مناظيرالاحد 4 مارس 2012 [email protected] * فى حوار (سيُنشر لاحقا) أجرته صحيفتنا مع العضو المنشق آسف ( السيد) العضو المنشق عن حزب الأمة القومى ونائب رئيس الحزب السابق ورئيس التيار العام ( التيار العام ده شنو، والله ما عارف) السيد آدم موسى مادبو، حذر سيادته من مغبة الربيع العربى فى السودان قائلا ان الثورة فى السودان ستؤدى للخراب والدمار (كَتلة)، وتفتيت الوطن ( لسة ؟!) وهذا السؤال من ( أندنا)، مع الاعتذار لصديقى على اليمين صلاح عووضة عن الاعتداء الصارخ الواضح الفاضح على مفرادته واستخدام ( أندنا ) هذه بدون الحصول على إذن كتابى مسبقا منه ..!! * وأضاف سيادته ( السيد آدم موسى مادبو موش صلاح عووضة ) بأنه لا بد من خيار التفاوض ( خيار ايه؟) لتكوين حكومية انتقالية قومية حتى لا يتمزق السودان الى اكثر من دولة !! ( ايه ده كلو؟ ايه المفهومية اللى فايته الحد دى ؟! هو لسة حيتمزق ؟!) * أما حكاية (حكومة انتقالبة قومية) هذه التى ذكرها الأخ ( عفوا السيد ) مادبو فذكرتنى نكتة الحرامى الذى عندما شعرت به ست البيت قعدت تقرص فى كراع راجلها وتقول ليهو( الحرامى أصحى، الحرامى أصحى ، الحرامى أصحى) والراجل مطنش وعامل نفسو نايم آخر نوم، والحرامى سامع وفابت أضانو ولمن زهج قام لكز الراجل لكزة قوية وقال ليو ( ياخ ما قالوا ليك اصحى الحرامى، ما تصحى و تبطل البياخة دى ..) ..!! * وأقول للسيد مادبو كما قال ذلك الحرامى الشهير لرجل البيت الجبان ( ياخى شنو البياخة دى ما قالوا ليك حكومة قومية مافى .. عدييل كده، فى شنو تانى ؟!). * حقيقى الواحد يحتار لمن يسمع ساسة قدامى وكبار جدا مثل السيد العضو المنشق عن حزب الامة القومى ونائب رئيس الحزب السابق ورئيس التيار العام ( اوعك من التيار دى) السيد المحترم آدم موسى آدم مادبو بكل خبراته الطويلة ومعرفته بدهاليز السياسة وخفاياها ودسائسها وألاعيب الاخوان وجماعة المؤتمر الوطنى ودسائسهم المعلنة وغير المعلنة مما يعرفه القاصى والدانى والسياسى الحصيف ورجل الشارع العادى يحذرك من مغبة انفصال البلاد وتشرذمها وتفتتها، يعنى كأنها لم تتفتت ولم تتشرذم ولم تنفصل ( أمال ايه اللى حصل فى الجنوب واللى حاصل دلوقتى فى كردفان والنيل الأزرق ودارفور وهلم جرا ؟) ..!! * والأغرب من ذلك .. حكاية الحكومة القومية الانتقالية دى الماسكين فيها الناس ديل .. ياخى جماعة المؤتمر الوطنى قالوا ليكم بالواضح كده بدل المرة مية انو (حكومة قومية مافى) عارفين مافى يعنى شنو ولا دى عايزة شرح كمان؟ (والدايرا .. يجى يعمل كده شنو ما عارف )، وفيها لحس كيعان ودغمسة وجغسمة وحاجات تانبة، وبرضو لسة ماسكين لى فى الحكومة القومية وما ادراك ما القومية ؟! * عليكم الله يا ناس مادبو آسف يا ناس سيد مادبو : ( نقطونا بسكاتكم ) .. وعلى رأى السيد وزير المالية الهمام :( إذا كان الكلام من لالوب، فالسكوت من نبق ) .. !! الجريدة 4 مارس 2012
