بسم الله الرحمن الرحيم *عمتنا الله يرحمها كانت زولة لماحة وفطنة وتجيد توصيل رسالتها للشخص المعني وسط الف نفر دونما يشعر احدهم بشئ *فقط الشخص المعني بعرف انو الكلام ليهو *يقوم ينطط عينيهو *عمتنا دي شايلاها مع ود اخوها *اسمو دكتور مكي *ودكتور مكي مابقرش ملحة عمتو *والاتنين بحبو بعضهم من صميم قلبيهما *مرة عمتنا جابت فول سوداني كمية كبيرة لشفع ود اخوها *دكتور مكي قال ليها الفول ده كتير كدة بخلي الزول بليد *الكلام ده الصباح *عمتنا قعدت للعصر محتفظة بحق الرد *والد الأطفال محمد وهو اخو دكتور مكي جا *سلم علي عمتو وقعد *عمتو عاينت لدكتور مكي وخاطبت محمد *يامحمد اديك فول ولا ممتحن *غير دكتور مكي مافي زول فهم عمتنا قالت شنو ووجهت كلامها لي منو *ربطتني بها محبة كبيييرة *في كرة قاعدين كلنا *،سألتنا *العمل كدة منو؟؟ *،قلت ليها ده انا *قالت لي كان انت معليش *لكن ده لو زولا آخر كان الليلة الدنيا ماشالتنا *دكتور مكي قال لي هامسا خلي بالك زولا آخر ده انا *عمتنا كانت بارعة في توصيل رسالتها للزول الذي تستهدفه دون ان يشعر اي انسان في هذه الدنيا بتلك الرسالة *كانت تملك مهارة عالية وكبيرة في توصيل رسائلها دون مباشرة *فالغرض ان تصل الرسالة وتؤدي دورها عند من توجه له *وليس الغرض التبشيع بالزول الموجهه له الرسالة *،كانت معلمة في فن الكلام رحمها الله *ايها الناس *في المريخ اصبحنا كيمان ومليشيات متناحرة *لانقبل الآخر اطلاقا *ولا نعطيه فرصة ان يدلو بدلوه *فضاع المريخ مثلما ضاع السودان *والسبب واحد *عدم قبول الآخر *والقناعة التامة بان الكيان ملك لنا *لنا دي تتبع صاحب الكوم *الكيمان كلها تردد لنا لنا لنا *ولاتوجد قناعة بان لنا تعني لنا كلنا *وبهذه المناسبة *مناسبة لنا *ايام كنا طلاب وفي نشاط طلابي *عرفونا ببعض الطلاب والطالبات *من بينهم كانت طالبة حورية شاردة من السما *فاجاتني وهي مصافحة لي بتعريف اسمها *وغردت لنا *انا طبعا ولا هنا *قلت ليها لنا؟؟؟ لنا كلنا؟؟؟؟ *المهم *هذا التناحر وتلك العدائيات لن تقدم المريخ *بل تضع العراقيل امام اي خطوة للامام يحاول ان يخطوها الكيان *عليه اناشدكم واناشدنا واناشد نفسي *ان نعترف بالآخر حبا في الكيان *وان يكون الحد الادني من الاحترام *هو ديدننا الذي يقودنا لمحبة بعضنا لنعود في المريخ اخوة نعشق بعضنا والنجم ونهوي *ايها الناس *قادني لذلك *ماطرأ علي عمودي بعنوان(شكارتها دلاكتها) من اضافات في بعض مواقعه تناولت اساءات بالغة وتجريح للحبيب مزمل *لا ادري هل القصد منها زرع فتنه بيني وبين الاخ ميزو *ام هي محاولة لضرب مزمل من خلال منصات اخري *وللعلم الحد الادني من الاحترام المتبادل بيني ومزمل يكفي كل امة المريخ في احترام بعضها البعض *والود المغروس في قلبينا تجاه بعضنا *يكفي لنثر الحب علي الدنيا بمن فيها *ومن يختلف مع مزمل علي رأي *لايمكن ان تحل مكان النقد الاساءة *الفكر بالفكر يقارع *والرأي والرأي الآخر ينجبان الخلاص من سلوك الجاهلية ويقودان المجتمع لبناء قاعدة صلبه للحد الادني من الاحترام يقف عليها الجميع *مهما اختلفت مع الاخ مزمل علي رأي أو اختلف معي *فان ذلك لايمس احترام فطري ومحبة عذرية جمعتنا وستجمعنا طالما ان هناك مريخ يجمعنا *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *ناس الشرطة قالوا دايرين اذن وسلطات لينا *معقولة بس! *ده كلو حالتو بدون اذن يا والينا؟؟؟؟ شمارات الكلب ننساك كيف والكلب قال اذنكم معاكم وانتوا عارفين كده والي لقاء سلك