جلس الهلال وتحكر وسط قائمة الخمسة المبشرين باللقب .. لقب الفريق الافضل على مستوى القارة السمراء .. جلس مع الكبار مازيمبي الكنغولي وهارتلاند النيجيري والملعب المالي ووفاق سطيف الجزائري في انتظار حفل التتويج الكبير في غانا مارس القادم . *وبغض النظر عن النتيجة التي تؤول اليها المنافسة بناء على ترشيحات المختصين فيكفي الهلال فخراً انه استوفى شروط الترشيح وتوفرت في سيرته الحسنة المعايير التي يعتمد عليها الكاف في اختيار الأندية المرشحة للجائزة . *مايعني الاهلة ويجلب اليهم الغبطه كون سيد البلد (كوش على السيادة) بالداخل وينوي (التكويش) عليها على مستوى القارة فإن تحقق ذلك فهو المراد والا فيكفي ترديد الاسم في المحفل القاري الكبير *والهلال الذي حقق الافضلية على المستوى العربي لهو جدير بتحقيقها على المستوى الافريقي بإعتبار إن عدد كبير من الاندية العربية ذات الاسم والسمعة تنتمي جغرافياً للقارة السمراء. *الهلال الذي اعتاد في السنوات الاخيرة ان يجلس في (مقصورة الكاف) والهلال الذي بات اسماً في سماء القارة ورقماً بارزاً في سجلات الاحصاء لن يرضى اطلاقاً ان يعود القهقري ويتراجع لخانة الاندية المحلية التي كل همها حسم الممتاز وكأس السودان فهذه البطولات عند الهلال مجرد (رفح) يعبر من خلاله لتحرير الكرة السودانية من ربق الطيشية التى ادمنها والوصيف طوالي ومنتخبنا.. * وعلى ذكر منتخبنا ترى ماهي اخباره هل أعيد أمره لمازدا وجماعته ام سيكون (كرت انتخابات) سيبشر الاتحاد باستقدام مدرب اجنبي من الوزن الثقيل بشرط ان لا يكون في مستوى ثقالة قسطنطين القعد يتلكك زي الطين وفكانا منه رب القارعة ويس. *ادارة شأن المنتخب لا تختلف عند الاتحاد عن (حجوة ام ضبيبينة) التي تطغى على كافة الاحداث حالياً .. فالاتحاد ظل يتعاقد مع الاجانب (فاقدي المعرفة) .. والنتيجة دائماً بهدلة المنتخب وسمعة الوطن .. يقوم يتفك من الخواجة بعد تلتله .. يجيب مازدا يمارس الفشل الذي أعتاده .. يصبر عليهو شوية .. ومازدا يصبر كتير على النقد.. وليته لا يصبر .. الغريبة بيصبر رغم انه هو وجماعتو شغالين (ملح) لكن ملح طاعم خلاص.. شغالين عشان خاطر عيون حلوين .. وآاسفاي .. *المهم يقوم ينهزم المنتخب مرة ومرتين وثلاثة .. تولع نار .. يتمسك شداد .. يزوغ معتصم .. يبرر مجدي (كعادته) .. تطلع اشاعة .. جايبين خواجة .. يجي مازدا .. يدخل الورشة .. يعمل سمكرة .. يغير البهية والبدلة والكرافته .. يرجع تاني .. يتعادل .. ينهزم .. يجي قسطنطين .. زي الطين .. يتخارج نحمد الله .. يرجع مازدا .. بي مكنة هايس .. نفس النتيجة .. مشوار واحد ويسيح المكنة.. *الانتخابات جاية .. في (عمرة كاملة) للجهاز الفني .. النتيجة مامعروفة .. الله اعلم. *حسن شحاته .. مدرب و .. ط.. ن.. ي .. مالو .. عيبوهو لي .. صعد .. بالفراعنة السماء .. وماغرق بيهم ولا في شبر ميه .. اخرتها نيجيريا طلبتو .. وفي رأسها ختتو.. *المعلم المرشح الابرز لقيادة النسور في مونديال جنوب افريقيا .. ونحن مع مازدا مرة قدام .. مرة وراء .. *سؤال .. لاعيبتنا ..كيف ببقوا مدربين ..؟ قاعدين يعملوا شنو عشان يبقو مدربين .. بس بيقلعوا بدلة التمرين وبيلبسوا بدلة التدريب .. طوالي كده .. بدون مقدمات .. بدون كورسات .. بدون سفريات .. بدون قراية لا تاريخ .. لا انجليزي .. لا رياضيات .. *وعايزين يبقو زي شحاته .. والاتحاد يتفرج .. لا لا ماقاعد يتفرج .. قاعد يشتم مرة في اللاعبين الجيعانين .. ومرة المدربين ناس زعيط ومعيط.. ومرة الإداريين .. الجلابة .. اصحاب الفاقد التربوي.. ومرة .. لا .. لا مرات كثيرة ..شتيمة في الاعلام .. فصل الفاقد التربوي هو الاخر .. المتعطل .. المتبطل .. وحسن شحاته يزحف باخوان جدو من فوز الى فوز ومن منصة الى منصة .. *يا اخي احمد حسن اتصل بي قبل كم يوم يشكي يدينو وجعوهو من شيل الكاسات .. قال لي مابتعرف ليك دكتور شاطر يشوف لي ضهري ده فيهو انزلاق ولا (شنو) الحكاية ..قلت ليهو السودان كله بتعالج بره .. والله ابوتريكة ليهو حق يزوغ .. دي الكاسات دي تئيلة بشكل..! *على فكرة احمد حسن في سن عدد كبير من المدربين عندنا ..! *الفرق بين اللاعب والمدرب عندنا انه اللاعب جوه الميدان والمدرب على الخط.. لا توجد مؤهلات اخرى .. الاتحاد مافاضي لتأهيل الراغبين في مزاولة المهنة .. والراغبين طرش في زفة ماعارفين يبدأو من وين .. ولو عارفين .. وين الفلوس .. معروف أن اي لاعب يعتزل الكرة يكون الفرق بينه وبين المتسول عفة اليد وعزة النفس .. وياما ماتوا مشاهير .. جوعاً وعوزاً وفقراً ..! *هس ده وكت ياشحاته تخلينا نقلب فيهو المواجع .. الله يوفقك مع النسور .. يامدرب ياوطني يا شبيه الخواجات .. عفواً الخواجات .. بشبهوك..!! *نجم الهلال خليفة لاعب يشبه الهلال في سلوكه واخلاقه .. خليفة اهدى كاس بني ياس لزميله الدعيع الذي سانده وآذره في بداياته مع الازرق .. خليفة زاد على ذلك بانه يتشوق لحضور يوسف محمد ويوسف منافس قوي لخليفة .. لكن ابو الخلف تهمه مصلحة فريقه *وهنا يبدو الفرق شاسع بين لاعبي الهلال ولاعبي المريخ الذي وقفوا(الف احمر) ضد الملياردير ابو هدف واحد (وارغو) فحاربوه وكادو يجلدوه في سوق الله اكبر .. مازال الحكم ساري المفعول!! *طمبل هدد بالاعتزال .. عدييييل كده وقبله وارغو قال المريخ كابوس عديييل كده .. وارغو ماعلينا بكوابيسو لكن مهرجان تكريم طمبل واجب وطني على الشعب الازرق .. *طمبل وريتشارد ..ارقدو قفا .. جملة اخيرة ملاك .. والنظرة هلاك ..! هلال العز Alilal [[email protected]]
