بسم الله الرحمن الرحيم في السلك قلت ليكم سوق المواسير ما صدقتوا العربيه زاتها طلعت ماسوره قدر ما لزوها ابت تدور ارفع 0000 ارفع ابت ترفع من الميدان ابت تطلع بله جابر مصاب مستني العربيه اول ما شافها قام حيلو قال اخير امرق بي رجليني اخير لي من تقوم بينا رب العربيه تقع بينا رب عربيه تودينا لي الاخره ناس قالوا قطعت بنزين الصادق صاحب دكان الزيوت واسبيرات الركشه بحي البوسته قال متبرع بي كرستاله بنزين للعربيه في اي مباراه وناس قالوا ضاربه بلوتين فرج الله الهلالابي المكنيكي قال متبرع يولف ليها بولتين بتاع هكره ويصنفرو قبل كل كوره وناس قالوا الحمد لله ما دورت عشان لو دورت كان سخنت ولو سخنت اللديتر كان دشر اتدشري عربيه سماحة جمل الطين ملونه زي علبة ( الروثمان ) لكن في ناس قالوا السبب المكنه قالوا مكنتها ما اصليه مركبين ليها مكنة توكتوك التوكتوك القالوهوا ناس ابراهيم حجازي يوم كورة مصر والجزائر براكم جبتوا سيرة التوكتوك وبعد ده ماشين مصر دفره يا ابن العم ايدك معانا عليكم الله احسن العربيه دي ولا منير الانتر ولا كاريكا ولا احمد الغافل ولا علاء لفة ؟ قلت ليكم سوق المواسير ده هنا ما في الفاشر غايتو يا الرشيد وكت وصلت للعربيه ليك حق يا اخوي اديكم فكره جيبوا ليكم اتوس بالاقساط واقطعوا السقف وشغلوها في الميدان لكن البدفع المقدم منو ؟ خليهو المقدم البلتزم بالاقساط منو ؟ خليها الاقساط البقبل يبيع ليكم بالدين منو ؟ ارفع دورت ! شغلوها صارقيله عارفين صارقيله يعني شنو ؟ صارقيله دي العربيه الهكره سيدها بجيبها الدلاله ويجيب معاهو حبة قريشات عشان يقايض بيها اها السماسره بسموها صارقيله بشركوا بيها للناس طعم يعني وبتبيت في الدلاله في حته اسمها العنبر اول ما يجي زول يقيف جمبها السماسره يجوهوا واحد يقول والله العربيه دي سيدها دكتور البيت العياده العياده البيت والتاني يقول المويه الفي اللديتر دي موية بلدها الاول يحلف طلاق الكرنك استاندرد تقول ليهم الصوت ده كده ليه يقولوا ليك الصاجه القداميه راخيه شويه تقول ليهم بترترت ليه يقولوا ليك الولد بتاع العفريته اظنوا رشه البلكات بالمويه المهم بقنعوك تديهم عربيتك الجات برجلينها للدلاله ويدوك حبة قريشات يشلوها منك كلها عموله ويدوك الصارقيله يلزوا معاك شويه ويقولوا ليك بيتها في العنبر وترجع بالمواصلات اها الجاب ليكم الصارقيله دي منو يا الرشيد ! غايتو تاني لو في لاعب سقط علي الارض في استادكم الا نوقف ليهو امجاد سوق مواسير ساااااااااااااااااااااي اديكم فكره عربيتكم دي اموشوا بيها مصر عشان لما تصلوا تلعبوا دوري حسن الخاتمه سؤال العربيه دي مرخصه ؟ والله دي تودوها الفحص الآلي يحولوكم الرنين المغنطيسي وصوره مقطعيه وفحص وظائف الكلي وتحليل كامل للدم دم ! هي لو عندها دم كانت احرجتنا قدر ده ! ودوها الفكي تودينا لي بحري العربيه المزاد العربيه سعد قشره العربيه حلفايا العربيه اف ام الرياضيه العربيه وقفوها جمب الاذاعه الرياضيه عشان يوسف السماني يشوفها طبعا طوالي حايستضيف الكاردينال يوسف : يا سيد اشرف رايك شنو في البحصل من العربيه ده ! كاردينال : البحصل من العربيه ده سببو انو العربيه ماعارفه قيمة الهلال يوسف : طيب يا سيد اشرف انتوا كأهله خلصاء دوركم شنو ؟ كاردينال : انا متببرع بعربيه زي حقت جمال الوالي يوسف بفرحه شديده : زي حقت جمال اللونها سلفر ؟ كاردينال : مازي حقت جمال السايقها , زي حقت استاد المريخ قصدي يوسف : وممكن برضو يا سيد اشرف تتبرع للهلال بعربيه زي السايقها جمال ؟ كاردينال : العربيه السايقها جمال دي مافي زول عارف ماركتها شنو , ياخ دي اسمها زي اسم المضاد الحيوي , شنو كده سسكولمباكسين يوسف : لومباكسين دي صعبه , طيب ياسيد كاردينال العربيه المتبرع بيها حاتسلمها للهلال بواسطة الاذاعه الرياضيه متين عشان نعمل ليها احتفال ونخصص برامج اسبوع كامل ليها كاردينال : حا اسلمها بعد ما يتخطي الهلال الاسماعيلي يوسف : دي زوغه عدييييييييييل يا اشرف كاردينال : اقول ليك 000000000 توت توت توت يوسف : للاسف انقطع الهلال اقصد الاتصال المهم يا روشا بييييييع واشتري ليك ركشه للشباب ديل يشغلوها بالصباح ركشه يسترزقوا منها وبالمساء نقاله تستر الحاله الزول لو داير تعرف حالتو شوف حالة عربيتو تقوم بينا كب 000 تقع بينا ررررررررررب سلك كهربا لن ننسااااااااااااااااااااااااك والي لقاء سلك babikir maki [[email protected]]
