال في المريخ. مع ذلك سوداكال مسيطر على الاوضاع. غايتو يا مزمل ابوالقاسم سوداكال دا قدر عليكم. قالوا الاتحاد العام لكرة القدم في السودان مع سوداكال. وقالوا كمال شداد. اها (الفيفا) برضو مع سوداكال؟ الزول دا طلع عارف القانون وشغال باللائحة – ما عاوز يعطي اي فرصة لخصومه. مسيطرة سيطرة تامة. سوداكال عندما كان في السجن ادار المريخ. وكل مشاكل اعضاء مجلس المريخ معه انه ما برد على تلفوناتهم ، خاصة في المواضيع التى تستوجب (دفع). يعني زول في السجن – عاوزنو يدفع ليكم حق المعسكرات والتسجيلات والتذاكر. سوداكال – فاز بالتزكية في الجمعية العمومية للمريخ. قدموا طعون في سوداكال. الممفوضية. والمحكمة الادارية. وبرضو سوداكال ادار المريخ واصبح الرئيس الشرعي للمريخ وهو في السجن. كلام عجيب. لا مفوضية. ولا جمعية عمومية. قدرت تشيل سوداكال. استقالات مختلفة وعديدة قدمها اعضاء مجلسه – وبرضو سوداكال ما فقد شرعيته. يوقف في الاعضاء ويجمد في عضويتهم. وشغال. وما في زول قادر عليه. تهديد بسحب الثقة. ووقفات احتجاجية. ومخاطبة الفيفا. وسوداكال قاعد. ولا شغال بيهم الشغلة. ناس مزمل ابوالقاسم بعملوا في شنو؟ – ما عندو بيهم قضية. كلام ناس مزمل طلع كلام جرائد ساكت. ما عمل اي شيء. ناس عصام الحاج وود الياس وصلوا لمرحلة استقبال الرئيس الفخري للمريخ التازي في مطار الخرطوم. دي سوداكال رئيس المريخ ما عملها. اقول ليكم حاجة غريبة. سوداكال فترة مجلسه انتهت من شهر 10 …وسوداكال لسه شغال. ما في زول قدر يقول ليه حاجة. فصاحة ساكت. مباريات الهلال الافريقية السلطات السودانية سمحت فيها بدخول 5 الف مشجع. او 3 الف مشجع. وسوداكال قال ما بعمل جمعية عمومية عشان جائحة (كورونا). المنتخب وهو سوف يلعب امام جنوب افريقيا ممكن الحضور في الملعب يوم 5 الف مشجع. ما في زول استفاد من (كورونا) قدر سوداكال. اعلام المريخ كان بيسخر من كورونا. وكان بقول ان الهلال تلاعب بفحوصات كورونا عندما واجه فريق اللاشانتي الغاني الذي فاز عليه الهلال في بلده 1 / صفر. كورونا ابعدت من المريخ امام سيمبا 8 لاعبين من العناصر الاساسية للمريخ. وكورونا مددت لسوداكال وابقت عليه ريئسا للمريخ. في تاني زول فيكم بقدر يجيب سيرة (كورونا). قلنا ليكم ابعدوا بعيد عن الهلال. اتكلموا عن الرباط الصليبي لياسر مزمل وبوجبا ، نص لاعبي المريخ تعرضوا للاصابة بالرباط الصليبي. الصيني. كردمان. التش. سيف الدمازين. حتى صلاح نمر ابعدته الاصابة. آدم سوداكال رفض يفك رئاسة المريخ مسك فيها مسكة عجيبة. ناس جمال الوالي بكل اخفاقاته كانوا بحنسوا فيه عشان يستمر وكان برفض. هسع ادم سوداكال – وبعد ان انتهت فترته عاوز يبقى الرئيس ويستمر في مجلس المريخ. شوفوا الزول دا ساكيها لغاية وين؟ فى خبر ريمونتادا امس نقلا عن موقع (صدى البلد) المصري : (رد مالمو نجومبي عضو مجلس إدارة نادي سيمبا، على اتهام المريخ السوداني ل سيمبا بالتلاعب في نتائج مسحات فيروس كورونا، قبل المباراة التي جمعت الفريقين، الثلاثاء الماضي، على الملعب الوطني في تنزانيا، ضمن منافسات الجولة الرابعة من دور المجموعات، بمسابقة دوري أبطال أفريقيا.. وقال نجومبي في تصريحات ابرزها موقع "صدى البلد": نادي المريخ لم يدفع ثمن المسحات التي خضعوا له لها في تنزانيا، وأطلب منهم إظهار إيصالات دفع ثمن المسحات، إذا كان كلامي غير صحيحا".. وتابع:" نادي المريخ السوداني قام بتزوير نتائج مسحات كورونا، ومررها عبر المطار".. وواصل:" نتائج المسحات التي تقدم بها المريخ للكاف ضدنا كانت بتاريخ 19 مارس، في حين أن مسحات المباراة التي خضعوا لها كانت بتاريخ 14 مارس".. كان نادي المريخ السوداني، أعلن السبت، تقدمه بشكوى رسمية ضد نادي سيمبا التنزاني، في الاتحاد الإفريقي لكرة القدم "كاف"، حيث اتهم النادي التنزاني بتزوير مسحات 8 لاعبين في صفوف المريخ). دي لاقتكم في حتة؟ دي قابلتكم يوم؟ ما عاوزين يدفعوا رسوم فحص الكورونا ..وعاوزين يشتكوا في نتيجتها. كدا انتوا ادفعوا اول. ادفعوا الرسوم. معقولة بس. الغريب انهم دفعوا رسوم الشكوى للكاف …وما دفعوا رسوم فحص الكورونا. والله يا سوداكال …انت كل ما يقال عنك – الظاهر عليه صحيح. كمان ما للدرجة. زول ما يدفع الرسوم بتاعة الفحص …ويدفع بعد هذا رسوم الشكوى في نتيجة الكورونا. انا قوة عين زي دي اصلو ما قابلتني. المضحك ان الاهلي المصري واعلامه بروج لهذه الشكوى – عشان سيمبا يبعد من البطولة. وعشان الاهلي المصري يتصدر المجموعة. قولوا الكلام دا حصل. وتم ابعاد سيمبا من المنافسة – سوف يكون المتضرر الاول من ذلك القرار فريق المريخ نفسه. لن يعتبر سمبا مهزوم من المريخ في المباراة التى خسرها الاخير في تنزانيا …وانما سوف يبعد فريق سيمبا نهائي من البطولة. وهذا يعني ان (النقطة) التى حصل عليها المريخ من سيمبا سوف تسترد منه. يعني المريخ سوف يكون بدون نقطة. والمستفيد من الشكوى سوف يكون فريق الاهلي المصري الذي سوف يتصدر وفريق فيتا كلوب الذي سوف يتأهل مع الاهلي المصري من المجموعة الاولى. عشان كدا يا ناس المريخ ما تتعبوا ساكت في الشكوى. مباراة المريخ القادمة مع الاهلي المصري في ام درمان – على المريخ ان يقنع من النتيجة. ومباراة المريخ الاخيرة سوف تكون مع فيتا كلوب في ملعب فيتا. يعني ما عندكم اي طريقة. احسن تمسكوا في (النقطة) التى خرجتوا بيها من سيمبا قوى. عشان لو كسبتم الشكوى – النقطة ذاتها ح يشيلوها منكم. ناس الاهلي المصري ما يغشوكم. خليكم مفتحين. ما تباروا المصريين. ناس الاهلي عاوزين يستفيدوا من شكوتكم. ………… متاريس بقينا نكتب حسب جدول الكهربة. يعني ممكن تكتب العمود من الصباح. وممكن تكتب اخر الليل. العمود بقى زي الموبايل. اول ما تشوف الكهربة تخت الموبايل فى الشاحن. احسن الواحد يكتب ويرسل من بدري. مالنا ومال الجهجهة. ………. ترس اخير : بكرة نشوف الحاصل شنو؟
