محمد الطيب الأمين ناس إتشاكلوا في (طبلة) تتوقع يدفعوا ليك إيجار !؟ * كأس العالم كان مخفف على المريخاب حال فريقهم وناديهم. * إندمجوا مع كأس العالم وحاولوا يتناسوا حالهم. * لكن النسيان محال. * أهو كأس العالم إنتهى وحالكم في حالوا. * لا نيمار ببقى ليكم ملعب ولا ميسي بقى ليكم نجيلة. * حالكم في حالوا. * وتعال أناقشك. * فوضى غير عادية. * فوضى إدارية وفنية. * بدأت منذ عهد سوداكال أول رئيس بعد جمال الوالي ومن بعده جاء ثلاثة رؤساء وما زال سوداكال رئيساً. * بعد سوداكال جا حازم وأبو جيبين لكن برضو لهسه سوداكال هو الرئيس. * كيف ؟ الله أعلم. * حالياً من الصعب تقدر تحدد منو رئيس المريخ. * الكاف بخاطب سوداكال بإعتباره رئيس. * والفيفا بتخاطب حازم بإعتباره رئيس النادي. * والإتحاد السوداني بخاطب أبو جيبين بإعتباره رئيس. * تلاتة رؤساء وبعد ده الفريق ما عندو ملعب. * قوم على حيلك. * مشرد وحظو عاثر. * صعد المجموعات كيف الله أعلم. * والله حقو الإتحاد الأفريقي يشترط وجود ملعب مؤهل للمشاركة في الأبطال. * ما عندك ملعب زي الناس ما تشارك من الأساس. * حتى لو كان الأهلي المصري ذاتو. * ما عندو ملعب ما يشارك. * وده بقفل باب الفساد والتواطؤ. * يعني عندك مثلاً السنة الفاتت الأهلي أجبر المريخ يلعب جميع مبارياته بالقاهرة. * إستغل ظروف المريخ القاسية وساقهم القاهرة في عملية أطلقنا عليها (بيعة سوق العتبة الشهيرة). * تلك (البيعة) التي من شروطها أن يأكل المريخ ويشرب على حساب الأهلي بالإضافة إلى منح المريخ ثلاثة نقاط مع الإلتزام بأن يفوز الأهلي على الهلال رايح جاي ويفوز على صن داونز رايح جاي برضو. * دي ملامح البيعة التمت. * في زول عاقل بصدق كلام زي ده عليك الله؟ * السخف ده كلو حصل عشان المريخ ماعندو ملعب. * السنة دي أبو جيبين داير يلعب بإستاد الهلال. * وبحاول يستغل طيبة السوباط. حماه الهلال * ويعزف على وتر الوطنية. * السوباط رئيس الهلال .. أوكي. * على العين والرأس. * لكن الإستاد ما حق السوباط. * إستاد الهلال بالقروش. * ما مجان. * عندك ادفع وألعب. * ما عندك ما بتلعب. * زمن (الحنك السنين) والوطنية إنتهى. * ده زمن قروش. * القروش الخلتك تفشل في صيانة ملعبك تلاتة سنين. * عشان ملعبنا ما يبقى زي ملعبك ونقعد نتلفت يجب أن تدفع. * تدفع عشان نحن بقروشك نحافظ على الإستاد. * عشان لما تحتاج ليهو تاني تجي تلقاهو بحالة جيدة. * السوباط لو داير يجاملكم ما عندنا مشكلة لكن ما على حساب الهلال. * يجاملكم في أي حاجة تانية إلا الهلال. * السوباط ربما لا يعرف تاريخ المريخ معانا. * أرشيف المريخ معانا وسخان جداً. * إرشيف غير مشرف. * كعب عديل. * أفضل للمريخ أن يذهب للعب في القاهرة. * أو الجزائر أو تونس. * المهم بعيد مننا. * نحن ما ناقصين والله. * الفينا مكفينا. * إستاد الهلال للهلال والمنتخب.حماه الهلال * أما الباقين بالقروش. * بالدولار. * تدفع إيجار وتأمين. * وبنحاسبكم بالكرسي. * و.. و.. * هو عليك ناس إتشاكلوا في (طبلة) تتوقع يدفعوا ليك حق إيجار؟
