(التيار) الباب البجيب الريح السلام عليكي... يا ستنا.. وست الناس جت:- اما بعدُ.. وقبلُ... وحسعتية.... اذكرك بصلة الرحم البينا وبينك.... ابوكي كلومبس.... امو ... كلومبسة بت زهرة بت عبد الرحمن..ود جار النبي... ود جامع ود ركاب.... ود العباس بن عبد المطلب(اها شفتي وصلتينا كيفن؟).... يعني نحن اخوالك عديل كدي....والزمن الكعب هو الرماكي في اخر الدنيا ونحن بعاد منك.... ومتلومين فيكي لوم شديد... لكن الضفر ما بيمرق ن اللحم...واللهي ماكي طالبنا حليفة..ولن طلبتيها اطلبيها يا ستنا كضاب البيقول لك لا...باكر دي ان دايرة الحليفة نمرق مسيرة مليونية... ونقيف في الساحة الخدرا ونحلف كلنا... ان درتي نجلف بي الله بنحلف وان درتي نحلف باي شي تاني بنحلف....داير اقول شنو؟...وليداتنا وبنياتنا عرفو الرحم دا وعرفو البقية دي...وبقو جارين علي اللوتري.. وقدر مافينا من زعيط واللا معيط... مرق البظبورطي... وقال جايكي...الجواب دا... انا عشمان فيكي.... وفي عفوكي ورضاكي.... اولك بالتبادي.. ما تشوفينا كدي نحن ناس كضابين.. وهراشين..وفاكينها في روحنا ساكت.... وبعد مرات وقت نهوش قاعدين ننضم برا من روسينا... نضم لا في الشرق لا في الغرب... الليمات دي قدر ما امشي لي حفلة يطلع فنان او فنانة ويشبكنا( الجدري البيفقع).. والجدري السبق القراحة.. والجدري الحجز البازنجل....والجماعة يقومو بعكاكيزهم يبشرو ويهوشو ويتحنفشو... اوعك يجيبو لك النضم دا و تصدقي.. وتقولي الناس ديل عندهم اسلحة بايلوجية.. وتجي تضربينا في صمة خشمنا... زي ما قلت لك قبال كدي!....انا غايتو خاصة نفسي دي... غير سكيكين في التكل اللت بصل لا املك اي سلاح.....وان دايراني البصل ما اقطعو بالسكين ..وقلت لي فقشو بايدك ساكت ..ما عندي مانع....وبعدين لعلمك ....انتي قايلة شنو؟ ما تشوفيني كدي! انا زول فقااااااش..فقاش وهراش....قبال كدي حدست المسعلوين.. يوقفو الغنا البيجب لنا التهم دا....مافي زول سمع نضمي....وقلت اخير انضم معاكي مباشرتن.... غايتو الحفلة العندي فيها ايد بسكت الفنان... داك الليلة جيبنا فنان وفتحت خشمو! جاب سيرة الجدري.. طوالي سكتو... سكت.... نان قايلاهو غنا شنو بعدها..؟... غني القنبلة.. سكتو برضو قلت يمكن تفهيمها قاصدين قنبلة نووية....سكت...غنى (ما داير لك الميتة ام رمادن شح...دايراك يوم لقى بدميك تتوشح).... مشيت برضو حوشتو و..سكتو..قلت لو دي يمكن ستنا امريكا تفهمها انها من ادبيات وثقافة تنظيم القاعدة... في النهاية..... قلت لهم يا جماعة باقي الحفلة في رائي تموهو..دلوكة بس..مافي زول يفتح خشمو.... في الختام يا امريكا نحن لايمانك.. يا كافي البلا... مالك قاطعاهو معانا ناشف؟.... لا عرس يجيبك؟..ولا بكا يجيبك؟ ولا سماية تجيبك....؟.. سمعتيهو واللا جابوهو ليكي؟.... اوعي تقولي لي: شفتو! شوف عين! قفل الباب:- أنت النص الأجمل بين نصوصي . أنت الجسد الراوي شعراً .. أنت الجسد الصائغ أدبا. أنت قوام تاريخي . يروي قصصاً . يعزف ناياً . يكتب كتبا .