أااااااي حكومة حتمسك البلد دي لازم تعرف نقطتين عن الشعب السودانى ده: اولا الشعب السودانى ده بقى مرضان كورة وسياسة... ثانيا الشعب ده وصل لمرحلة طمام بطن مبالغ فيها وممكن يستفرغ في اي لحظة... شايف الناس بتتكلم وتتفلسف كتير في مليونية 30 يونيو وعايز ارد عليهم ردود بسيطة... عارفين ليه المليونية دي؟؟؟ 1: ما حصل طلبنا من مسؤل انه يقلب لينا البلد دي لسويسرا أو جزر هاواي،،، نحن طلبنا ( نحس بس ) انه الحكومة الجابتها الثورة شغالة بضمير زي ما اتفقنا معاهم ولو باي شئ بسيط واصلوا ما مستعجلين، * لكن لما يجينا عباس مدني الفاشل ويقول لينا انه 180 جنية بتكفي أسرة... هنا ما بنصبر. * لما نلم ال ورانا والقدامنا تلبية لنداء القومة للسودان لأنه حمدوك بعضمة لسانه قال انه من أولى أولويات القروش دي هو إصلاح قطاع الكهرباء... وتجي الكهرباء تقطع 14 ساعة في اليوم.... هنا ما بنصبر. * لما السيد وزير الطاقه المحترم مايكون جايب خبر بأنه نقابة الكيزان هي البتصدق لتانكرات الوقود ومعرقلة عمل المصفاة... هنا ما بنصبر.. * لما يتم رفع الدعم عن الوقود ويختفي المدعوم ويسيطر التجاري على الطلمبات و برررررضو معدم... كده مابنصبر * لما نطلع ونموت عشان ازمة الخبز ومدني جرادل سنة كاملة لا قادر يحلها ولا عايز يعترف بفشله... هنا مابنصبر * لما الرغيفه سعرها يبقى ضعف و ( نفس الوزن ) ونحن نسكت وبرضو الازمة ما تتحل.. هنا ما بنصبر.. * لما حتي المضاد الحيوي ينعدم من الصيدليات.... هنا ما بنصبر. * لما أسطوانة الأكسجين تجيك بالواسطة و بالملايين... هنا ما بنصبر.. * لما رئيس لجنة التحقيق في مجزرة فض الاعتصام يكون هو نفسه محامي اخو المخلوع... كده ما بنصبر * لما لجنة التحقيق تعترف انها سمعت 3000 شاهد وشاهدت 150 فيديو وما توجه الاتهام لأي شخص ده معناها ما حيكون في قصاص للشهداء ابدا وهنا ما بنصبر... * لما مفاوضات السلام يكون قاعد فيها الكوز كباشي بتفاوض مع الكوز جبريل ابراهيم.... كده ما بنصبر * لما يقعد العسكري الكوز سنة كامله كوالي ويدعم في اجتماعات المؤتمر الوطني... هنا ما بنصبر * لما تفشل الحكومة الانتقالية سنة كامله في القبض على السرقوا البلد ( القبضوكم سنة 89 في ثلاثه ايام )... هنا ما بنصبر.. * لما تفشل الحكومة الانتقالية سنة كامله في محاكمة البشير وأعوانه أو تسليمهم الجنائية كده من حقنا نشك انه قحت هي النسخة الأوربية للكيزان... وهنا ما بنصبر.. * لما تبقى الدولة العميقة شماعة اي فاشل... هنا ما بنصبر... السيد حمدوك... نحن ما عندنا هواية اسمها المواكب أو ال مليونيات،،، نحن جبناك واهدافنا أوضح من الشمس وما حققت فيها ولا حتى السلام الاديناه 6 شهور لو تتذكر... وبالعكس.... اتضاعفت علينا قسوة الحياة وانت قاعد تعاين بس،،، * مدني الموية بتقطع فيها بالايام والخرطوم عايشة في ظلام عميق... ونحن ندفع حق كل شئ من جيوبنا المتهالكة و برررررضو ما لاقيين حاجه... اخيرا... يوم 30 يونيو في سيناريوهات كتيره احتمال تحصل واحتمال نموت في اليوم داك... لكن خليك عارف.... انت السبب ونحن طلعنا لأنك مقصر وماعايز تخلينا ننسى المواكب والمليونيات.... احقن دمائنا واطلع لينا انشاء الله بقرار إقالة الولاة العسكريين أو اعفاء وزراءك الفاشلين ديل عشان الناس تعرف انه قلبك عليهم وانك شغال بضمير.... أو ننتظر الطوفان.. كسرة... الناس البقولوا لينا صبرتوا على الكيزان 30 سنة.... ياخوي لو انا لي 30 سنة باب بيتي فاتح وكل يوم بتسرق ،،، ده معناه حرام على وعيب لو انتبهت للباب وعايز اقفله؟؟؟ وللا حيجيني حرامي جديد يقول لي اصبر علي زي ما صبرت لغيري؟؟؟؟؟ بعدين انت عايزنا نصبر على شنو؟؟؟ على انعدام الرغيف وزيادة سعره؟؟؟ دي عايزه ليها 30 سنة؟؟؟ توفير المحروقات عايز 30 سنة؟؟ توفير الدواء عايز 30 سنة؟؟؟ توفير المواصلات عايز 30 سنة؟؟ طيب ياخ اطلع قول لينا كده وخلي لينا القرار كشعب بدل ما تعمل فينا العمايل دي كلها بحجة اننا ممكن نصبر 30 سنة تاني... نحن طالعين ومافي زول بخوفنا بمسلحين أو قمع أو قتل،،،، طالعين بخيارات محدده... اما صححنا المسار..... أو سقطت ثالث... أو قابلنا وجه رب كريم!!
