محمد عبد الماجد زعلان السودان..!! مثلما هناك فريق كرة قدم في جنوب السودان اسمه (زعلان) لعب في البطولة الافريقية وخسر ذهابا امام الشباب التنزاني بالأربعة وإيابا بالخمسة وقبل (9) اهداف كأعلى نسبة للهداف في دور ال 64 ، هنالك في السودان ايضا يوجد فريق يمكن ان يحمل اسم (زعلان) من خلال كمية (الزعل) الموجودة في هذا الفريق. زعلان السودان هو فريق المريخ وصيف الدوري السوداني .. ويبدو ان السودان وجنوب السودان فعلا حاجة واحدة .. فنحن نتشابه في أي شيء حتى في (الزعل) . وحقيقة ما في جنوب بدون شمال وكلنا (زعلانين) .. وزي ما في هلال الشمال وهو (الهلال ام درمان) هنالك هلال الجنوب وهو (هلال واو) .. وكما يوجد (زعلان الجنوب) نحن هنا برضو ظهر لينا (زعلان الشمال). انا عارف الكلام دا ممكن (يزعل) اخوانا المريخاب .. لكن هذا امر طبيعي في ظل (الزعل) المنتشر في المريخ هذه الايام .. وعشان ما نقعد نتغالط ساكت .. تعالوا شوفوا (كمية) الزعل الموجودة في العرضة (جنوب). زعل بإفراط. زعل بالكوم. سوداكال (زعلان) من حازم مصطفى وحازم زعلان من سوداكال ومن ايمن مبارك كمان .. سوداكال وحازم كل واحد فيهما عندو مجلس (زعلان) من المجلس التاني. الشحمة والنار. ديل وصلوا بي (زعلهم) الى المحكمة الرياضية الدولية .. وصلوا (كاس) بالزعل. حازم مصطفى (الرئيس غير الشرعي) للمريخ .. هو سيد الزعل كله في المريخ .. حازم زعلان من اعلام المريخ .. وحدد ذلك بالاسم وأعلن عن زعله صراحة من الدكتور مزمل ابوالقاسم ومن معاوية الجاك وقبل ذلك من شمس الدين الامين ، وقال عن احدى صحف المريخ (الصحيفة المسمومة). جابت ليها (سموم) كمان!! تقول بتكلم عن (جبنة). حازم لم يكتف بهذا الزعل وإنما اعلن عن زعله عن قروبات المريخ واتهم بعض الافراد فيها بالاستيلاء على نفرات جماهير المريخ لدعم الفريق. طبعا ممكن تقولوا دا ما زعل .. دا فساد عديل كدا. جابت ليها (فساد) كمان!! الجبنة فسدت. الجبنة التى كلمتكم عنها فوق. حازم في تسريباته الصوتية وضح انه زعلان من جمهور المريخ وقال عنهم انهم رفضوا دفع رسوم العضوية التى تبلغ (500) جنيه للعضو رغم انهم بدفعوا هذا المبلغ اضعاف للاشتراك في خدمة الانترنت .. عشان يقعدوا في النت ويهاجموه وينتقدوه. حازم مصطفى كان (زعلان) شديد عن عمار طيفور الذي وصفه بالمتعالي .. وتحدث عن (شعيراته) وأعلن حازم عن زعله كذلك من اسرة عمار طيفور التى قال عنها انها اسرة (هاملة)... في اسرة هاملة يا حازم بكون عندها رغبة في ان تعمل بيت في واشنطون؟ وأنت مالك يعملوا بيت في واشنطون او شارع الاربعين ؟ .. بي طريقتهم .. كمان عاوز تحدد ليهم يسكنوا وين؟ ويعملوا شنو؟ زعل حازم مصطفى كان قد بدأ من مجلس المريخ (حديقة الموردة) عندما اختلف حازم مصطفى مع نائبه محمد سيد احمد الجاكومي وأسامة عبدالجليل واعترض على وجود هيثم كابو معه في لجنة التسيير. حازم (زعلان) شديد من الهلال وقال ان رئيس نادي الهلال هشام السوباط ما برد على مكالماته .. وان المريخ لن يلعب في استاد الهلال حتى لو ادى ذلك للخروج من مرحلة التمهيدي. عليكم الله في زعل اكتر من كدا؟ ادم سوداكال .. زعلان من اعلام المريخ وزعلان من جمهور المريخ وزعلان من علي اسد والكندو. سوداكال زعلان من الاتحاد العام. الجاكومي زعلان من السودان كله .. زعلان من (الحرية والتغيير) المجلس المركزي وزعلان من رئيسه في المريخ .. وزعلان شديد من الهلال ... الزعل عاوز يشقو. الجاكومي كل يون بطلع بهاجم في الهلال وهو كل الذي قدمه للمريخ (قلاب رملة). الجاكومي فرحان فقط من (العسكر) و (الدعم السريع) و(قلاب الرملة) الذي نزله في استاد المريخ. وقلاب الرملة نفسه على حساب (الدعم السريع). هيثم كابو طبعا زعلان من حازم مصطفى وبقى ما برد على مكالماته زي رئيس الهلال. في جانب اللاعبين .. سيف تيري زعل من المريخ وهرب الى (فاركو) المصري. وعماد الصيني من (الزعل) فسخ عقدو مع المريخ ودفع (20) مليار للمريخ (زعل ساكت كدا). اول حالة زعل في القمة السودانية تؤدي الى ان يقوم اللاعب بفسخ تعاقده مع النادي الذي يلعب له. المحترف اديلي زعله من المريخ حرمه من التسجيلات ثلاث فترات متتالية. عمار طيفور والتش (زعلهما) واضح .. وما عاوز ليه كلام .. الجديد في الامر ان صلاح نمر ورمضان عجب زعلانين من عمار طيفور بسبب طريقة تعامله مع لاعبي المريخ .. (دا كلام حازم) ما كلامي. طبعا بعتذر ان العمود احيانا بكون زي (محضر التحري) بتحاول تذكر فيه كل الوقائع .. حتى لو كانت على سبيل (ابوشعيرات) و اسرة (هاملة) و (متعالي).. وتلك المفردات والمصطلحات السوقية التى استعملها حازم في تسجيلاته الصوتية. على المستوى الخارجي .. المريخ زعلان شديد من الاهلي المصري حسب تسريبات الجاكومي بسبب عدم التزام الاهلي المصري بالعهود التى كان قد قطعها مع المريخ من اجل ان يلعب المريخ مبارياته الموسم الماضي في مرحلة المجموعات في المريخ. الاكيد ان المريخ الآن (زعلان) من سانت جورج .. عشان سانت جورج لم يخرج لهم الهلال من الدور التمهيدي. شفتوا كمية (الزعل) دا؟ عشان كدا (نجيلة) استاد المريخ مع هذا (الزعل) ما اظن تقوم. الزعل في المريخ خلي استاد المريخ (خرابة) بعد ان كان هذا الاستاد يستقبل مباراة في حجم مباراة فاصلة الجزائر ومصر لتأهل الى كاس العالم 2010م. قطب المريخ الجميل ابوجميل (زعلان) من همجية الجاكومي وعوض رمرم زعلان من حازم مصطفى .. وكله في المريخ زعلان من التاني. عن زعل الجاكومي نقول هو زعل من اجل الظهور .. على الهلالاب ان لا يعطوا قيمة للجاكومي بهو يبحث عن ذلك. الجاكومي ما بدفع .. عشان كدا بحاول يظهر على حساب الهلال وتصريحاته العدائية التى يستفز فيها الهلال والتى كانت سببا في ان لا يلعب المريخ في استاد الهلال. الجاكومي في الموسم الماضي تحدى الهلال وقال ان المريخ سوف يلعب في استاد الهلال مباريات مرحلة المجموعات .. وان حميدتي سوف يتدخل لإجبار الهلال على قبول هذا الامر. بعد هذه العنتريات والتحديات خاض المريخ مبارياته في مرحلة المجموعات في الموسم الماضي في القاهرة. وين حميدتي هنا. علاقة الهلال بالقاهرة شنو؟ انت يا الجاكومي ما بتفرز استاد الهلال من استاد السلام؟ في هذا الموسم قطع الجاكومي بخوض مباريات التمهيدي في استاد الهلال غصبا عن الهلال. كلام!! النتيجة بعد هذه التهديدات ظهرت في ان المريخ لعب مباراة التمهيدي في دور ال 64 في بحر دار. هل يملك الهلال ملعب في بحر دار؟ نحن مالنا ومال بحر دار. الجاكومي بعد تأهل المريخ لدور ال 32 .. طلع تاني وقال ح نلعب في استاد الهلال .. وان الامر سوف يحسم مع رئيس نادي الهلال بعد ان فشل تدخل حميدتي. والنتيجة ظهرت في ان المريخ سوف يلعب مباراته امام الاهلي الليبي في استاد الابيض. هل اصبح استاد الابيض استاد للهلال؟ الجاكومي بصرح من اجل الظهور .. عاوز يتصدر الموقف حتى ولو كان ذلك عن طريق (الشتائم) او (قلاب رملة). لهذا على الهلالاب ان لا يقيفوا كثيرا عند تصريحات الجاكومي فهي تصريحات للاستهلاك الاعلامي تصريحات (زعل) تأتي دائما بعكس ما يتفوه به الجاكومي. اها بعد الكلام دا الزعلان منو؟ زعلان الجنوب ام زعلان الشمال؟ ............ متاريس اذا اطاح مجلس الهلال بالزملاء الصحفي انس محمد احمد مسئول المكتب الاعلامي للهلال والمبدع المصور محمد دفع الله يكون مجلس الهلال قد ارتكب اعظم حماقاته. يبقي ما في أي فائدة .. ويبدو اننا لم نتقدم خطوة. شهادتي في انس محمد احمد الذي صاحبته في بعض رحلات الهلال انه اعلامي شاطر وهادي ومنظم ومتعاون ومجتهد لأقصى الحدود مع الاخرين. اعلامي لا يوتر الاجواء وينقل المعلومة لا الكلام ويعمل بمهنية واحترافية عالية. اما المصور المبدع محمد دفع الله فهو يكفي ان نقول ان صورته (ناطقة).. وبتتكلم خمس لغات. الاطاحة بأنس ومحمد دفع الله .. يعني ان هناك فعلا اعداء للنجاح .. ويعني كذلك ان العمل المنظم والمرتب والمؤسس يزعج البعض. ويعني كذلك اننا عمرنا ما ح نمشي لي قدام. احدث انس محمد احمد نقلة كبيرة في صفحة الهلال على مواقع التواصل الاجتماعي .. وجعل جمهور الهلال كله حضورا لكل الاحداث التى تجري في الهلال. اما محمد دفع الله فيكفي ان (صورته) تجوب كل المواقع والصفحات بعد أي تمرين للهلال ناهيك عن المباريات. من مصلحة الهلال المحافظة على هذا الثنائي .. يمكن تدعيم المكتب الصحفي ببعض الوجوه .. لكن دون المساس بالقيادة الحكيمة لأنس وللإبداع الفني لمحمد دفع الله. لا تحرموا الهلال من هذا الابداع .. وتلك الروائع. هذه شهادتي اقولها لوجه الله في حق انس محمد احمد ومحمد دفع الله. اذا كان الاخلاص والوفاء في الهلال يقابل بهذه الصورة .. عمرنا ما ح نتقدم .. ولا ح نمشي لي قدام. المزاجية هى العدو الاول للاحترافية والمهنية. اتمنى ان يكون ما يحدث في هذا الجانب مجرد (تسريبات) لا اساس لها من الصحة. .......... ترس اخير : خلوها تصبح.
