كلنا بشر أكيد قاعدين نغلط .. تقبل خطأك بإدخال ابنك كلية طب بإحدي الجامعات الخاصة (السنة بالشيء الفلاني) وأهو هسه إتخرج وقاعد ليك عاطل في البيت .. كان أحسن توديهو (المنطقة) كان وفرتا قروشك والواد إتعلم ليهو صنعة .. تقبل خطأك يا عم . * اكتسب عادة جديدة : كالإبتسام في وجه متحصل رسوم النفايات ! * تعرف على أصدقاء جدد : * طبعن يحبذ أن يكون من ضمنهم (ست الشاي) وبتاع البقالة وسيد اللبن والخدرجي ! * إبتدي حمية غذائية جديدة : غير نظام أكلك ... قلل من اللحوم الحمراء والبيضاء والطماطم والفواكه (يا مفتري) وكمان الفول الصحنو بقى بخمسة جنيه .. أكل (في خاطرك وبس) . * استيقظ كل يوم وقول لى روحك بانو اليوم ده ح يكون يوم جميل : ده طبعاً قبل ما تفتح محفظتك علشان تشوف فيها كم جنيه ح تستقبل بيهو اليوم ؟ * إتعلم إنك تخاطر : علشان تطلع من حالة الفلس المزمن دي أمشي خد ليك مرابحة من بنك و ح تتأكد بعدين (في السجن طبعن) إنو دي أكبر مخاطرة عملتها في حياتك . * إتعلم لغة جديدة : تجربة رائعة انك تتعلم لغة جديدة .. العبدلله ينصحك بتعلم اللغة (الحبشية) علشان مش ممكن تكون قاعد في بلد ومش عارف لغة غالبية سكانها . * اصحى بدري بطل سهر : نوم من بدري وبطل تساهر وإنتا بتفكر تتخارج من مصاريف يوم بكرة كيف .. السهر مضر بالصحة ولا تنسى أن الصحة على مسئولية صاحبها في البلد دى * خليك دايماً مركز : ركز .. ركز .. ركز لأنو لو تركيزك ضعيف الكمساري ح ينوم بالباقي .. وبتاع طلمبة البنزين ح يأكلك في كم لتر .. وح تنسى إنو الليلة عازم ليك ضيوف والبيت ما فيهو نفاخ النار ! * بطل تأذي نفسك : مفيش لزوم تتفرج على (محطاتنا التلفزيونية) علشان ح تصاب بالبلاهة أو ممثلينا (القاعدين يمثلو) .. أو لعيبتا القاعدين (يبرطعو) أو مذيعاتنا القاعدات (يتحننو) أو مسئولينا القاعدين (يصرحو) والأخيرة دى مفروض يعملوا ليها (أورنيك ) ! * جرب حاجة جديدة : مش معقول من يوم خمسة في الشهر وإنتا تطلب (سلفة) من أصحابك ومعارفك عشان تمشي الأمور .. جرب حاجه جديده .. شيل ليك روشته و أقيف ليك في إشارة (مثلاً) ! * بطل تبدد طاقتك : الموت بقى كتير وكذلك المرض .. وأساساً (الفول ما خلى ليك طاقة) فأنصحك إنك توفر شويتين الطاقة العندك وتحتفظ برسالتين في موبايلك .. رسالة عزاء .. ورسالة كفارة ولا تنسي أن ترسلهما رسالة (جماعية) علشان (توفير طاقة الجيب وكده) !! * إتعلم إنك تتجاهل : حتي لا يرتفع ضغطك وتضيع في شربة مويه ويفقد أبناؤك (الحاوي الوحيد) لديهم تجاهل كل ما يعكنن مزاجك كعدم إقتصاد الإقتصاديين في تصريحاتهم عن الإقتصاد ! * إتعلم انك تشكر الآخر : العرفان والشكر ... مهم جدا في حياتنا .. لابد أن تشكر مثلاً (شركة الكهرباء) على إنقطاع التيار لأنها وفرت ليك شوية قروش وكده ! * نمي مهارات مختلفة لديك : لا تتوقف عن التعلم .. اتعلم ..كل يوم شيئاً جديداً .. كالدخول عبر نافذة الحافلة عند الزحام !! * اقطع علاقتك بشخص ما : في بعض الأحيان تشعر ان أنسب حل انك تقطع علاقتك بشخص ما لأنه يسبب لك إزعاجاً في حياتك .. .. أقطع علاقتك (بالجزار) وقارن بين (صحتك والأولاد) قبل قرار المقاطعة وبعده . * تعلم لعب رياضية : أقترح عليك تعلم (رفع الأثقال) فبعد أن قررت السلطات عدم دخول الأمجاد إلى داخل مطار الخرطوم وترك المسافرين وأمتعتهم بعيداً فى الشارع العام سوف تفيدك هذه الرياضة فيما إذا قررت السفر أو كنت مرافقاً لمسافر . * توقف عن التذمر والشكوى : تتذمر ليه من أساسو؟ ما المواصلات فاضية والرغيف كبير وكل شوية يقولو لينا فكوا الحزام ..فكوا الحزام - على قول (عادل إمام) * إبتدي هواية مختلفة : إبتكر ليك هواية مختلفة في حياتك .. تخرج بيها من تفكيرك في مشاكلك .. (مثلاً) قم بعد العربات التى تمر أمام منزلك وللا أقول ليك .. قم بعد الملفات التى تدخل إلى مكتب النائب العام ! * تأمل يوميا : ما تقول ليا ما عندي وكت عشان أتأمل فيهو .. التأمل بيقوي يبعث على الأمان ويقوي السكينة بداخلك .. تأمل كيف أن الله لطيف بعباده .. ماهيتك جنيه والإيجار جنيه وأهو إنتا وأولادك عايشين ! * ابتسم عشر مرات (قبل الاكل) : لا أنصحك بتنفيذ هذه النصيحة عند تناول الغداء في بيوت (البكيات) لأنك بعد الإبتسامة العاشرة سوف تجد (صحن اللحمة) فاضي ! كسرة : النصيحة الأخيرة : توقع الغير متوقع : إستعادة (خط هيثرو) مثلاً! كسرة ثابتة : أخبار ملف خط هيثرو العند النائب العام شنو(ووو ووو ووو)؟
