محمد الطيب الأمين قرار محترم .. المجلس قدم (السبت) وشاف (الأحد) يوم (الخميس) !! * في العام السابق وافق الهلال على إستضافة مباريات المريخ بالقروش في مجموعات الأبطال . * وقد رفض المريخ وقالوها صراحة : (ننسحب ولا نلعب في زريبة العيش) . * وساقهم حازم إلي الخطيب فكانت بيعة سوق العتبة الشهيرة . * تلك البيعة التي نصت على شروط واضحة وصريحة غير أن الأهلي المصري لم يلتزم بها . * هي أربعة بنود نصت عليها بيعة العتبة الشهيرة . * 1- يدفع الأهلي مصاريف (أكل وشراب) المريخ طوال فترة إقامته . * 2- يغلب ليهم الهلال رايح جاي وكذلك يغلب ليهم صن داونز رايح جاي . * 3- يفتح ليهم و يخليهم يغلبوهو وشيلوا تلات نقاط . * 4- يدوهم لاعبين أتنين أعارة . * الله يسألك يوم الموقف العظيم الكلام ده لو قالوا لشافع عمرو سنتين ممكن يصدق؟ * أنا والله ما مستغرب في الأهلي. * اللوم ما بقع على الأهلي. * اللوم علي الصدق الأهلي. * غايتو دي بيعة ما حصلت في تاريخ كرة القدم . * والله صحي . * أها السنة دي الجماعة قالوا دايرين يلعبوا في الزريبة . * مالكم ؟ * قالوا ما دايرين يكرروا تجربة السنة الفاتت . * هي لكن السنة الفاتت ما كانت تجربة . * كانت بيعة . * ما تجربة . * في فريق بين التجربة والبيعة. * المهم .. قالوا دايرين نلعب هنا . * ودخلوا علينا بالحديث الوطني . * تسمع كلامهم عن الوطن والوطنية تحلف تقول فيهم زول رفع العلم 56 . * الهلال عبر مجلسه وافق . * وقد وقفنا ضد القرار . * المجلس كان يرى أن ذلك ربما يخفف حدة التعصب . * كانوا بعتقدوا كده . * وكانوا دايرين يستضيفوا المريخ من منطلقات وطنية. * وجات مباراة القمة . * فكانت بعض جماهير المريخ كالعهد بها . * ما قصرت تب . * عملوا الما مستغرب . * وإنكشفت الوطنية بعد أيام قليلة جداً. * مجلس الهلال عمل إجتماع بالأمس. * وأصدر قرار منع المريخ بعد التخريب الحصل . * قرار محترم يشبه الهلال وتاريخ الهلال . * إستحق عليه أعضاء مجلس الهلال التحية والتقدير . * مجلس الهلال بهذا القرار حفظ كرامة الهلال . * كما أنه سيحفظ منشآت الفريق . * قرار حكيم جداً . * نحن ما مجبورين نستقبل لينا ناس جايين للخراب. * عشان كده المجلس قدر مصلحة الهلال. * وما في أي عيب كون أن المجلس وافق من قبل ثم تراجع. * يتراجع طوالي طالما في مستجدات ومبررات للتراجع. * المجلس ما نام وقام قال أنا متراجع. * المجلس قدم (السبت) وشاف (الأحد) يوم (الخميس). * وبالامس أصدر القرار الصاح. * التحية لاعضاء مجلس الإدارة على هذا القرار المحترم جداً. * و.. و.. * وإستاد الهلال للهلال والمنتخب.
