محمد عبد الماجد (401) الف دولار ما ينقصوا (شلن) (تسلم مجلس إدارة نادي المريخ برئاسة آدم سوداكال الجمعة الموافق 30 إكتوبر 2022م قرار محكمة CAS المتعلق بالإستئناف الذي تقدم به النادي ضد قرار غرفة فض المنازعات بالفيفا ، والذي كان قد قضى من قبل بغرامة مالية ضد النادي مقدرة ب(401) الف دولار أمريكي لصالح اللاعب الليبي محمد المنير. وقد جاء قرار المحكمة المستلم يوم الجمعة برفض الإستئناف وتأييد قرار غرفة فض المنازعات الصادر لصالح اللاعب الليبي محمد المنير إضافة إلى إيقاع غرامة مالية ضد النادي تبلغ قيمتها (5000) الف فرنك سويسري لصالح اللاعب). ال (5) الف فرنك ممكن تدفعوها (فحم)… ما مشكلة. قالوا ليبيا فيها ازمة (فحم). انتوا ابوجيبين اختفى وين؟ قرأت الخبر اعلاه واستغربت .. وقلت ليه (401) الف دولار وليس (400) الف دولار؟ يعني واقفة على (دولار). الحكمة من ذلك شنو؟ واضح ان الفيفا والمحكمة الرياضية الدولية CAS شايلاها مع المريخ شديد .. وهذا يعني ان الموضوع منتهي .. وما فيه أي طريقة للمخارجة. (401) الف دولار ولا ينقصن (شلن). (401) الف دولار يعني (401) الف دولار. نحن في السودان (الكسور) دي ما قاعدين نقيف فيها كتير – لكن ظاهر من قرار فض المنازعات بالفيفا ان هذه اللجنة زهجت من المريخ .. وان المريخ كترها للحد الذي جعل الفيفا تحاسبهم بالمليم. الرسالة وصلت. الغريب ان اللاعب الليبي محمد المنير سوف يأتي مع بعثة الاهلي طرابلس للسودان وسوف يلعب ضد المريخ. انا عمري ما شفت قوة عين كدا. محمد المنير بعد ان حكموا ليه ب (401) الف دولار عاوز يجي السودان ويلعب ضد المريخ. يا صلاح نمر شوف شغلك… الزول دا شال منكم (401) الف دولار .. لو ما قادرين عليه كلموا ليه حميدتي. الدعم السريع ما بقصر. غايتو في المريخ دا بتحصل جنس حاجات… انا عمري ما مرت عليّ .. شوفوا ليكم (صفيحة) عشان اكب ليكم (الاستغراب) دا. استغراب طن. طبعا (الاستغراب) طار السما في الفترة الاخيرة. البلد كلها بقت (مستغربة). في شنو؟ في المريخ الخطابات الرسمية التى تصدر من الفيفا ومن المحكمة الرياضية بترسل الى آدم سوداكال. واضح. واللبيب بالإشارة يفهم .. الفيفا لا تعترف إلّا بي سوداكال. التعاقدات والصور واللايف بقوم به ايمن مبارك ابوجيبين. لو ابوجيبين فالح يتصور مع محمد المنير وينتهي من وجع الرأس دا. زرف الدموع بقوم بيه حازم مصطفى. كل طرف متخصص في حاجة محددة. سوداكال (خطابات الفيفا). ابوجيبين (الصور والتعاقدات). حازم (زراف الدموع). ثلاث جهات مختلفة تدير المريخ .. وضع زي دا نحن في (ابيي) ما شفناه. يطرشنا. اعلام المريخ دائما بنقول انه غير (مهني) وبنضيف كمان حاجة جديدة وبنقول غير (امين). تتخيلوا في مواقع تابعة للمريخ بتلاحق الهلال في كل شيء .. وبتجتهد في نشر الاخبار السلبية والمحبطة عن الهلال. عندما اتجه الهلال للكنغو الديمقراطية للعب امام مازيمبي .. قالوا ان مازيمبي يفتقد (4) لاعبين من نجومه .. بمعني ان التجربة لن تكون مفيدة للهلال. مع انهم لعبوا امام حيدوب. لقوا الموضوع ما قسم .. قالوا ان مازيمبي اعتذر عن مواجهة الهلال… الامر الغريب ان الهلال عندما اكد قيام المباراة لم يعتذروا عن خبرهم ..(عادي عندهم). المفاجأة ان هذا الموقع لم ينشر حتى وقتنا هذا خبر نتيجة مباراة المريخ والأهلي الخرطوم والتى خرج المريخ بسببها من دور الثمانية في بطولة كأس السودان. يا ناصر بابكر ليه كدا؟ هذا هو حال الاعلام المريخي. بعد قرار المحكمة الرياضية برفض استئناف المريخ .. اعلام المريخ كله اتجه لمهاجمة ادم سوداكال .. ما خلوا ليه حاجة. قالوا ان سوداكال تسبب في هذه الكارثة وتعاقد مع اللاعب الليبي محمد المنير الذي سوف يكلف المريخ (401) الف دولار ما ينقصن (شلن). نحن نتفق معهم في هجومهم على ادم سوداكال .. ونقول ان سوداكال ارتكب (حماقة) كلفت المريخ (401) الف دولار ما ينقصن (شلن) .. لكن في نفس الوقت نعاتب اعلام المريخ الذي لم يمنح سوداكال حقه عندما كان سببا في ادخال (500) الف دولار لحساب المريخ بسبب الغرامة التى فرضتها (الفيفا) على سيف تيري. لماذا لم تمنحوا سوداكال حقه في اجتهاده على ادخال هذا المبلغ الكبير للمريخ في الوقت الذي اتفق فيه مجلس حازم مصطفى مع فاركو وسيف تيري على تقسيط المبلغ واستلام (300) الف دولار كدفعة اولى في الايام القادمة. سوداكال لو قاصد يحارب المريخ ما كان دخل للمريخ (500) الف دولار. اخصموا (401) الف دولار من (500) الف دولار بكون باقى ليكم (99) الف مفروض تستلموه وتقبلوا ايديكم ضهر وبطن وتشكروا ادم سوداكال عليها. اعلام المريخ اتجه في حملة ممنهجة للهجوم على حازم مصطفى بنفس اللغة التى كان يكتب بها عن ادم سوداكال من اجل التمهيد لقدوم ايمن مبارك. الساقية لسه مدورة. من مواقع مختلفة رصدت هذه التقرير التى تذهب كلها نحو (تجريم) حازم مصطفى وإظهاره بهذا الشكل (الفوضوي) رغم انهم كانوا يدافعون عنه .. وكانوا سببا في قدومه. حازم يشرب من نفس (الكأس) الذي شرب منه سوداكال. لتصدير انطباع عام عن حازم مصطفى كتبوا في المواقع الحمراء هذه التقارير التى نعرض لكم جزء منها. (أرسل البلجيكي لوك ايمايل، المدرب الأسبق للمريخ، الجمعة رسالة في بريد النادي معلنا فيها اسم محاميه الذي يتولى قضيته ضد المريخ ومتبقي مستحقاته التي بلغت 20 ألف دولار أمريكي بعد أن رفض مجلس إدارة المريخ برئاسة حازم مصطفى الالتزام بجدولة مستحقاته). شوفوا الخطاب طوالي اتوجه نحو حازم … ادم سوداكال شافو الله. انظر الى هذا التقرير ايضا : (يعيش المريخ، فراغاً إدارياً منذ أربعة أيام، وذلك في أعقاب انتهاء أجل لجنة التسيير التي يقودها الرئيس المؤقت حازم مصطفى. ويترقّب الشارع المريخي، صدور قرار من لجنة الانتخابات بشأن حسم مصير الوضعية الإدارية للنادي الفترة القادمة في ظل الغموض الذي يكتنف مستقبل اللجنة المنتهية فترتها على ضوء التعثرات الكثيرة التي صاحبت مسيرتها وعدم الإيفاء بالعديد من الالتزامات لا سيّما – المالية – منها. وفشلت لجنة التسيير المنتهية فترتها في انجاز أهم التكاليف التي وردت في قرار لجنة الانتخابات السابق الخاص بتكوينها). شغالين تمهيد لأيمن مبارك .. طبعا هذه التقارير سبقتها الحملة (المزملية) التى قادها الدكتور مزمل القاسم ضد حازم مصطفى. عليكم الله ومن اجل المريخ .. وعشان الموضوع ما يبقى صور ولايفات .. قولوا لأيمن مبارك ابوجيبين .. انفخ (جيبك) سمح .. وادفع (401) الف دولار للاعب الليبي محمد المنير .. وخليك جاهز ايميل وغارزيتو و 7 محترفين ماشين عليك. انتوا فاكرين رئاسة نادي المريخ دي حاجة ساهلة. فاكرين الرئاسة (صور). الموضوع ما (التش) بس. في حاجات تانية. التش ملحوق. في موضوع التش .. الشيء الذي ادهشني هو ان حازم مصطفى قال ان التش طالب ب (700) الف دولار ورفض يتنازل عن دولار واحد .. ما ينقصن (شلن) .. وجاء ايمن مبارك وأعلنوا عن التعاقد معه بصفقة وصلت قيمتها ل (300) الف دولار. لماذا قبل التش ب (300) الف دولار من ايمن مبارك وهو (ابوجيبين) بعد ان قال التش لحازم مصطفى انه لن يعيد قيده إلّا بعد ان يستلم (700) الف دولار. نا ينقصن (شلن). انت شنو (الشلن) العلقت لينا فيه دا؟ في خلال 48 ساعة هل تنازل التش عن (400) الف دولار وهو مبلغ اكبر من المبلغ الذي استلمه من ايمن مبارك؟ عاوزين نفهم. ممكن المريخاب .. يعاينوا ليّ في (الصورة) فوق ويقولوا لي وأنت مالك؟ وأنا بقول ليكم المواضيع دي كدا ما بتمشي ما تغشوا نفسكم ساكت. شوفوا من النهاية كدا .. انا موضوع في المريخ ما فيه (هيثم كابو) ما بصدقوا. الغريبة الموضوع دا لا فيه كابو ولا الجاكومي. نصدقوا ليكم كيف؟ الجهة التى وقعت مع التش وبقية اللاعبين على خلاف مع (زارف مصطفى)… لا اعتقد انها على خلاف مع كابو والجاكومي حتى يبعدوا من (الصورة). الفار بقى يلعب في رأسي. نمشي الفار. عشان تستفيدوا من زمنكم … قروش نجيلة (حميدتي) ادفعوا منها قروش اللاعب الليبي .. والباقي خلوه عندكم ما تعملوه في (نجيلة)… النجيلة ملحوقة .. من جزيرة (توتي) ممكن تجيبوها .. عشان في عقوبات وغرامات ماشي عليكم. النجيلة تطير. لو نزلتوا التانية ح تلعبوا في دار الرياضة ام درمان .. استادكم ما ح يكون في حوجة ليه. ……….. متاريس الهلال يلعب اليوم عصرا امام مازيمبي. ننتظر تجربة مفيدة وقوية للهلال. الله يبعد عننا الاصابات. ان شاءالله الجميع في الحفظ والصون. مباراة الشباب في دار السلام مهم ان يخرج الهلال منها بنتيجة ايجابية .. يعني يا فوز يا تعادل. ما عاوزين نعيد (زنقة) سانت جورج. بنرجع نتكلم عن الموضوع دا. خايف الكهربة تقطع. …….. ترس اخير : والله نحن عندنا حكومة (القطوعات) بتحاسبنا عليها.
