محمد عبد الماجد تعلموا (المشاهدة) بأدب..!! نهائيات كأس العالم المقامة في قطر نحن محتاجين نتعلم منها (أدب المشاهدة) – اعتقد ان مشكلتنا الكبيرة هي مشكلة (التنظير) الكتير والاعتراض والتقليل والانتقاد – نحن لا بعجبنا العجب ولا الصيام في رجب. عاوزين نتعلم نشاهد صاح. الاعلام عندنا بنظر – الاخطر من ذلك جمهورنا برضو بنظر – ممكن يكون جزء من (تكنيك) الاعلام (التنظير). (تكنيك) دي ذاتها في هذه الحتة (تنظير) مني. ما بيناتنا. لو ما بطلنا تنظير ما بنمشي لي قدام – الكلام دا ليس في كرة القدم فقط – لا الكلام دا في أي شيء. كأس العالم نحن ما عندنا فيه منتخب. ولا لاعب. ولا مدرب. ولا حكم راية. ما عندنا أي شيء. لذلك يجب ان نستفيد بما يلينا منه. يجب ان نتعلم (ادب المشاهدة). عندنا سوار الذهب ونابغ نصرالدين وهيثم مصطفى .. وكلهم بندرجوا في بند (المشاهدة). عادي المانيا تتغلب .. عشان ما ركزت في (الكورة) – ركزت في حاجات تانية. ممكن السعودية تفوز على الارجنتين .. عشان السعودية اخلصت وهي تلعب امام الارجنتين. المغرب تفوز على بلجيكا .. لأن المغرب تمتلك (امكانيات) الفوز على منتخب يعاني من (شيخوخة) الملاعب. عاوزين نتعلم. والله نحن الهلال – فريقنا دا كتلناه بالتنظير. مثلا – عندما كان موتا مدرب لنادي الهلال كنا بنعترض على ثبات التشكيلة .. وبنقول موتا بتحرك في حدود (14) لاعب. مع موتا .. لم نشاهد عيسي رمضان .. ولا كنا بتخيل ان (بانغا) يمكن ان يكون مفيد. عندما جاء فلوران – قلبنا الصفحة. قلنا فلوران بيلعب كل مباراة بي تشكيلة .. وما عندو تشكيلة ثابتة. الكلام دا صاح ولّا غلط؟ والصاح منو هنا ؟ موتا ام فلوران؟ على المستوى الشخصي انا بعتبر الاتنين صاح .. موتا عندو فلسفة .. وفلوران عندو فلسفة. وفي ناس مع النظرية الاولى وفي ناس مع النظرية التانية. الاولى صاح والتانية برضو صاح. وأي مدرب في العالم – الفاشل والناجح عندو اسلوب معين بلعب بيه. لكن انا بحب المدرب البتحرك في الكلية كلها وبشرك جميع اللاعبين. ما بحب التشكيلة الثابتة حتى لو كانت نتيجتها اسرع واضمن من التشكيلة المتغيرة. أي لاعب اتسجل في الهلال – هو لاعب جيد ومفروض يمنح الفرصة كاملة ويشارك مع الفريق على الاقل في الموسم في ( او (9) مباريات .. منها مباريات متواصلة ومتتالية عشان نحكم عليه صاح. ما بتقدر تحكم على لاعب وهو في الكنبة .. ولا بتحكم عليه من خلال مباراة او اتنين او حتى ثلاثة. على المستوى الشخصي .. في لاعبين .. كنت لا اثق فيهم .. وكنت احسبهم بدون جدوى .. وثبت لي عكس ذلك .. وفي عناصر كنت اعتقد انها ممتازة وجيدة وثبت لي ايضا عكس ذلك. الميدان هو الفيصل. يمكن ان يكون هنالك لاعب جيد .. وممتاز .. او هكذا تحكم عليه قبل الهلال .. ويأتي ويفشل في الهلال. ويمكن ان يكون هنالك لاعب تعتقد ان امكانياته لا تؤهله لأن يكون لاعبا في الهلال ويأتي وينجح في الهلال ويتفوق على غيره. عشان كدا مفروض ما نحكم على لاعب ساكت. ممكن ينجح لاعب مع مدرب ويفشل مع اخر .. والعكس صحيح. مرات المدرب بكون سبب في فشل اللاعب ومرات بكون السبب في نجاحه. وكذلك الاعلام .. والجمهور .. ممكن يفشّلوا لاعب وممكن ينجحوه. شفتوا كيف؟ اول حاجة قلت ليكم ما عاوزين (تنظير) وقعدت انظر ليكم. المهم في التنظير ما يكون تنظير سالب .. التنظير الذي يبحث عن المبرر وبفتش على الاسباب وبدعم اللاعب وبدعم المدرب مرحب بيه. عندما كان موتا مدربا للهلال .. كانوا بقولوا الهلال بنتصر بهدف وحيد ..رغم ان الهلال كان بقدم اداء جيد. كانوا بقولوا الاداء نعمل بيه شنو؟ الهلال مع فلوران اصبح يحقق انتصارات كبيرة .. فاز الهلال بأربعة اهداف في ثلاث مباريات في الدوري الممتاز من سبع مباريات لعبها الهلال. الناس معترضة على (الاداء) وعندها رأي تاني. انتوا عاوزين شنو؟ عاوزين الاداء والنتيجة ونحن في بداية الموسم .. والهلال دخل لكشوفاته عدد كبير من اللاعبين .. وهو بقيادة فنية جديدة في الجهاز الفني. اذا كنا عاوزين النتيجة والأداء فان هذا الامر لن يتحقق إلّا بعد 3 سنوات يكون فيها استقرار فني وأداري. التجانس والتفاهم بظهر بعد 3 او 4 سنوات متواصلة. هلال 87 لعبوا سويا اكثر من (3) سنوات وكذلك هلال 2007 وامتد حتى هلال 2010م. منتخب بلجيكا الذي يشارك في نهائيات كأس العالم في قطر .. اغلب عناصره شاركت مع بلجيكا في نهائيات كأس العالم في روسيا. وكذلك الارجنتينوالمانيا وفرنسا وكرواتيا. يمكن منتخب اسبانيا هو المنتخب الوحيد الذي حدث فيه تغيير كبير في التشكيلة. مع كل هذه القواعد والثوابت .. في متغيرات ومفاجآت قد تحدث. المهم يكون في تخطيط… ومنهجية وعلم. لكن مع هذه الاشياء يمكن ان تحدث (هزائم). اصلو ما في حاجة ثابتة. شفتوا التنظير دا كيف؟ قبل ما اتخارج منكم واريحكم من التنظير دا .. في حاجات (مكررة) وبتحصل في كل بطولة .. مع ذلك في ناس اتخصصوا من (الدهشة) فيها. زي شنو؟ انتوا ما تصبروا. يعني ح اقول ليكم كلام .. وما اتموا ليكم. بعد مباراة سويسراوالكاميرون وفوز سويسرا بهدف قرأت الكثير من التعليقات عن لاعب المنتخب السويسري إمبولو الذي رفض الإحتفال بعد تسجيله هدف سويسرا في مرمى الكاميرون بسبب أصوله الكاميرونية. الناس اعتبروا الموضوع دا فيه (دهشة) و ووفاء وإخلاص من امبولو … وأنا ارى عكس ذلك. يعني شنو ما احتفل؟ لاعب سجل في منتخب بلاده الاصلي .. ويمكن ان يكون سبب في عدم تأهل الكاميرون .. عدم احتفاله بعمل شنو للكاميرون؟ عدم الاحتفال دا .. شغل (كاميرات) ومواقع تواصل ساكت. وترضية ضمير. لو عند امبولو وفاء – اصلا ما كان يبيع بلاده ويلبس ليه شعار اخر غير شعار موطنه الاصلي. الموضوع دا في كورة القدم ممكن يكون عادي .. مع ذلك عدم الاحتفال الناس بعملوه موضوع. بخلوا الموضوع الرئيسي الذي جعل لاعب مثل امبولو يترك وطنه ويلعب لسويسرا ويسجل في الكاميرون وبمسكوا في عدم الاحتفال. عدم الاحتفال نحن نعمل بيه شنو؟ موضوع اخر ظل يكرر بعد مباريات كأس العالم .. اول مرة ممكن الموضوع دا يعمل دهشة .. لكن تاني مفروض يكون طبيعي .. وما فيه شيء غريب. قرأت عن الجماهير التونسية وهي تقوم بتنظيف المدرجات بعد مباراة منتخبهم. وكذلك قرأت عن الجماهير اليابانية. وجابوا لينا صور للاعبي المنتخب الياباني وهم بقوموا بتنظيف غرفة اللاعبين في الاستاد. الدهشة في ذلك شنو؟ الطبيعي ان يحدث ذلك. هذا الامر لا يجب ان يكون استثناء .. وهو لا يستحق كل هذه الضجة. التنظير كتر. احسن بعد كدا اقوم اشوف مباريات كأس العالم .. ضحيت بي كرواتيا وكندا وعاوز اكون جاهز لمباراة المانياواسبانيا. المانيا جاتها من السماء .. والمنتخب الياباني الذي فاز عليهم يخسر من كوستاريكا. ان شاءالله المانيا تطير. لكن اذا تأهلت المانيا يمكن ان تمنح اثارة اكبر للبطولة في المراحل المقبلة. ……………. متاريس والله يا جماعة في فريق المقاولون العرب مدافع نيجيري اسمه فاروقا نورالدين احسن من كل مدافعي الاهلي والزمالك. اتمنى هذا المدافع في الهلال. الهلال عاوز ليه مدافع محترف قاطع. ومدافع وطني. الهلال يغادر اليوم الى القضارف. القضارف نورت. بختكم يا ناس القضارف .. ح تستمتعوا بالهلال. الشرطة القضارف تقدم في هذا الموسم افضل مستوياتها. يعني المباراة ح تكون روعة. ما حدث في مباراة الشرطة والمريخ نتمنى ان لا يحدث في مباراة الهلال القادمة في القضارف. ………. ترس اخير : نقوم على كأس العالم.
