بسم الله الرحمن الرحيم في السلك • قرأت بالامس موضوعا رائعا للرائع قسم خالد • تحدث فيه عن التحكيم • وتأثيره الكبير علي نتائج المباريات • واضاعته لمجهودات انديه اعدت نفسها جيدا وصرفت بسخاء • وتحدث عن تأثيرات لجنة التحكيم المركزيه • ومراكز القوي فيها • وخوف الحكام منها في نيل الدوليه • وبالتالي تنفيذ ما يعجب تلك اللجنه • بل والاشخاص المسيطرين علي تلك اللجنه • تحدث عن ضرورة اختيار حكام اكفاء لادارة هذا الممتاز • لانه مميز • ليس كالسابق • كلام رائع من زول رائع • كلام كبير من زول كبير • ولكن ختم قسم كلامو بكلام غريب • كأننا اجانب • قال الهلال تضرر تحكيميا بسبب الخوف من الاعلام الاحمر • او قول التحكيم الاحمر • تخيلوا الهلال مظلوم من التحكيم • نؤيدك ياقسم في ذلك ونزيدك من الشعر قصائد • تتذكر لما الهلال اتظلم في استاد الخرطوم في مباراه افريقيه ! • لما الكوره طلعت ضربة مرمي • واحتسبها الحكم ركنيه جاء منها هدف التعاون • وهو هدف المباراه الوحيد • تتذكر الظلم ده يا قسم ؟ • ماتنساهو • قول واحد • تتذكر ياقسم كورتكم ضد الفريق النيجيري في استادكم بدوري المجموعات ! • لما الكوره ضربت في ضهر الزول • احتسبها الحكم ضربة جزاء لصالح الهلال • ظلم فيها الحكم الهلال ظلم شديد اليوم داك • قول اتنين • تتذكر يا قسم هدف الهلال التاني في الدقيقه 95 الجابو يوسف محمد في اسيك العاجي • تتذكر الفاول القلع بيها الكوره ومررها لي قودوين • وتتذكر تمريرة قودوين ليوسف المتسلل • الجا منها هدف الفوز • ظلم كبير حاق بكم في ذلك اليوم • واظنك يا قسم ما بتنسي كورة جزيرة الفيل ضدكم في الدوره الاولي • لما المعز طلع في رقبة مهاجم الجزيره • وكانت النتيجه تلاته اتنين • وطبعا لو احتسبت ضربة جزاء بكون فيها طرد للمعز • وهدف تعادل • لكن التحكيم اليوم داك ظلمكم ورفض احتسابها • قول خمسه • اسي الجاب مازيمبي شنو ؟ • لكنك لاتنسي ياقسم كورة جزيرة الفيل ضدكم في الدوره التانيه • هدف وحيد • من ضربة جزاء • دقت في الماسوره • ورجعت للماسوره • واحرز منها نفس اللاعب المنفذ هدف • الغريبه الحكم احتسبه • ولجنة التحكيم البتتكلم عنها استفسرت الفيفا عن حكم الحاله • حاله من ابجديات الكوره • في ظلم وقع عليكم اكتر من كده ! • مظلومين انتوا ظلم شديد يا قسم • لكن كورتكم ضد حي العرب الادوكم فيها اتنين • كان الحكم الفاضل ابو شنب • سادومبا رفس لاعب حي العرب • الناس الساكنين سلالاب وديم عرب شافوهوا • الا الفاضل ماشاف • الطرد يعني الايقاف • والايقاف يعني الابعاد عن المباراه القادمه • والمباراه القادمه كانت ضد ام بعلو • ضد المريخ • ظلم كبير اوقعه الفاضل عليكم في تلك المباراه • مساكييييييييييييين انتوا يا قسم • طوالي مظلومين من التحكيم • حتي في كورتكم ضد نيل الحصاحيصا الاخيره • تلاته ضربات جزاء للنيل لم تحتسب • وهدف من تسلل واضح • الحكم قصد يظلمكم • ظلم شديد • قول سبعه • لكن اكبر ظلم وقع عليكم يوم كورة اول اغسطس • ضربة جزاء من الخيال • الحكم اداكم ليها غصبا عنكم • واتشاتت كم مره • في كل مره تطلع • الحكم يعيدها • الاخيره قالوا الحكم قال لي مهند المره دي لو ماجبتها • الجايه بشوتها براي • نسيتها ولا شنو ياقسم ؟ • وكمل الحكم في ذلك اليوم الظلم عليكم • واحتسب هدف لصالحكم من تسلل من دائرة السنتر • ظلم شديد جدا يتعرض له الهلال من التحكيم • انشاء الله ياقسم • الموسم ده ربنا يهدي الحكام • وينير بصيرتهم • ويجعلهم يحكمون ضمائرهم • ويعطون كل ذي حق حقه • عندها شوف كم هلال يتنافسون في سنتر ليق الهبوط • المهم • الشعب يريد تغيير النظام في اليمين مدوره من زمن ماكانت مدوره في مصر • لا الشعب لقي مرادو ولا قنع طلع كل يمني في جبلو • والشعب يريد تغيير النظام في ليبيا • انشاء الله النظام في ليبيا ما يتغير قريب ده • انشاء الله المسلسل ده يستمر زي المسلسل التركي • مادايرين نتحرم من كوميديا القذافي • الراجل اثبت انه اعظم كوميديان عربي • من حق الشعب ان يظاهر , لكن لا يخرج الشارع • ده كلام يا قذافي ! سلك كهربا ننسي وين يا معلم ! والي لقاء سلك babikir maki [[email protected]]
