بسم الله الرحمن الرحيم في السلك • اول امس جمعتي قعده رائعه بالنيل الازرق مع الرائع جدا محمد عبدالماجد • كانت دردشه حلوه وبسيطه • تناولنا خلالها ماننشده من صفات نتمني ان تسود بصورة اكبر في مجتمع الرياضه • البعد عن التهاتر والتحلي بروح الرياضه كان محور اللقاء • ود عبد الماجد شأنه شان بقية الاهله اعصابو باظت لما جات سيره الجويات • خمسه وتمانين سنه • كلما ما يقولوا حانحقق الانجاز تجي تونس تمد ايدها • المهم • ود عبد الماجد في تلك الحلقه انتقد تسجيل الحضري بحجة تقدم العمر • ونسي ود عبدالماجد ان زولهم لعب عام اربعه وتسعين اساسي في تشكيلتهم • زمن دوري الخرطوم • تصدقوا الزول ده بلعب من زمن المريخ والهلال بلعبوا في دوري الخرطوم • الوكت داك عصام الحضري كان شبل في دمياط • الوكت داك مافي مصري بعرف انو في شافع يافع اسمو عصام الحضري • الوكت داك زول ناس محمد عبدالماجد اساسي • اتذكر دوري الخرطوم الزمن داك كان بلعب فيهو الثعلب وياسر بتاع الاهلي (اسي مدرب ) وعبدالمجيد جعفر • ولو ما اخاف الكضب اولاد العاتي وتعبان جنينه كانوا بلعبوا للمورده • دفعتوا ناس قداااااااام • اربعه وتسعين دي ما متأكد المرحوم قنديل اعتزل ولا لسه • لكن يخيل لي ان صلاح احمد محمد صالح كان جديييد في التحكيم • خبير التحكيم الطاهر محمد عثمان اظنوا كان بحكم الوكت داك • الزول ده ماشاء الله يا محمد عبدالماجد قديم شديد • تقول لي الحضري • دحين ماهو زاتو اللعب الباص لي ويد طايشين ولا راش ما حسبها ؟ • لأ ...ماهو • زمن وليد لاراش ده كان سبعه وتمنين • المهم زولكم قديم يا ود عبد الماجد • بعد الحلقه مشيت البيت • حضرت كورتنا ضد اتحاد مدني • وكورة ناس محمد عبدالماجد ضد النسور • جات فاول في منتصف الملعب • زول ناس ود عبدالماجد من محلها داك شات في القون • الله يسألك يا محمد عبد الماجد الشوته من النص دي ما كلام خرف ؟ • زول قبال عشرين سنه ما بشوت من الحته دي • يشوت منها الليله ؟ • محمد عبدالماجد • اتخرفي • اها • نرجع لكورتنا ضد اتحاد مدني • الكوره الفاتت الحضري وحصلها باسكال • التسلل ده لقوهوا ياناس ؟ • ضربة جزاء مع سعيد السعودي • ناس مدني وقفوا • الحكم قال ليهم مشي مشي • طيب لو ضربة جزاء ليه ياحكم الهنا لم تنذر سعيد ؟ • الحصل ده بحصل لينا كل سنه • بس الفرق انو السنه دي في اصرار وشفتنه • انا عافي من الشغيل • وراضي عنو دنيا واخري • وانتوا عارفين ليه • علي كده طوالي ياشغيل • هنو مزعج وخطير • بس مامركز • شوية تركيز ياكابتن • البدري بدأت تظهر بعض بصماته • بالذات في الوسط • البدري نوع المدربين المابعتمدوا علي المهاره الفرديه والحلول الشخصيه بقدر كبير • يعتمد كثيرا علي الجماعيه وتسخير الامكانيات الفنيه لمصلحة المجموعه • وده الكلام الصاح • ولو التزم كلتشي بالجماعيه يوم مدني كان بدري بدري حسمنا الموضوع • اها • اول امس كان اليوم الرابع لنفرة العضويه • شباب من اجل المريخ • لم احضر لظروف قاهره وطارئه • ولكني علمت ان اليوم قد نجح • مزيدا من النجاحات يا شباب • والجايه معاكم من العصر • المهم • ريان المريخابيه قالت لي نكته • قالت في واحد بتاع بحر قابل ليهو واحده • قال ليها انت حلوه • قالت ليهو انت عبيط ؟ • قال ليها تلفونك كم ؟ • قالت ليهو انت عبيط ؟ • قال ليها كنت داير اعرف عنوانك عشان داير اتزوجك • قالت ليهو انت جادي ؟ • قال ليها انت عبيطه ؟ • المهم • عمك هرمنا منتظر علي احر من الجمر • الموضوع فيهو شيه خلي بالك • من النص ؟ • الخرف ده كيف ؟؟؟؟؟؟ سلك كهربا ننسا شنو ولا منو وكيف بس ؟ والي لقاء سلك babikir maki [[email protected]]