كثير من المعاملات التى لا يقرها شرع ولا دين ولا قانون قد أصبحت شيئاً أصيلا ومعترف به وصارت من (الثوابت) وصار المواطن يقوم بالتعامل معها فى إذعان ورضوخ و(عادية) ربما لأنه أى المواطن يعلم يقين العلم بأنه لا يستطيع أن يكسب أى قضية أو شكوى إلا فقط عندما يقوم برفعها ضد أخيه (المواطن) ! صديقى (ع) الذى لم أشاهده منذ فترة رأيته بالأمس وهو يتخطانى بينما كنت أسير فى أحد شوارع الخرطوم، الغريب فى الأمر أنه كان يحدث نفسه وهو يسير (يعنى بيكلم روحو) لم أندهش بالطبع لذلك على الرغم من قصر الفترة التى لم أراه فيها فنحن كلنا (بقينا نكلم روحنا) ومعظم أفراد الشعب الفضل أصبحو حاجة من إتنين يا بكلمو روحهم يا بكلمو روحهم ، المهم أسرعت الخطى و(حصلتو) وبالطبع تصورت أنه سوف يقوم بمعانقتى وأخذى بالاحضان غير أنه ولدهشتى توقف عندما رآنى ونظر إليا نظرة (تساؤلية) وهو يقول : - طيب ما أجيبا أنا ... طيب ما أجيبا أنا.. بعد أن رجوته أن يستهدى بالله ويبادلنى التحية طلبت منه أن يشرح لى الامر ، أمسك بمنديل ورقى وأخذ يمسح فى حبات العرق التى تبلل وجهه وأخبرنى فى إيجاز بأنه يريد أن يقوم بإدخال الكهرباء إلى منزله إلا أن المسئولين فى شركة الكهرباء قد طلبو منه أن يقوم بشراء عدد إتنين (عمود كهرباء) بمبلغ يتجاوز الثلاثة ملايين جنيه وبعض الكوابل والأسلاك التى تتجاوز قيمتها الما بعرف شنو داك، ثم شراء عداد (الجمرة الخبيثه) الذى يتجاوز ثمنه المليون ونص ... ثم قام صديقى بوضع كلتا يديه على وسطه وحدجنى بتلك النظرة الغاضبة المتسائلة مرددا قولته تلك : - طيب ما أجيبا أنا ... طيب ما أجيبا أنا أردت التخفيف علية فقلت له : - ياخى ما مشكلة ما أى حاجة بقت بالقروش العلاج ، التعليم ، الشنو ما بعرفو داك يعنى بس بقت على ناس الكهرباء؟ حدجنى بنظرة غاضبة أخرى وهو يقول : - دى ما المشكلة ؟ - طيب المشكلة وين؟ - المشكلة إنو بعد ما أشترى عداد (الجمرة ده) بقروشى ح يأجروهو ليا وكل شهر لازم أدفع ليهم ستة ألف جنيه إيجار مع إنو ح أكون مشتريهو بى قروشى أجبته فى ذهول : معقول يبيعوهو ليك ويأجروهو ليك ؟ - بالله مش أحسن أجيب أنا ..الكهرباء دى!!؟؟ تركت صديقى والدهشة تملؤنى .. لا أدرى هل (جاب كهربتو براهو) كما قال إلا أن الإحتمال الأقوى أنه قد جاب (كهربت الشركة) وأذعن لدفع هكذا (مال) وهو صاغر .. أو ربما (وهذا إحتمال وارد شديد) بأنه قد ترك الأمر برمته وزهد فى المسألة ، غير أن قصة صديقى هذه قد أكدت لى حقيقة واضحة وضوح الشمس وهى إننا (شعب طيب) وإبن ناس ممكن تاكل و(تقش أيدك) فى (طرفو) ! أيه ده؟ تشترى (الحاجة) يعنى يبيعوها ليك (عديل كدة) وبعدين (يأجروها) ليك وكمان أيه؟ (إيجار مدى الحياة)،أيه (العين القوية) دى؟ الناس دى ما بتخاف ربها؟ الكلام ده يجى كيف؟ قانونا؟ وشنو رأى (علماء السودان) فى النوع ده من أنواع (البيوع) ؟ حقو يفضوا لينا شويه ويجاوبوا لينا على تساؤلنا ده ، ووكت الكلام جاب الكلام برضو حقو (علماؤنا الأجلاء ديل) يورونا ويفتوا لينا فى مسألة (قطوعات الكهرباء) الدافعين (ثمنها) مقدماً دى ! مش مفروض (شرعاً) ناس (الكهرباء) ديل يرجعو لينا قروشنا كلما الكهرباء قطعت عشان نستفيد منها ؟ والا كلامى ده ما (موضوعى) وهضربه ساكت مع (السخانة) والكهرباء القاطعه دى ! المهم يا جماعة سخانة ما سخانة (أنا عاوز فتوى
